ଅରୁଣାଚଳ ପ୍ରଦେଶରେ ଚୀନ ଓ ଭାରତୀୟ ସୈନ୍ୟ ହାତାହାତି

ନୂଆଦିଲ୍ଲୀ: ଗତବର୍ଷ ଲଦାଖରେ ଚାଇନା ଓ ଭାରତୀୟ ସୈନ୍ୟ ସାମନା ସାମନି ହେବା ସହିତ ହାତାହାତି ହୋଇଥିବାବେଳେ ସଂପ୍ରତି ଅରୁଣାଚଳ ପ୍ରଦେଶରେ ସମାନ ଘଟଣା ଘଟିଥିବା ଖବର ମିଳିଛି । ଗତ ସପ୍ତାହରେ ଏହି ଘଟଣା ଘଟିଥିଲେ ମଧ୍ୟ ତାହା ବିଳମ୍ବରେ ସର୍ବସମ୍ମୁଖକୁ ଆସିଛି । ବାସ୍ତବ ନିୟନ୍ତ୍ରଣ ରେଖାକୁ ନେଇ ଚୀନ ସୈନ୍ୟ ଭୁଲ ଦାବି କରିବା ଫଳରେ ଉଭୟ ପକ୍ଷ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା ।
ପ୍ରତିରକ୍ଷା ବିଭାଗ ସୂତ୍ରରୁ ମିଳିଥିବା ଖବର ଅନୁଯାୟୀ ଦୁଇ ପକ୍ଷ ପରସ୍ପରର ସାମନା ସାମନି ହେବା ସହିତ କେଇ ଘଣ୍ଟା ଧରି ଏଲଏସିରେ ଛିଡାହୋଇ ରହିଥିଲେ । ତେବେ ଏଥିରେ ଭାରତୀୟ ସେନା ଯବାନଙ୍କର କିଛି କ୍ଷୟ କ୍ଷତି ଘଟିନାହିଁ । ଏକ ଟେଲିଭିଜନ ଚାନେଲ ସୂତ୍ରରୁ ଜଣାଯାଇଛି ଯେ ଅରୁଣାଚଳ ପ୍ରଦେଶରେ ତାୱାଙ୍ଗ ଅଞ୍ଚଳରେ ପ୍ରାୟ ୨୦୦ ଚାଇନା ସୈନ୍ୟ ଅଧିକୃତ ବଙ୍କର ନଷ୍ଟ କରିବାକୁ ଉଦ୍ୟମ କରିଥିଲେ ଏବଂ ସେମାନଙ୍କ ମଧ୍ୟରୁ କେତେକଙ୍କୁ ଭାରତୀୟ ଯବାନ ଅଟକ ରଖିଥିଲେ । ଏଲଏସି ନିକଟରେ ଥିବା ସୀମାନ୍ତ ସଡକ ବୁମ୍‌ ଲା ଏବଂ ୟାଙ୍ଗସ୍ତେ ଠାରେ ଏହି ଘଟଣା ଘଟିଥିଲା । ଚଳିତ ବର୍ଷ ଜାନୁଆରୀରେ ଆମେରିକାସ୍ଥିତ ଚିତ୍ର ଉତ୍ତୋଳନକାରୀ କମ୍ପାନୀ ପ୍ଲାନେଟ ଲାବ୍ସ କହିଥିଲା ଯେ ଅରୁଣାଚଳ ପ୍ରଦେଶର ସୁବାନସିରି ଜିଲାର ଉପର ଭାଗରେ ସାରି ଚୁ ନଦୀ କୂଳେ କୂଳେ ପ୍ରାୟ ୧୦୦ଟି ଘର ନିର୍ମାଣ କରାଯାଇଛି । ତେବେ ଏହା ଉପରେ ପ୍ରତିକ୍ରିୟା ରଖି ଭାରତର ବୈଦେଶିକ ବ୍ୟାପାର ମନ୍ତ୍ରଣାଳୟ କହିଥିଲା ଯେ ଅରୁଣାଚଳ ସମେତ ସୀମାନ୍ତରେ ବାସ କରୁଥିବା ଦେଶର ନାଗରିକଙ୍କ ଜୀବନ ଜୀବିକାରେ ଉନ୍ନତି ଆଣିବାକୁ ସେଠାରେ ବିଭିନ୍ନ ଭିତ୍ତିଭୂମି ପ୍ରକଳ୍ପ ନିର୍ମାଣ କରାଯାଉଛି ।
ଚଳିତ ବର୍ଷ ଅଗଷ୍ଟରେ ପ୍ରାୟ ୧୦୦ ଜଣ ପିପୁଲ୍ସ ଲିବିରେସନ ଆର୍ମି ଅଫ ଚାଇନା (ପିଏଲଏ) ସୈନ୍ୟ ଉତ୍ତରାଖଣ୍ଡର ବାରାହୋତି ସେକ୍ଟରରେ ଏଲଏସି ଅତିକ୍ରମ କରି ଭାରତୀୟ ସୀମାକୁ ଅନୁପ୍ରବେଶ କରିବା ସହିତ ଭାରତୀୟ ସୀମା ମଧ୍ୟରେ କେଇ ଘଣ୍ଟା ରହିଥିଲେ । ଏଥିସହିତ ସେମାନେ ଉକ୍ତ ଅଞ୍ଚଳରେ ଥିବା ଏକ ସେତୁକୁ ଯିବା ପୂର୍ବରୁ ଭାଙ୍ଗି ଦେଇଥିଲେ । ତେବେ ଚାଇନାର ଏଭଳି ଅନୁପ୍ରବେଶ ସମ୍ପର୍କରେ ଭାରତ ପକ୍ଷରୁ କୌଣସି ମତାମତ ଦିଆଯାଇନାହିଁ ।