ସମାଜ ଲାଇଭ୍ ଡେସ୍କ : ଦିଲ୍ଲୀ ବିସ୍ଫୋରଣ ଘଟଣାର ତଦନ୍ତରେ ଗୋଟିଏ ପରେ ଗୋଟିଏ ଆଶ୍ଚର୍ଯ୍ୟ କଲା ଭଳି ତଥ୍ୟ ସାମ୍ନାକୁ ଆସୁଛି । ଘଟଣାରେ ସଂପୃକ୍ତ ଡାକ୍ତର ଶାହିନ ୧୦ ବର୍ଷ ଧରି ଜୈଶ-ଏ-ମହମ୍ମଦ ସହିତ ଜଡିତ ଥିବା କହିଛି ତଦନ୍ତକାରୀ ଦଳ । ଏପରିକି ସେତେବେଳେ ଚାକିରି ଛାଡିବାସହ ନିଜ ସ୍ଵାମୀ ଏବଂ ପିଲାଙ୍କୁ ମଧ୍ୟ ଛାଡ଼ିଥିଲେ ।
ଦିଲ୍ଲୀ ଲାଲକିଲ୍ଲା ବିସ୍ଫୋରଣ ମାମଲାର ତଦନ୍ତ କରୁଛି ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) । ଏନ୍ଆଇଏ ର ଜଣେ ବରିଷ୍ଠ ଅଧିକାରୀ ଦେଇଥିବା ସୂଚନା ଅନୁସାରେ , ଦିଲ୍ଲୀ ବିସ୍ଫୋରଣ ଘଟାଇଥିବା ଆତଙ୍କୀ ଡାକ୍ତର ଉମର, ଡାକ୍ତର ଶାହିନ ଏବଂ ତାଙ୍କ ସହଯୋଗୀ ଡାକ୍ତର ମୁଜାମ୍ମିଲ ଫରିଦାବାଦର ଅଲ୍ ଫଲାହ ବିଶ୍ୱବିଦ୍ୟାଳୟରେ କାମ କରୁଥିଲେ । ଲକ୍ଷ୍ନୌରେ ରହୁଥିବା ଆତଙ୍କବାଦୀ ଡାକ୍ତର ଶାହିନ ସଇଦ ୧୦ ବର୍ଷ ଧରି ପାକିସ୍ତାନ ସମର୍ଥିତ ଆତଙ୍କବାଦୀ ସଂଗଠନ ଜୈଶ-ଏ-ମହମ୍ମଦ ସହିତ ଜଡିତ ଥିଲେ । ଶାହିନ ୨୦୧୫ ମସିହାରେ ଜୈଶ-ଏ-ମହମ୍ମଦରେ ଯୋଗ ଦେଇଥିଲେ ।
ଏଥିପାଇଁ ସେ ଚାକିରୀ ସହ ନିଜ ସ୍ଵାମୀ ଏବଂ ପିଲାଙ୍କୁ ମଧ୍ୟ ଛାଡ଼ିଥିଲେ । ୨୦୨୧ ମସିହାରେ, ଯେତେବେଳେ ଜଣେ ସମ୍ପର୍କୀୟ ଡାକ୍ତର ଶାହିନଙ୍କୁ ତାଙ୍କ ସ୍ୱାମୀ, ପିଲା ଏବଂ ଚାକିରି ଛାଡିବା ପାଇଁ ଭର୍ତ୍ସନା କରିଥିଲେ। ଶାହିନ ଜବାବ ଦେଇଥିଲେ, “ପରିବାର ଏବଂ ଚାକିରିର ଅର୍ଥ କ’ଣ ? ମୁଁ ନିଜ ପାଇଁ ଯଥେଷ୍ଟ । ଏବେ ସମ୍ପ୍ରଦାୟକୁ ଋଣ ପରିଶୋଧ କରିବାର ସମୟ ଆସିଛି।” ତଦନ୍ତକାରୀ ସଂସ୍ଥାଗୁଡ଼ିକ ଉମର, ମୁଜାମ୍ମିଲ ଏବଂ ଶାହିନଙ୍କୁ ମିଳିଥିବା ୨୦ ଲକ୍ଷ ଟଙ୍କାର ପାଣ୍ଠିର ପର୍ଦ୍ଦାଫାଶ କରିଛନ୍ତି । ସୂତ୍ର ଅନୁସାରେ ଏହି ଟଙ୍କା ଜୈଶ-ଏ-ମହମ୍ମଦ ହ୍ୟାଣ୍ଡେଲ ମାଧ୍ୟମରେ ହାୱାଲା ନେଟୱାର୍କ ମାଧ୍ୟମରେ ପଠାଯାଇଥିଲା । ନଭେମ୍ବର ୧୦ ତାରିଖରେ ଦିଲ୍ଲୀର ସୁଭାଷ ମାର୍ଗ ସିଗନାଲରେ ହୋଇଥିବା ବିସ୍ଫୋରଣରେ ୧୩ ଜଣଙ୍କର ମୃତ୍ୟୁ ହୋଇଥିଲା। ଏପର୍ଯ୍ୟନ୍ତ୨୦ ରୁ ଅଧିକ ଆହତଙ୍କ ଚିକିତ୍ସା ଚାଲିଛି, ଯେଉଁଥିରେ ତିନି ଜଣଙ୍କ ଅବସ୍ଥା ଗୁରୁତର ଅଛି।
