ବନ୍ୟାପାଣିରେ ଯୁବକଙ୍କୁ ଟାଣିନେଲା କୁମ୍ଭୀର: ଖୋଜୁଛନ୍ତି ଅଗ୍ନିଶମ ବାହିନୀ, ଦେଖନ୍ତୁ ଭିଡିଓ..

ଧାମନଗର: ଲଘୁଚାପ ଜନିତ ଲଗାଣ ବର୍ଷାରେ ଉବୁଟୁବୁ ହେଉଛି ଭଦ୍ରକ ଜିଲ୍ଲା । ଧାମନଗର ସୀମାନ୍ତ ଦେଇ ପ୍ରବାହିତ ବୈତରଣୀ ନଦୀର ଜଳସ୍ତର ବୃଦ୍ଧି ପାଇଛି । ଭଣ୍ଡାରିପୋଖରୀ ବ୍ଲକର କଣ୍ଟିଘାଇ ବାଟ ଦେଇ ଗେଙ୍ଗୁଟିରେ ପାଣି ପଶିବାରୁ ଦୋବଲ ଓ ଧୁଷୁରୀ ଜଳମଗ୍ନ ହୋଇଛି।

ଗତ ତିନି ଦିନ ହେଲା ଧାମନଗର ଅଞ୍ଚଳରେ ବନ୍ୟାସ୍ଥିତି ସଙ୍ଗୀନ ହୋଇଥିବା ବେଳେ ଆରଡି ନିକଟସ୍ଥ ମୁଆଁଗାଁ ନିକଟରେ ଏକ ଅଘଟଣ ଘଟିଛି। ବୈତରଣୀ ନଦୀରେ ଶୌଚ ହେଉଥିବା ବେଳେ ଭାସିଯାଇ ଘନଶ୍ୟାମ ଦାସ ନାମକ ଜଣେ ଯୁବକ ନିଖୋଜ ଅଛନ୍ତି । ଯୁବକ ଜଣକଙ୍କୁ କୁମ୍ଭୀର ଝାମ୍ପି ନେଇଥିବା ସନ୍ଦେହ କରାଯାଉଛି । ନଦୀରେ ବର୍ତ୍ତମାନ ବନ୍ୟାଜଳ ପ୍ରଖର ସ୍ରୋତରେ ପ୍ରବାହିତ ହେଉଥିବାରୁ ନିଖୋଜ ଯୁବକଙ୍କ ପତ୍ତା ମିଳୁନାହିଁ । ଗାଁ ଲୋକମାନେ ଡଙ୍ଗା ଦ୍ବାରା ଖୋଜାଖୋଜି ଜାରି ରଖିଛନ୍ତି । ଏନେଇ ଖବର ପାଇବା ପରେ ଧାମନଗର ଅଗ୍ନିଶମ ବାହିନୀ ପହଞ୍ଚି ଡଙ୍ଗା ଦ୍ବାରା ଖୋଜିବା ଆରମ୍ଭ କରିଛି ।

ସେପଟେ ବନ୍ୟା ଯୋଗୁ ଧାମନଗରର ଅନେକ ଗାଁ ଜଳବନ୍ଦୀ ହୋଇ ରହିଛି । ହଜାର ହଜାର ଲୋକ ପାଣି ଘେରରେ ରହିଛନ୍ତି । ଅନେକ ପରିବାରରେ ଚୁଲି ଜଳୁ ନଥିବା ବେଳେ ଅନେକ ଲୋକ ଆଶ୍ରୟ ସ୍ଥଳୀରେ ଆଶ୍ରୟ ନେଇଛନ୍ତି । ସ୍ଥାନୀୟ ପ୍ରଶାସନ କିମ୍ବା ସରପଞ୍ଚ ପ୍ରଭାବିତ ଲୋକଙ୍କ ପାଖରେ ପହଞ୍ଚିନଥିବା ଦେଖିବାକୁ ମିଳିଛି।