ନୂଆଦିଲ୍ଲୀ : ଦେଶରେ ଇ-ପରିବହନକୁ ପ୍ରୋତ୍ସାହନ ଦେବା ପାଇଁ ଏକ ନୂଆ ଯୋଜନା ଘୋଷଣା କରାଯାଇଛି । ଏପ୍ରିଲ ୨୦୨୪ରୁ ଜୁଲାଇ ୨୦୨୪ ସୁଦ୍ଧା ଚାଲିବାକୁ ଥିବା ଏହି ଯୋଜନାରେ ୫୦୦ କୋଟି ଟଙ୍କା ଖର୍ଚ୍ଚ ହେବ । ନୂଆ ପରିଯୋଜନା ଦୁଇଚକିଆ ଏବଂ ତିନିଚକିଆ ଗାଡି ପାଇଁ ଉଦ୍ଦିଷ୍ଟ । ଦେଶରେ ଇଲେକ୍ଟ୍ରିକ୍ ଗାଡିକୁ ଆପଣାଇବା ଏବଂ ନିର୍ମାଣ କାର୍ଯ୍ୟକ୍ରମର ଦ୍ବିତୀୟ ପର୍ଯ୍ୟାୟ ୩୧ ମାର୍ଚ୍ଚ ୨୦୨୪ ରେ ସମାପ୍ତ ହେଉଛି ।
ଭାରୀ ଉଦ୍ୟେଗ ମନ୍ତ୍ରୀ ମହେନ୍ଦ୍ର ନାଥ ପାଣ୍ଡେ ଇ-ପରିବହନ ସମ୍ବର୍ଦ୍ଧନ ଯୋଜନା ୨୦୨୪(ଇଏମ୍ ପିଏସ୍ ୨୦୨୪)ର ଘୋଷଣା କରି କହିଛନ୍ତି କି ନରେନ୍ଦ୍ର ମୋଦୀ ସରକାର ଦେଶରେ ଇ-ପରିବହନକୁ ପ୍ରୋତ୍ସାହନ ଦେବା ପାଇଁ ବଦ୍ଧ ପରିକର । ଯୋଜନା ଅନୁସାରେ ପ୍ରତି ଦୁଇଚକିଆ ଗାଡି ପାଇଁ ୧୦ ହଜାର ଟଙ୍କାର ସହାୟତା ପ୍ରଦାନ କରାଯିବ । ପ୍ରାୟ ୩.୩ ଲକ୍ଷ ଦୁଇଚକିଆ ଗାଡିକୁ ସହାୟତା ପ୍ରଦାନ କରିବା ଏହାର ଉଦ୍ଦେଶ୍ୟ । ଛୋଟ ତିନିଚକିଆ (ଇ-ରିକ୍ସା ଏବଂ ଇ-କାର୍ଟ)ର କ୍ରୟ ପାଇଁ ୨୫ ହଜାର ଟଙ୍କା ପର୍ଯ୍ୟନ୍ତ ସହାୟତା ଦିଆଯିବ । ଏଭଳି ୪୧ ହଜାରରୁ ଅଧିକ ଗାଡିକୁ ସାମିଲ କରାଯିବ ।
ବଡ ତିନିଚକିଆ ଯାନ କିଣିଲେ ୫୦ ହଜାର ଟଙ୍କା ପର୍ଯ୍ୟନ୍ତ ଆର୍ଥିକ ସାହାଯ୍ୟ ଦିଆଯିବ । ଫେମ୍-୨ ଅନୁସାରେ ସବସିଡି ୩୧ ମାର୍ଚ୍ଚ ୨୦୨୪ ପର୍ଯ୍ୟନ୍ତ ବା ରାଶି ଉପଲବ୍ଧ ହେବା ପର୍ଯ୍ୟନ୍ତ ବିକ୍ରି ହେଉଥିବା ଗାଡି ପାଇଁ ଯୋଗ୍ୟ ହେବ । ଏହା ପୂର୍ବରୁ ଭାରୀ ଉଦ୍ୟେଗ ମନ୍ତ୍ରାଳୟ(ଏମଏଚଆଇ) ଏବଂ ଭାରତୀୟ ପ୍ରଦ୍ୟେଗିକୀ ସଂସ୍ଥା ଋଡକି ଅଟୋମେଟିଭ୍ ଏବଂ ଇଲେକ୍ଟ୍ରିକ୍ ଗାଡି କ୍ଷେତ୍ରକୁ ଆଗକୁ ବଢାଇବା ଉଦ୍ଦେଶ୍ୟରେ ମିସି କାମ କରିବା ପାଇଁ ଚୁକ୍ତିରେ ହସ୍ତାକ୍ଷର କରିଛନ୍ତି । ମନ୍ତ୍ରାଳୟ ଦ୍ବାରା ପ୍ରଦାନ କରାଯାଇଥିବା ସମୁଦାୟ ୧୯.୮୭ କୋଟି ଟଙ୍କାର ଅନୁଦାନ ଏବଂ ଉଦ୍ୟେଗ ଭାଗିଦାରୀର ଅତିରିକ୍ତ ୪.୭୮ କୋଟି ଟଙ୍କାର ଯୋଗଦାନ ସହିତ ସମୁଦାୟ ପ୍ରକଳ୍ପ ଖର୍ଚ୍ଚ ୨୪.୬୬ କୋଟି ଟଙ୍କା ।
