ବୌଦ୍ଧ: ବୌଦ୍ଧ ବିଜ୍ଞାପିତ ଅଞ୍ଚଳ ପରିଷଦ ଅଧିନରେ ଚାଲିଥିବା ବିଭିନ୍ନ ପ୍ରକଳ୍ପ କାର୍ଯ୍ୟ ବୁଲି ଦେଖିବା ସହିତ ଏ ସଂପର୍କରେ ସମୀକ୍ଷା କରିଛନ୍ତି ଜିଲ୍ଲାପାଳ ସତ୍ୟରଞ୍ଜନ ସାହୁ। ବୁଧବାର ପୂର୍ବାହ୍ନରେ ଜିଲ୍ଲାପାଳ ଶ୍ରୀ ସାହୁ, ବିଜ୍ଞାପିତ ଅଞ୍ଚଳ ପରିଷଦ ଅଧ୍ୟକ୍ଷ ମୃତ୍ୟୁଞ୍ଜୟ ମିଶ୍ର ସହରରେ ଚାଲିଥିବା ବିଭିନ୍ନ ଉନ୍ନୟନମୂକଳ ପ୍ରକଳ୍ପ ଓ ପ୍ରସ୍ତାବିତ ପ୍ରକଳ୍ପ ସବୁ ବୁଲି ଦେଖିଥିଲେ। ସହରର ବାପୁଜୀନଗର ଶଙ୍ଖଚୂଡ ପୋଖରୀ ଓ ରାଜନପାଲି ଘାସି ମେହେର ପୋଖରୀର ଉନ୍ନତିକରଣ କାର୍ଯ୍ୟ ଓ ଐତିହାସିକ ରାମେଶ୍ୱର ମନ୍ଦିର ସମ୍ମୁଖରେ ନିର୍ମାଣାଧିନ ରାମେଶ୍ୱର ଉଦ୍ୟାନ ବୁଲି ଦେଖିବା ସହିତ ଜିଲ୍ଲାପାଳ ବିଜ୍ଞାପିତ ଅଞ୍ଚଳ ପରିଷଦ କର୍ତ୍ତୃପକ୍ଷଙ୍କ ଉଦ୍ୟମକୁ ପ୍ରଶଂସା କରିଥିଲେ। ଏଥିସହିତ କେନ୍ଦ୍ରୀୟ ବିଦ୍ୟାଳୟ ନିକଟରେ ମହାନଦୀରେ ପ୍ରସ୍ତାବିତ ଶ୍ମସାନଘାଟ ନିର୍ମାଣ, ବାଇପାଶ ରାସ୍ତାରେ ଜଗଦିଶପୁର ଛକର ଉନ୍ନତିକରଣ, ନୂତନ ପ୍ରସ୍ତାବିତ ବସଷ୍ଟାଣ୍ଡ ଓ ଟ୍ରକ ଟର୍ମିନାଲ, ପଶ୍ଚିମା ଭବନ, ମହାନଦୀରେ ସହରର ଉପରମୁଣ୍ଡ ମୁରୁଷୁଣ୍ଢି ପର୍ଯ୍ୟନ୍ତ ବନ୍ୟା ନିୟନ୍ତ୍ରଣ ପାଇଁ ଆଡିବନ୍ଧ ନିର୍ମାଣ, ମହାନଦୀ ବ୍ରିଜଛକରେ ଭେଣ୍ଡିଂଜୋନ ଓ ପାନୀୟଜଳ ପ୍ରକଳ୍ପ ନିର୍ମାଣ ଓ ପୁରୁଣାବ୍ଲକ ଛକଠାରେ ପ୍ରସ୍ତାବତ ଭେଣ୍ଡିଂଜୋନ ନିର୍ମାଣ ଏବଂ କୁଷ୍ଠାଶ୍ରମର ଅନ୍ତେବାସୀଙ୍କ ପାଇଁ ଉତ୍ତମ ବାସଗୃହ ନିର୍ମାଣ ଆଦି କାର୍ଯ୍ୟ ବୁଲି ଦେଖିବା ସହିତ ପ୍ରସ୍ତାବିତ ପ୍ରକଳ୍ପ ଗୁଡିକର ସମୀକ୍ଷା କରି ବିଭିନ୍ନ ପରାମର୍ଶ ଦେଇଥିଲେ। ସମୁଦାୟ ୧୪ଟି ପ୍ରକଳ୍ପ ବୁଲିଦେଖିବା ପରେ ସହରର ବିକାଶ ପାଇଁ ବିଜ୍ଞାପିତ ଅଞ୍ଚଳ ପରିଷଦ ପକ୍ଷରୁ ପ୍ରସ୍ତାବିତ ପ୍ରକଳ୍ପ ଗୁଡିକ ପାଇଁ ଅର୍ଥର ଅଭାବ ରହିବନାହିଁ ବୋଲି ଜିଲ୍ଲାପାଳ ଶ୍ରୀ ସାହୁ ପ୍ରକାଶ କରିବା ସହିତ ନିର୍ଦ୍ଧାରିତ ସମୟ ମଧ୍ୟରେ ପ୍ରକଳ୍ପ ସବୁର ନିର୍ମାଣ କାର୍ଯ୍ୟ ସାରିବାକୁ ପରାମର୍ଶ ଦେଇଥିଲେ। ଏହି ଅବସରରେ ବିଜ୍ଞାପିତ ଅଞ୍ଚଳ ପରିଷଦ ନିର୍ବାହୀ ଅଧିକାରୀ ଇଂ.ମନୋରଞ୍ଜନ ପଣ୍ଡା, କନିଷ୍ଠ ଯନ୍ତ୍ରୀ ପବିତ୍ର କୁମାର ପ୍ରଧାନ ପ୍ରମୁଖ ଉପସ୍ଥିତ ଥିଲେ।
Comments are closed.