ନୂଆଦିଲ୍ଲୀ: କୋଭିଡ଼ ଜନିତ କ୍ଷତବିକ୍ଷତ ଭାରତୀୟ ଅର୍ଥନୀତି, ସୀମାରେ ଚୀନ ଆକ୍ରମଣରେ ୨୦ ଭାରତୀୟ ସେନା ସହିଦ । ନାଗରିକତ୍ବ ସଂଶୋଧନ ଅଧିନିୟମକୁ ଉତ୍ତର ଓ ଉତ୍ତରପୂର୍ବ ଭାରତରେ ପ୍ରଚଣ୍ଡ ବିରୋଧ, କୃଷି ଆଇନକୁ ନେଇ ଦେଶରେ ଚାଷୀଙ୍କ ଅସନ୍ତୋଷ । ଏହା ସତ୍ବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶର ସର୍ବାଧିକ ବିଶ୍ବସନୀୟ ନେତା । ଦେଶବାସୀ ତାଙ୍କୁ ପ୍ରଧାନମନ୍ତ୍ରୀ ଭାବରେ ଦେଖିବାକୁ ଚାହୁଁଛନ୍ତି । ଏବେ ଯଦି ଦେଶରେ ଭୋଟ ହୁଏ, ତେବେ ଏନଡ଼ିଏ ପାଖାପାଖି ୩୦ ଆସନ ହରାଇବା ସତ୍ବେ ବିଜେପି ନେତୃତ୍ବାଧୀନ ଏନଡ଼ିଏ ପୁନର୍ବାର ସରକାର ଗଢ଼ିବାକୁ ସମର୍ଥ ହେବ ବୋଲି ଇଣ୍ଡିଆ ଟୁଡ଼େ-କାର୍ଭି ଇନ୍ସାଇଟ୍ସ ମୁଡ଼୍ ଅଫ୍ ଦି ନେସନ (ଏମଓଟିଏନ) ସର୍ଭେରେ କୁହାଯାଇଛି ।
୨୦୧୯ ସାଧାରଣ ନିର୍ବାଚନରେ ବିଜେପି ନେତୃତ୍ବାଧୀନ ଏନଡ଼ିଏ ୩୫୭ଟି ଆସନରେ ବିଜୟୀ ହୋଇଥିଲା । ମାତ୍ର ଏବେ ନିର୍ବାଚନ ହେଲେ ଏହି ସଂଖ୍ୟା ୩୨୧କୁ ଖସି ଆସିବାର ଆଶଙ୍କା ରହିଛି । ଯଦିଓ ୨୦୨୦ରେ ଏମଓଟିଏନ୍ ସର୍ବେକ୍ଷଣଠାରୁ ଚଳିତ ସର୍ବେକ୍ଷଣରେ ଏନଡ଼ିଏ ଆହୁରି ୫ଟି ଆସନ ଅଧିକ ପାଇବ ବୋଲି ଆକଳନ କରାଯାଇଛି । ସେହିପରି ଗତ ନିର୍ବାଚନରେ ବିଜେପି ନେତୃତ୍ବାଧୀନ ଏନଡ଼ିଏ ୪୫% ଭୋଟ ପାଇଥିବାବେଳେ ଏବେ ତାହା ୪୩%କୁ ହ୍ରାସ ପାଇପାରେ ବୋଲି ଆକଳନ କରାଯାଇଛି ।
ଅନ୍ୟପକ୍ଷରେ ଏମଓଟିଏ୍ ସର୍ଭେରେ କଂଗ୍ରେସ ଓ ୟୁପିଏ ନିମନ୍ତେ ସେପରି କିଛି ଉତ୍ସାହଜନକ ସୂଚନା ନାହିଁ । ଏଥିରେ କୁହାଯାଇଛି ଯେ କଂଗ୍ରେସ ନେତୃତ୍ବାଧୀନ ୟୁପିଏ ଏବେ ନିର୍ବାଚନ ହେଲେ ୯୩ଟି ଆସନରେ ବିଜୟୀ ହୋଇପାରେ। ଏହା ମଧ୍ୟରୁ ୨୦୨୯ରେ ୫୨ ଆସନ ଦଖଲ କରିଥିବା କଂଗ୍ରେସ ୫୧କୁ ଖସି ଆସିପାରେ ବୋଲି ମଧ୍ୟ ଦର୍ଶାଯାଇଛି ।
ଆଞ୍ଚଳିକସ୍ତର ଓ ବର୍ଗୀକୃତ ଅଞ୍ଚଳକୁ ଅନୁଧ୍ୟାନ କରାଗଲେ ସର୍ଭେରେ ଉତ୍ତର ଭାରତରେ ବିଜେପିକୁ ସବୁଠୁ ଅଧିକ ସଫଳତା ମିଳିବ ବୋଲି କୁହାଯାଇଛି। ହିନ୍ଦୀ, ହିନ୍ଦୁ ଓ ହିନ୍ଦୁତ୍ବ ରାଜନୀତିରେ ଏନଡ଼ିଏ ଲୋକମାନଙ୍କର ପ୍ରଥମ ପସନ୍ଦ ରହିଛି ଏବଂ ଉତ୍ତର ଭାରତରେ ଦଳକୁ ୧୦୪ଟି ଆସନ ମିଳିବ ବୋଲି ସର୍ଭେରେ କୁହାଯାଇଛି । ଅନୁରୂପ ଭାବରେ ପୂର୍ବଭାରତରେ ବିଜେପି ଓ ଏନଡ଼ିଏର ଲୋକପ୍ରିୟତା ବଢ଼ିଛି । ପୂର୍ବ ଭାରତୀୟ ରାଜ୍ୟରେ ଏନଡ଼ିଏକୁ ୧୦୦ ଆସନ, ପଶ୍ଚିମ ଭାରତରେ ୮୫ ଓ ଦକ୍ଷିଣ ଭାରତରେ ୩୨ ଆସନ ପାଇପାରେ ବୋଲି କୁହାଯାଇଛି ।
ଏମଓଟିଏନ୍ ସର୍ଭେରେ କେବଳ ବିଜେପିର ଆସନ ସଂଖ୍ୟାକୁ ନେଇ ମଧ୍ୟ ଆକଳନ କରାଯାଇଛି । ଏବେ ନିର୍ବାଚନ ହେଲେ କେବଳ ବିଜେପି ଦେଶରେ ୨୯୧ ସଂସଦୀୟ କ୍ଷେତ୍ରରେ ବିଜୟୀ ହେବାର ସମ୍ଭାବନା ରହିଛି, ଯାହା ଆବଶ୍ୟକ ସଂଖ୍ୟା ଗରିଷ୍ଠତାଠାରୁ ୧୯ଟି ଆସନ ଅଧିକ ବୋଲି କୁହାଯାଇଛି । ସବୁଠାରୁ କୌତୂହଳର କଥା ହେଉଛି କରୋନା ପୂର୍ବ କାଳରେ ସାଧାରଣ ନିର୍ବାଚନର କିଛିମାସ ପରେ ୨୦୨୦ ଜାନୁଆରୀ ମାସରେ ହୋଇଥିବା ନିର୍ବାଚନରେ ବିଜେପିର ସିଟ୍ ଆକଳନ ସଂଖ୍ୟା ଗରିଷ୍ଠତା ତଳେ ରହିଥିଲା । ମାତ୍ର ଏବେ ତାହା ଢ଼େର ଅଧିକ ବୃଦ୍ଧି ପାଇଥିବା ଏହି ସର୍ଭେରେ ପ୍ରକାଶ ପାଇଛି ।
