ଦେଓଗାଁ: ସ୍ଵାମୀଙ୍କ ଦୀର୍ଘାୟୁ କାମନା କରି ପ୍ରତ୍ୟେକ ସଧବା ନାରୀ ଆଜି ସାବିତ୍ରୀ ବ୍ରତ ପାଳନ କରିଛନ୍ତି। ହେଲେ ପୂଜା ସମୟରେ ଦୀପରୁ ଶାଢିରେ ନିଆଁ ଲାଗିଯିବା ଫଳରେ ପୋଡ଼ି ହୋଇ ଜଣେ ମହିଳା ଗୁରୁତର ହୋଇଛନ୍ତି। ଏଭଳି ଏକ ଅଭାବନୀୟ ଘଟଣା ଘଟିଛି ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକ ଅନ୍ତର୍ଗତ କୁଳୁତାପଡା ପଞ୍ଚାୟତର ଖଇରମାଲ ଗାଁରେ।
ତୁଷୁରା ଥାନା ଅନ୍ତର୍ଗତ ଖଇରମାଲ ଗାଁରେ ଶୁକ୍ରବାର ମହିଳାମାନେ ସାବିତ୍ରୀ ବ୍ରତ ପାଳନ କରୁଥିଲେ। ଗାଁର ସମସ୍ତ ମହିଳା ଏକତ୍ରିତ ହୋଇ ଗାଁ ଦାଣ୍ଡରେ ଥିବା ଏକ ଗଛ ମୂଳେ ପୂଜାର୍ଚ୍ଚନା କରୁଥିବା ସମୟରେ ହଠାତ୍ ଜଣେ ମହିଳାଙ୍କ ଶାଢ଼ିରେ ନିଆଁ ଲାଗି ଯାଇଥିଲା। ସାଙ୍ଗରେ ଥିବା ଅନ୍ୟ ମହିଳାମାନେ ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ। ପରେ କିଛି ପୁରୁଷ ଆସି ନିଆଁକୁ ଲିଭାଇଥିବା ଗାଁ ଲୋକ ପ୍ରକାଶ କରିଛନ୍ତି। ଏନେଇ ପରିବାର ଲୋକେ ଜାଣିବା ପରେ ଏକ ଆମ୍ବୁଲାନ୍ସ ସାହାଯ୍ୟରେ ତାଙ୍କୁ ନେଇ ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରିଛନ୍ତି। ନିଆଁରେ ପୋଡ଼ି ଯାଇଥିବା ମହିଳା ଜଣକ ଖଇରମାଲ ଗାଁର ମାଲ ବାରିକଙ୍କ ସ୍ତ୍ରୀ ବୁଲି ବାରିକ ବୋଲି ଜଣାପଡିଛି।
Comments are closed.