ବ୍ରଜରାଜନଗର: ଲକ ଡାଉନ-୨ ପାଇଁ କେନ୍ଦ୍ର ଗୃହ ମନ୍ତ୍ରଣାଳୟ ଗାଇଡ଼ ଲାଇନ ଜାରି କରିଛନ୍ତି। ମଦ, ଗୁଟଖା ଓ ତମାଖୁ ବିକ୍ରିକୁ ନିଷେଧ କରାଯାଇଛି। ସର୍ବସାଧାରଣ ସ୍ଥାନରେ ଛେପ ପକାଇଲେ ଜରିମାନା ଧାର୍ଯ୍ୟ ହୋଇଛି । ମାତ୍ର ଗୁଟଖା ଓ ତମାଖୁ ଦୋକାନୀ ଚୋରାରେ ବିକ୍ରି କରୁଥିବା ଅଭିଯୋଗ ହୋଇଛି । ବେଆଇନ ପାନ ମସଲା ବିକ୍ରି ଅଭିଯୋଗରେ ରବିବାର ବ୍ରଜରାଜନଗର ଏସଡିପିଓ ଦିଲୀପ ଦାସଙ୍କ ନେତୃତ୍ୱରେ ଗାନ୍ଧିଛକ ସ୍ଥିତ ପ୍ରୀତି ପାନ ମସଲା ଦୋକାନ ଓ ଗୋଦାମ ଉପରେ ଚଢ଼ଉ କରାଯାଇଥିଲା। ଏହା ସହିତ ଦୋକାନ ମାଲିକଙ୍କ ଇଟାଭଟା ସ୍ଥିତ ବାସଭବନରେ ମଧ୍ୟ ଚଢାଇ କରାଯାଇ ଉଭୟ ସ୍ଥାନରୁ ମୋଟ ୪୦ ବସ୍ତା ପାନ ମସଲା, ସିଗାରେଟ, ଗୁଟଖା ତଥା ପାନ ଜାତ ଦ୍ରବ୍ୟ ପୁଲିସ ଜବତ କରିଛି। ଏହି ଘଟଣାରେ ପୁଲିସ ଦୋକାନ ମାଲିକ ପଦ୍ମଲୋଚନ ବୁଦ୍ଧିଆକୁ ଅଟକ ରଖିଛି। ଏହି ଚଢ଼ାଉରେ ବ୍ରଜରାଜନଗର ଆଇଆଇସି ଲଳିତା ମୋଦି, ବ୍ରଜରାଜନଗର ପୌର ନିର୍ବାହୀ ଅଧିକାରୀ ଦିଲୀପ ପଟେଲ, ଗାନ୍ଧିଛକ ଫାଣ୍ଡି ଅଧିକାରୀ ଚୂଡ଼ାମଣି ମହାନନ୍ଦ, ଏସଆଇ ପ୍ରଦ୍ୟୁମ୍ନ ସ୍ୱାଇଁ, ଏଏସଆଇ ହୀରାଧର ବେହେରା ସାମିଲ ରହିଥିଲେ। ବିକ୍ରିକର (ଜିଏସଟି) ବିଭାଗର ଉପ କମିଶନର ସୁବୋଧ ପଣ୍ଡା ପହଞ୍ଚି ଜବତ ସାମଗ୍ରୀର ଯାଞ୍ଚ କରୁଛନ୍ତି। ସେପଟେ ଜବତ ସାମଗ୍ରୀର ଆନୁମାନିକ ମୂଲ୍ୟ ୫ ଲକ୍ଷ ଟଙ୍କା ବୋଲି ଆକଳନ କରାଯାଉଛି।
Popular Categories
Previous article
Next article