ସାନ୍ତାଳୀ ବିଶ୍ୱବିଦ୍ୟାଳୟ ସ୍ଥାପନ ଦାବିରେ ମାରିସା ପକ୍ଷରୁ ୧୨ ଘଣ୍ଟିଆ ବାରିପଦା ବନ୍ଦ
ବାରିପଦା: ମୟୂରଭଞ୍ଜ ଜିଲା ସଦର ମହକୁମା ବାରିପଦାଠାରେ ସାନ୍ତାଳୀ ବିଶ୍ୱବିଦ୍ୟାଳୟ ବା ଏକ ସାନ୍ତାଳୀ ଶିକ୍ଷା ପରିଷଦ ସ୍ଥାପନ ଦାବିରେ ସ୍ଥାନୀୟ ଆଦିବାସୀ ରିଭୋଲ୍ୟୁସନାରୀ ୟୁଥ ଏଣ୍ଡ ଷ୍ଟୁଡେଣ୍ଟ ଆସୋସିଏସନ(ମାରିସା) ପକ୍ଷରୁ ମଙ୍ଗଳବାର ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ୧୨ ଘଣ୍ଟିଆ ବାରିପଦା ବନ୍ଦ ଡାକରା ଦିଆଯାଇଛି। ଫଳରେ ବାରିପଦାରୁ ଚଳାଚଳ କରୁଥିବା ସମସ୍ତ ଯାତ୍ରୀବାହୀ ବସଗୁଡିକୁ ଏହି ବନ୍ଦ ଡାକରା ଯୋଗୁଁ ବନ୍ଦ କରି ଦିଆଯାଇଛି।
ସହରର ଦେଇ ଯାଉଥିବା ୧୮ ନମ୍ବର ଜାତୀୟ ରାଜପଥର ମୁର୍ଗାବାଡି ଗୋଲେଇଠାରୁ ମାରିସା କର୍ମୀଙ୍କ ବିକ୍ଷୋଭ ଯୋଗୁଁ ତିନି ଘଣ୍ଟାରୁ ଅଧିକ ସମୟ ଧରି ଯାନବାହନ ଚଳାଚଳ ବନ୍ଦ ରହିବା ସହିତ ଶତାଧିକ ଗାଡି ଅଟକି ରହିଥିଲା। କିନ୍ତୁ ଜାତୀୟ ରାଜପଥରେ ବିକ୍ଷୋଭ କରୁଥିବା ସମୟରେ ପୁଲିସ ସହିତ ମୁହାଁମୁହିଁ ହେବା ଯୋଗୁଁ ମାରିସାର ଜିଲା ସଭାପତି ଅର୍ଜୁନ ମୁର୍ମୁଙ୍କ ସମେତ ୧୦ ଜଣଙ୍କୁ ବାରିପଦା ଟାଉନ ଥାନା ପୁଲିସ ଗିରଫ କରିବା ପରେ ଯାନବାହନ ଚଳାଚଳ ସ୍ୱାଭାବିକ ହୋଇଥିଲା। ଏହାର ପ୍ରଭାବରେ ସହର ମଧ୍ୟରେ କାଁ ଭାଁ ଯାନବାହନ ଚଳାଚଳ କରୁଥିବା ବେଳେ ଶିକ୍ଷାନୁଷ୍ଠାନଗୁଡିକ ବନ୍ଦ ରହିଛି।
ସାଧାରଣତଃ ପ୍ରତି ମାସର ଶେଷ ମଙ୍ଗଳବାର ଦିନ ଦୋକାନ ବଜାର ବ୍ୟବସାୟ ପ୍ରତିଷ୍ଠାନ ବନ୍ଦ ରହିଥିବାରୁ ସେଗୁଡିକ ସ୍ୱାଭାବିକଭାବେ ବନ୍ଦ ରହିଛି। ସରକାରୀ କାର୍ଯ୍ୟାଳୟ ଓ ବିଚାର ବିଭାଗୀୟ ଅଦାଲତମାନ ଖୋଲା ରହିଛି। ସହରତମାମ ପୁଲିସ ମୁତୟନ ରହି ପରିସ୍ଥିତି ପ୍ରତି ଦୃଷ୍ଟି ରଖିଛନ୍ତି। ଏପର୍ଯ୍ୟନ୍ତ କୌଣସିଠାରେ ଗଣ୍ଡଗୋଳର ସୂଚନା ମିଳି ନାହିଁ। ସହରର ବିଭିନ୍ନ ସ୍ଥାନରେ ବିକ୍ଷୋଭ କରୁଥିବା ୩୦ରୁ ଅଧିକ ମାରିସା କର୍ମୀଙ୍କୁ ବାରିପଦା ଟାଉନ ଥାନା ଓ ଲକ୍ଷ୍ମୀପୋଷୀ ପୁଲିସ ଫାଣ୍ଡିରେ ଅଟକ ରଖାଯାଇଛି ।