ନୀଳଗିରି: ସାରା ରାଜ୍ୟରେ ବିଜେଡି ପକ୍ଷରୁ ବିଜୁ ଶ୍ରାଦ୍ଧୋତ୍ସବ ମହା ଆଡ଼ମ୍ବରରେ ପାଳନ କରାଯାଇଥିବା ବେଳେ ବାଲେଶ୍ୱର ଜିଲାର ନୀଳଗିରିରେ ବିଜେପି ଆନୁଗତ୍ୟଙ୍କ ବିଜୁପ୍ରେମ ଘଟଣା ସମ୍ପ୍ରତି ଚର୍ଚ୍ଚାର ବିଷୟ ପାଲଟିଛି।
ନୀଳଗିରି ବିଧାୟକ ସୁକାନ୍ତ ନାୟକ ବିଜେଡି ଛାଡ଼ି ସମ୍ପ୍ରତି ବିଜେପି ଦଳରେ ରହି କାର୍ଯ୍ୟ କରୁଛନ୍ତି । ବିଜେପିରେ ରହି ମଧ୍ୟ ପ୍ରତିବର୍ଷ ସେ ବିଜୁ ଶ୍ରାଦ୍ଧ ବାର୍ଷିକୀ ପାଳନ କରିଥାନ୍ତି । କିନ୍ତୁ କୌଣସି ଜରୁରୀ କାର୍ଯ୍ୟରେ ସେ ରାଜ୍ୟ ବାହାରକୁ ଯାଇଥିବା ଯୋଗୁ ତାଙ୍କ ଆନୁଗତ୍ୟମାନେ ସିଆଡ଼ିମାଳ ପଞ୍ଚାୟତ ଅଧୀନ ଭୁଟାସିମୁଳି ଗାଁରେ ବିଜୁଶ୍ରାଦ୍ଧ ପାଳନ କରିଥିବା ଦେଖିବାକୁ ମିଳିଛି । ବରହମପୁର ପୂଜ୍ୟପୂଜା ସଂସଦ ଆନୁକୂଲ୍ୟରେ ଆୟୋଜିତ ଏହି କାର୍ଯ୍ୟକ୍ରମରେ ବରିଷ୍ଠ ବିଜେପି ନେତା ଗଙ୍ଗାଧର ମିଶ୍ର, ସିଆଡ଼ିମାଳ ସମିତିସଭ୍ୟ ରାଜୀବ ଦାସବାବୁ, ସରପଞ୍ଚ ସୁରଥ ସିଂ, ଜଡ଼ିଦା ସରପଞ୍ଚ ରଞ୍ଜିତା ଦଣ୍ଡପାଟ, ଜାମୁଡ଼ିହା ସରପଞ୍ଚ ଚାନ୍ଦମଣି ମୁର୍ମୁ, ଆରବନ୍ଧ ସରପଞ୍ଚ କୁଳମଣି ନାୟକଙ୍କ ସମେତ ସଞ୍ଜୟ ନାୟକ, ବିନୋଦ ମହାନ୍ତି, ରାମକୃଷ୍ଣ ମହାପାତ୍ର, ନମା ସିଂ, ପ୍ରତାପ ବେହେରା, ଶରତ ସିଂ, ରାଜକୁମାର ସିଂ, ରାମଚନ୍ଦ୍ର ବେହେରା, ଚକ୍ରଧର ବେହେରା, ଶତୃଘ୍ନ ବେହେରା ପ୍ରମୁଖ ସାମିଲ ହୋଇ ବିଜୁବାବୁଙ୍କ ସ୍ମୃତିଚାରଣ କରିଥିଲେ । ତେବେ ବିଜୁବାବୁ କୌଣସି ଦଳର ନୁହଁ, ବରଂ ସେ ଜଣେ ଜନନେତା ବୋଲି କାର୍ଯ୍ୟକ୍ରମରେ ଉପସ୍ଥିତ ବିଜେପି କର୍ମୀମାନେ ପ୍ରକାଶ କରିଥିଲେ । ସେପଟେ ବିଜେପି କର୍ମୀଙ୍କ ବିଜୁପ୍ରେମକୁ କେନ୍ଦ୍ରକରି ରାଜନୈତିକ ମହଲରେ ମଧ୍ୟ ବେଶ ଚର୍ଚ୍ଚାର ବିଷୟ ପାଲଟିଛି ।
