ସମାଜ ଡିଜିଟାଲ ଡେସ୍କ: ଉତ୍ତରପ୍ରଦେଶର ଲକ୍ଷ୍ନୌସ୍ଥିତ କଂଗ୍ରେସର ରାଜ୍ୟ ମୁଖ୍ୟାଳୟରେ ଜଣେ କଂଗ୍ରେସ କାର୍ଯ୍ୟକର୍ତ୍ତାଙ୍କ ମୃତ୍ୟୁକୁ ନେଇ ବିବାଦ ଆରମ୍ଭ ହୋଇଛି। ମୃତ କାର୍ଯ୍ୟକର୍ତ୍ତା ଜଣକ ୨ ଘଣ୍ଟା ଧରି କାର୍ଯ୍ୟାଳୟରେ ସଂଜ୍ଞାହୀନ ଅବସ୍ଥାରେ ପଡ଼ିରହିଥିଲେ। ତୁରନ୍ତ ତାଙ୍କୁ ଡାକ୍ତରଖାନା ନିଆଯାଇ ନ ଥିଲା। ଶେଷରେ ୨ ଘଣ୍ଟା ପରେ ଡାକ୍ତରଖାନା ନେବା ବେଳକୁ ତାଙ୍କ ମୃତ୍ୟୁ ହୋଇସାରିଥିଲା। ଏହି ଘଟଣାକୁ ନେଇ ନାନା ପ୍ରଶ୍ନବାଚୀ ସୃଷ୍ଟି ହୋଇଛି। କାର୍ଯ୍ୟକର୍ତ୍ତାଙ୍କର କିପରି ମୃତ୍ୟୁ ଘଟିଲା ତାହାକୁ ନେଇ ପ୍ରଶ୍ନ ଉଠୁଥିବାବେଳେ ପରିବାର ଲୋକେ ହତ୍ୟା ଅଭିଯୋଗ ଆଣିଛନ୍ତି।
ଏହି ମାମଲାରେ ଫୋରେନସିକ ଟିମ କାର୍ଯ୍ୟାଳୟରେ ପହଞ୍ଚିତ ତଦନ୍ତ ଚଳାଇଛି। ତେବେ ଟିମ ପହଞ୍ଚିବା ବେଳକୁ ଉକ୍ତ ସ୍ଥାନକୁ ସଫାସୁତରା କରିଦିଆଯାଇଥିଲା, ଯାହାକୁ ନେଇ ଅନେକ ସନ୍ଦେହ ସୃଷ୍ଟି ହୋଇଛି। ପୁଲିସ କାର୍ଯ୍ୟାଳୟରେ ଉପସ୍ଥିତ ଥିବା କଂଗ୍ରେସର ଅନ୍ୟ କାର୍ଯ୍ୟକର୍ତ୍ତାମାନଙ୍କୁ ୩ ଘଣ୍ଟା ଧରି ପଚରାଉଚରା କରିଛି। ହେଲେ କେଉଁ ପରିସ୍ଥିତିରେ ତାଙ୍କର ମୃତ୍ୟୁ ଘଟିଲା ସେ ବିଷୟରେ କୌଣସି କାର୍ଯ୍ୟକର୍ତ୍ତା ମୁହଁ ଖୋଲିନାହାନ୍ତି। କାର୍ଯ୍ୟକର୍ତ୍ତା ଜଣକ ସଂଜ୍ଞାହୀନ ଅବସ୍ଥାରେ ପଡ଼ିରହିବା ପରେ କିପରି ତାଙ୍କୁ କେହି ଡାକ୍ତରଖାନା ନେଲେ ନାହିଁ ତାହା ସନ୍ଦେହଘେରରେ ରହିଛି।
