ରାଣୀ ଏଲିଜାବେଥଙ୍କ ସହିିତ ସମ୍ପର୍କ ତୁଟାଇଲା ବାର୍ବାଡୋସ; ବିଶ୍ୱର ନବୀନତମ ଗଣତନ୍ତ୍ର ଘୋଷିତ

ବ୍ରିଜଟାଉନ: ବାର୍ବାଡୋସ ଶେଷରେ ରାଣୀ ଏଲିଜାବେଥ ଦ୍ୱିତୀୟଙ୍କ ସହିତ ସମ୍ପର୍କ ଛିନ୍ନ କରିଛି । ଏଥିସହିତ ଆନୁଷ୍ଠାନିକ ଭାବରେ ଏହା ବିଶ୍ୱର ନବୀନତମ ଗଣତନ୍ତ୍ର ଭାବରେ ନିଜକୁ ଘୋଷଣା କରିଛି । ଏହି ଅବସରରେ ରାଣୀଙ୍କ ପ୍ରତୀକ ଭାବରେ ବିବେଚିତ ରୟାଲ ଷ୍ଟାଣ୍ଡାର୍ଡ ଧ୍ୱଜାକୁ ଅବତରଣ କରାଯାଇଥିଲା ଏବଂ ବର୍ତ୍ତମାନର ଗଭର୍ଣ୍ଣର ଜେନେରାଲ ଡେମ ସାନ୍ଦ୍ରା ମାସନ ବାର୍ବାଡୋସର ପ୍ରଥମ ରାଷ୍ଟ୍ରପତି ଭାବରେ ଶପଥ ଗ୍ରହଣ କରିଥିଲେ । ମଙ୍ଗଳବାର ଆୟୋଜିତ ଉତ୍ସବରେ ଏହି ଦ୍ୱୀପ ରାଷ୍ଟ୍ର ନିଜକୁ ଏକ ଗଣତାନ୍ତ୍ରିକ ରାଷ୍ଟ୍ର ଘୋଷଣା କରିବା ସମୟରେ ରାଣୀ ଏଲିଜାବେଥ ଦ୍ୱିତୀୟଙ୍କ ପୁତ୍ର ଯୁବରାଜ ଚାର୍ଲସ ଉପସ୍ଥିତ ଥିଲେ । ଏହାଦ୍ୱାରା ବାର୍ବାଡୋସ ଉପରେ ବ୍ରିଟେନର ରହିଥିବା ନିୟନ୍ତ୍ରଣରେ ପୂର୍ଣ୍ଣଛେଦ ପଡିଛି । ସଂପ୍ରତି ବିଶ୍ୱରେ କରୋନା ମହାମାରୀ ଆତଙ୍କ ପରିପ୍ରେକ୍ଷୀରେ ବାର୍ବାଡୋସରେ ମଧ୍ୟ କଟକଣା ଜାରି କରାଯାଇଛି । ତେବେ ଏହି ଐତିହାସିକ ଦିବସକୁ ପାଳନ କରିବା ପାଇଁ ଜନସାଧାରଣଙ୍କୁ ସୁଯୋଗ ଦେବା ସକାଶେ କଟକଣାକୁ କୋହଳ କରାଯାଇଥିଲା । ଏହି ଅବସରରେ ସାମରିକ ପରେଡ ସହିତ ନୂଆ ରାଷ୍ଟ୍ରପତିଙ୍କୁ ଗାର୍ଡ ଅଫ ଅନର ପ୍ରଦାନ, ତୋପ ସଲାମି ପ୍ରଦାନ କରାଯାଇଥିଲା । ପ୍ରାୟ ୨ ଲକ୍ଷ ୮୫ ହଜାର ଲୋକ ବାସ କରୁଥିବା ବାର୍ବାଡୋସ ତାହାର ସୁନ୍ଦର ବେଳାଭୂମି ଏବଂ କ୍ରିକେଟ ପ୍ରତି ଆଦର ନିମନ୍ତେ ବିଶ୍ୱରେ ପରିଚିତି ହାସଲ କରିଛି । ଏହା ୧୯୬୬ରେ ବ୍ରିଟେନ ନିକଟରୁ ସ୍ୱାଧୀନତା ଲାଭ କରିଥିଲା । ଶେଷରେ ମଙ୍ଗଳବାର ଦିନ ଏହା ଗଣତାନ୍ତ୍ରିକ ରାଷ୍ଟ୍ରରେ ପରିଣତ ହୋଇଛି ।