ସମାଜ ପୋର୍ଟାଲ ଡେସ୍କ: ବିଭିନ୍ନ ଅଭୟାରଣ୍ୟ, ବଣ୍ୟଜନ୍ତୁ ସଂରକ୍ଷଣସ୍ଥଳୀ ଓ ବ୍ୟାଘ୍ର ଅଭୟାରଣ୍ୟଗୁଡ଼ିକରେ କୋଭିଡ୍-ନାଇଣ୍ଟିନ୍ ସଂକ୍ରମଣ ବ୍ୟାପିବାକୁ ନିୟନ୍ତ୍ରଣ କରିବା ପାଇଁ କେନ୍ଦ୍ର ସରକାର ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ପରାମର୍ଶ ଜାରି କରିଛନ୍ତି। ଦେଶରେ କରୋନା ଭୂତାଣୁ ସଂକ୍ରମଣ ଓ ବିଦେଶରେ ଗୋଟିଏ ବାଘ କରୋନା ଭୂତାଣୁରେ ସଂକ୍ରମିତ ହେବାର ଖବର ପ୍ରକାଶ ପାଇବା ପରେ ପରିବେଶ ମନ୍ତ୍ରଣାଳୟ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ଏ ଦିଗରେ ତୁରନ୍ତ ପଦକ୍ଷେପ ଗ୍ରହଣ କରିବା ପାଇଁ ଚିଠି ଲେଖିଛି।
ମଣିଷ ଦେହରୁ ଜୀବଜନ୍ତୁଙ୍କ ଶରୀରକୁ ଯେଭଳି ଭୂତାଣୁ ସଂକ୍ରମିତ ନ ହୁଏ, ସେଥି ପ୍ରତି ବିଶେଷ ଦୃଷ୍ଟିଦେବାକୁ ପରିବେଶ ମନ୍ତ୍ରଣାଳୟ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ କହିଛି। ଲୋକମାନଙ୍କୁ ଜାତୀୟ ଅଭୟାରଣ୍ୟ, ବଣ୍ୟଜନ୍ତୁ ସଂରକ୍ଷଣ ସ୍ଥଳୀ ଓ ବ୍ୟାଘ୍ର ଅଭୟାରଣ୍ୟଗୁଡ଼ିକୁ ଯିବାପାଇଁ ଅନୁମତି ନ ଦେବା ଲାଗି ଏହି ପରାମର୍ଶ ସୂଚୀରେ କୁହାଯାଇଛି। ଫିଲ୍ଡ ମ୍ୟାନେଜର, ପଶୁ ଚିକିତ୍ସକ ଓ ଅଭୟାରଣ୍ୟଗୁଡ଼ିକ ପାଇଁ ମୁତୟନ କର୍ମଚାରୀମାନଙ୍କ ସହ ମିଶି ଏକ ଟାସ୍କଫୋର୍ସ କିମ୍ବା ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣକାରୀ ବାହିନୀ ଗଠନ କରିବାକୁ ମନ୍ତ୍ରଣାଳୟ ପକ୍ଷରୁ ପରାମର୍ଶ ଦିଆଯାଇଛି। ଯଦି ଏଭଳି କୌଣସି ଘଟଣା ଦୃଷ୍ଟିଗୋଚର ହୁଏ, ସେ ସଂକ୍ରାନ୍ତରେ ତୁରନ୍ତ ରିପୋର୍ଟ କରିବା ଲାଗି ଦିନରାତି ଚବିଶଘଣ୍ଟା କାର୍ଯ୍ୟ କରିବାକୁ ମଧ୍ୟ ସରକାରଙ୍କ ପକ୍ଷରୁ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ କୁହାଯାଇଛି।
Comments are closed.