ବିନିକା: ସୁବର୍ଣ୍ଣପୁର ଜିଲା ବିନିକା ଥାନା ଅନ୍ତର୍ଗତ ଶଙ୍କରା ଗ୍ରାମରେ ରବିବାର ସକାଳେ ଘଟିଛି ଏକ ଅଭାବନୀୟ ଘଟଣା। ଗ୍ୟାସ ସିଲିଣ୍ଡରରୁ ନିଆଁ ଲାଗି ଧୋବାପଡ଼ାର ୮ ବର୍ଷର ଶିଶୁର ମୃତ୍ୟୁ ଘଟିଛି। ଏହାସହିତ ଶିଶୁର ବାପା ଗୁରୁତର ଭାବେ ଆହତ ହୋଇଛନ୍ତି। ମୃତୁ ଶିଶୁ ହେଉଛି ଗାଁର ଟିକେ ଗୁଦୁରିଆ(୪୪)ଙ୍କ ପୁଅ ସାଗର ଗୁଦୁରିଆ।
ଘଟଣାରୁ ପ୍ରକାଶ ଯେ, ଆଜି ସକାଳୁ ଘରେ ଶିଶୁର ମାଆ ଓ ବାପା ଟିକେ ଗୁଦୁରିଆ ଉଭୟେ ଗ୍ୟାସ ଲଗାଇ ଚା’ ତିଆରି କରୁଥିଲେ। ଠିକ୍ ସେତିକି ବେଳେ ହଠାତ ଗ୍ୟାସ ସିଲିଣ୍ଡର ଫାଟି ସେଥିରୁ କ୍ଷୀପ୍ର ଗତିରେ ନିଆଁ ଜଳି ଉଠିଥିଲା। ଶିଶୁଟି ଘରେ ଶୋଇଥିବା ବେଳେ ଏହି ଅଘଟଣ ଘଟିଥିଲା। କ୍ଷୀପ୍ର ଗତିରେ ନିଆଁ ଜଳି ଉଠିବା ପରେ ପିତାମାତା ଓ ପଡ଼ୋଶୀ ଶିଶୁକୁ ନିଆଁ ଦାଉରୁ ରକ୍ଷା କରିବା ପାଇଁ ଚେଷ୍ଟା କରିଥିଲେ ମଧ୍ୟ କୌଣସି ଫଳ ମିଳି ନ ଥିଲା। ପରେ ଘଟଣା ସମ୍ପର୍କରେ ବିନିକା ଅଗ୍ନିଶମ ବିଭାଗକୁ ଖବର ଦେବା ପରେ ଗାଁରେ ଅଗ୍ନିଶମ ବିଭାଗ ଅଧିକାରୀ ଭକ୍ତ ଚରଣ ତାଣ୍ଡିଆଙ୍କ ସମେତ ଅନ୍ୟାନ୍ୟ କର୍ମଚାରୀ ପହଞ୍ଚି ନିଆଁ ଆୟତ୍ତ କରିଥିଲେ। ମାତ୍ର ସେତେବେଳକୁ ଶିଶୁଟି ନିଆଁରେ ପୋଡ଼ି ଦଗ୍ଧ ହୋଇ ଯାଇଥିଲା। ପରେ ଦଗ୍ଧ ଶିଶୁର ଶରୀରକୁ ଗ୍ରାମବାସୀଙ୍କ ସହାୟତାରେ ବିନିକା ଡାକ୍ତରଖାନାକୁ ନିଆ ଯାଇଥିଲା। ତେବେ ହସ୍ପିଟାଲରେ ଡାକ୍ତର ଦେବାଶିଷ ତ୍ରିପାଠୀ ଶିଶୁକୁ ମୃତ ଘୋଷଣା କରିବା ସହ ତାର ବ୍ୟବଚ୍ଛେଦ କରାଇଥିଲେ।
ପରେ ପୁଲିସ ପହଞ୍ଚି ଘଟଣା ସମ୍ପର୍କରେ ଅବଗତ ହେବା ପରେ ଏ ନେଇ ବିନିକା ଥାନା କେସ ନଂ ୦୯/୨୦୨୧ ଅନୁସାରେ ଏକ ଅପମୃତ୍ୟୁ ମାମଲା ରୁଜୁ କରିବା ସହ ବିନିକା ଥାନା ଏସଆଇ ସୂର୍ଯ୍ୟକାନ୍ତ ସେଠୀ ଘଟଣାର ତଦନ୍ତ କରିଛନ୍ତି। ତେବେ ଏଭଳି ପରିସ୍ଥିତିରେ ଏକ ଅଭାବନୀୟ ଘଟଣାକୁ ନେଇ ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି। ଘଟଣା ସମ୍ପର୍କରେ ଅବଗତ ହେବା ପରେ ବିନିକା ତହସିଲଦାର ଅଲେଖ ଘୁଟା କୌଡିଆମୁଣ୍ଡା ସର୍କଲ ରାଜସ୍ବ ନିରୀକ୍ଷକଙ୍କୁ ଘଟଣାର ସର୍ଜମୀନ ତଦନ୍ତ କରି ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି। ବିନିକା ଡାକ୍ତରଖାନାରେ ଶିଶୁର ମୃତଦେହକୁ ବ୍ୟବଚ୍ଛେଦ କରିବା ପରେ ପରିବାରକୁ ହସ୍ତାନ୍ତର କରାଯାଇଛି। ପରେ ଗାଁ ଶ୍ମଶାନରେ ମୃତ ଶିଶୁର ଶବ ସତ୍କାର କରାଯାଇଛି। ତେବେ ସମସ୍ୟା ସମ୍ପର୍କରେ ସରକାର ତୁରନ୍ତ ଦୃଷ୍ଟି ଦେଇ ଗ୍ୟାସ ଅଗ୍ନିକାଣ୍ଡରେ ମୃତ ଶିଶୁର ଗରିବ ପରିବାରକୁ କ୍ଷତିପୂରଣ ଯୋଗାଇ ଦେବା ପାଇଁ ଜନ ସାଧାରଣରେ ଦାବି ହେଉଛି।
Comments are closed.