ଭବାନୀପାଟଣା / ଲାଞ୍ଜିଗଡ଼: କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ ବାବୁପଦର ଗାଁରେ ରବିବାର ବିଳମ୍ବିତ ରାତିରେ ମାଓବାଦୀ ପୁଲିସ ଇନଫର୍ମର ସନ୍ଦେହରେ ଜଣଙ୍କୁ ହତ୍ୟା କରିଥିବା ଜଣାପଡ଼ିଛି। ମୃତକ ହେଲେ ଭୀମ ଦୋରା। ସେ ବିଶ୍ୱନାଥପୁର ଥାନା ଅନ୍ତର୍ଗତ ମୂଷିନାଳ ପଞ୍ଚାୟତର ସେଲ୍ଫ କଣ୍ଟ୍ରୋଲ ମେକାନିକ ଭାବେ କାର୍ଯ୍ୟ କରୁଥିଲେ।
ସୂଚନା ଅନୁଯାୟୀ, କାଲି ବିଳମ୍ବିତ ରାତିରେ ଭୀମ ଦୋରା ଖାଇପିଇ ପରିବାର ସହ ଘରେ ଶୋଇଥିବା ସମୟରେ କେହି କବାଟ ବାଡ଼େଇବାରୁ ଭୀମ ବିଛଣାରୁ ଉଠି କବାଟ ଖୋଲିଥିଲେ। ଏହାପରେ ସେଠାରେ ସଶସ୍ତ୍ର ମାଓବାଦୀ ତାଙ୍କୁ ବାହାରକୁ ଆସିବାକୁ କହିଥିଲେ। ଏହାପରେ ଭୀମଙ୍କୁ ଗାଁରୁ ୧୦୦ ମିଟର ଦୂରକୁ ନେଇ ଗୁଳିକରି ହତ୍ୟା କରିଥିଲେ। ଏହାସହ ମୃତଦେହ ନିକଟରେ ଏକ ସାଧା କାଗଜରେ ଲେଖା ଛାଡ଼ି ଯାଇଥିଲେ। ସେହି ଲେଖା ଅନୁଯାୟୀ, ୨୦୧୬ ମସିହାରେ ଗୁଣ୍ଡାରାଶି ପାହାଡ଼ରେ ମାଓବାଦୀ ଶିବିର ଚାଲୁଥିବା ବେଳେ ପୁଲିସକୁ ଭୀମ ଖବର ଦେବାରୁ ସେ ଆକ୍ରମଣ କରିଥିଲେ। ଏହି କାରଣରୁ ଭୀମଙ୍କୁ ହତ୍ୟା କରାଯାଇଛି ବୋଲି ଚିଠିରେ ଉଲ୍ଲେଖ ରହିଛି। ଏହା କଳାହାଣ୍ଡି ଏରିଆ କମିଟି ସିପିଆଇ ମାଓବାଦୀ ବୋଲି ପୋଷ୍ଟରରେ ଦର୍ଶା ଯାଇଛି। ଏଭଳି ହତ୍ୟାକାଣ୍ଡ ହେବା ପରେ ସ୍ଥାନୀୟ ଅଞ୍ଚଳରେ କୋକୁଆ ଭୟ ସୃଷ୍ଟି ହୋଇଛି। ଭୀମର ମୃତ୍ୟୁ ପରେ ସକାଳ ସମୟରେ ବିଶ୍ୱନାଥପୁର ପୁଲିସ ଘଟଣାସ୍ଥଳକୁ ଯାଇ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଥିଲା। ଏହାପରେ ପରିବାର ଲୋକଙ୍କୁ ମୃତଦେହକୁ ହସ୍ତାନ୍ତର କରିଥିଲା।
Comments are closed.