ଭୁବନେଶ୍ବର : ରାଜ୍ୟରେ କରୋନା ସ୍ଥିତି ନିୟନ୍ତ୍ରଣାଧୀନ ଥିବା ବେଳେ ପ୍ରଶାସନ ପାଇଁ ଚିନ୍ତା ବଢ଼ାଇଛି ବାହାର ରାଜ୍ୟରୁ ଫେରିଥିବା ଓଡିଆ। ଲକଡାଉନା କଟକଟା କୋହଳ ହେବାପରେ ବାହାର ରାଜ୍ୟରୁ ବହୁ ସଂଖ୍ୟାରେ ଓଡିଆ ଆସିବାକୁ ଥିବା ବେଳେ ସଂକ୍ରମଣ ରୋକିବାକୁ ସରକାର ଆଗୁଆ ପଦକ୍ଷେପ ଗ୍ରହଣ କରିଛନ୍ତି। ବାହାରୁ ରାଜ୍ୟରୁ ଫେରିବାକୁ ଥିବା ଶ୍ରମିକଙ୍କୁ ପଞ୍ଜିକରଣ କରିବାକୁ ପଡିବ। ବିନା ପଞ୍ଜିକରଣରେ ଗାଁକୁ ଫେରିପାରିବେ ନାହିଁ ବୋଲି କଡା ନିର୍ଦେଶନାମା ଜାରି କରାଯାଇଛି।
ଲକଡାଉନ କୋହଳ ହେବାପରେ ରାଜ୍ୟ ବାହାରୁ ପ୍ରାୟ ୫ ଲକ୍ଷ ଓଡିଆ ଲୋକ ଗ୍ରାମକୁ ଫେରିବେ ବୋଲି ସରକାର ଆକଳନ କରିଛନ୍ତି। ସେମାନଙ୍କଠାରୁ କରୋନା ସଂକ୍ରମଣ ରୋକିବାକୁ ପ୍ରଶାସନ ପଦକ୍ଷେପ ସୂରୁପ ପଞ୍ଜିକରଣ ବାଧ୍ୟତାମୂଳକ କରିଛନ୍ତି। ବାହାରୁ ଫେରିବାକୁ ଥିବା ସମସ୍ତ ଓଡିଆ ସେମାନଙ୍କ ନାମ ଓ ଅନ୍ୟାନ୍ୟ ତଥ୍ୟ ପଞ୍ଜିକରଣ ବେଳେ ଦେବେ। ଏଥିପାଇଁ ସରକାରଙ୍କ ପକ୍ଷରୁ ଏକ ସ୍ବତନ୍ତ୍ର ପୋର୍ଟାଲ କରାଯିବ। ଆସନ୍ତା ୨୪ ତାରିଖରୁ ଏଥିରେ ପଞ୍ଜିକରଣ କରାଯିବ। ବାହାରୁ ଆସୁଥିବା ଓଡିଆଙ୍କ ପରିବାର ପକ୍ଷରୁ ମଧ୍ୟ ପଞ୍ଜିକରଣ କରାଯାଇପାରିବ। ପଞ୍ଜିକରଣ ନକଲେ ଗାଁକୁ ପୁରାଇ ଦିଆଯିବ ନାହିଁ ବୋଲି ସ୍ପଷ୍ଟଭାବେ କୁହାଯାଇଛି। ଏହାକୁ ସୂଚର ରୂପେ କାର୍ଯ୍ୟକାରୀ କରିବାକୁ ପ୍ରତି ପଞ୍ଚାୟତରେ ନୋଡାଲ ଅଫିସର ରହିବେ। ଏହାର ତଦାରଖ ପାଇଁ ବିଡିଓ ୫ ଜଣିଆ କମିଟି ମଧ୍ୟ ଗଠନ କରିବେ। ବାହାରୁ ଫେରୁଥିବା ଲୋକଙ୍କୁ ୧୪ ଦିନିଆ ସଂଗରୋଧରେ ରଖାଯିବ। କୌଣସି ପରିସ୍ଥିତିରେ ଘରକୁ ଯିବାକୁ ଦଆଯିବନାହିଁ ବୋଲି ସରକାରଙ୍କ ପକ୍ଷରୁ ନିର୍ଦେଶ ଦିଆଯାଇଛି।
