ବଙ୍ଗୋମୁଣ୍ଡା: ବଲାଙ୍ଗିର ଜିଲାର ଦାଦନ ପ୍ରବଣ ମୁରିବାହାଲ, ବଙ୍ଗୋମୁଣ୍ଡା ବ୍ଲକର ବିଭିନ୍ନ ଗ୍ରାମରେ ଘରୋଇ ଅର୍ଥ ଲଗାଣକାରୀ ସଂସ୍ଥାର ଜୁଲୁମ ବୃଦ୍ଧି ପାଉଥିବା ଅଭିଯୋଗ ହେଉଛି।ଗ୍ରାମାଞ୍ଚଳର ମହିଳାମାନଙ୍କୁ ଏସଏଚଜି ନାମରେ ବିଭିନ୍ନ ଘରୋଇ ଅର୍ଥ ଲଗାଣ ସଂସ୍ଥା ନାନା ପ୍ରକାର ପ୍ରଲୋଭନ ଦେଖାଇ ଋଣ ପ୍ରଦାନ କରି ଚଢା ଦରରେ ଟଙ୍କା ଅସୁଲି କରି ଶୋଷିତ କରୁଥିବା ବେଳେ ଲକଡାଉନ ପରିସ୍ଥିତିରେ ଘରୋଇ ଅର୍ଥ ଲଗାଣ ସଂସ୍ଥା ଗୁଡିକ ପକ୍ଷରୁ ଟଙ୍କା ଅସୁଲି ନେଇ ଜୁଲୁମ କରାଯାଉଥିବା ଅଭିଯୋଗ ହେଉଛି। ଘରୋଇ ଅର୍ଥ ଲଗାଣକାରୀ ସଂସ୍ଥାର ଜୁଲୁମ ସହିନପାରି ଜଣେ ମହିଳା କିରୋସିନି ଢାଳି ହୋଇ ଆତ୍ମହତ୍ୟା ଉଦ୍ୟମ ଭଲି ଏକ ଅଭାବନୀୟ ଘଟଣା ବଙ୍ଗୋମୁଣ୍ଡା ଥାନା ଅଞ୍ଚଳରେ ଗତ ୧୩ ତାରିଖରେ ଘଟିଯାଇଥିଲା।ବଙ୍ଗୋମୁଣ୍ଡା ଥାନା କୁଣ୍ଡାବୁଟୁଲା ପଞ୍ଚାୟତର ବାଦିଚକା ଗ୍ରାମରେ ଘରୋଇ ଅର୍ଥ ଲଗାଣକାରୀ ସଂସ୍ଥା ଗ୍ରାମୀଣ କୋଟା କଣ୍ଟାବାଞ୍ଜି ଶାଖା ର କର୍ମଚାରୀ ଟଙ୍କା ଅସୁଲି କରିବା ପାଇଁ ଗତ ୧୩ ତାରିଖ ସକାଳେ ଆସିଥିଲେ।ଲକଡାଉନ ଯୋଗୁଁ ଆର୍ଥିକ ଅବସ୍ଥା ଶୋଚନୀୟ ହୋଇପଡିଥିବାରୁ ଋଣ ଟଙ୍କା ପରିଶୋଧ କରିବାରେ ଅସୁବିଧା ହୋଇଥିଲା। ଆର ସପ୍ତାହ କୁ ଟଙ୍କା ଜମା ଦେବି ବୋଲି କହିବା ପରେ ମଧ୍ୟ ଟଙ୍କା ଦେବା ପାଇଁ ସଂପୃକ୍ତ କର୍ମଚାରୀ ବାଧ୍ୟ କରିବାରୁ ବାଦିଚକା ଗ୍ରାମର ଠଣ ସୁନ୍ଦର ତେଜୀ ଙ୍କର ସ୍ତ୍ରୀ କଲ୍ୟାଣୀ ତେଜୀ (୨୭) ଘରକୁ ଯାଇ ନିଜ ଦେହରେ କିରୋସିନି ଢାଲି ହୋଇ ଆତ୍ମହତ୍ୟା ଉଦ୍ୟମ କରିଥିଲେ। ମହିଳା ଜଣକ ଅଲ୍ପକେ ବର୍ତ୍ତିଯାଇଥିବା ବେଳେ ପରିବାର ଲୋକେ ତାଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ କଣ୍ଟାବାଞ୍ଜି ଡାକ୍ତରଖାନା କୁ ଚିକିତ୍ସା ପାଇଁ ନିଆଯାଇଥିଲା। ଗୁରୁତର ଅବସ୍ଥାରେ ବଲାଙ୍ଗିର ଏବଂ ପରେ ବୁର୍ଲା କୁ ସ୍ଥାନାନ୍ତରିତ କରାଯାଇଥିଲା।ସେଠାରୁ କିଛି ଦିନ ଚିକିତ୍ସିତ ହେବା ପରେ ଘରକୁ ଫେରିଥିଲେ।ପୁଣି ଗୁରୁତର ହେବାରୁ ଖଡିଆଳ ମିଶନ ଡାକ୍ତରଖାନା କୁ ନିଆଯାଇଥିଲା।ସେଠାରେ ଚିକିତ୍ସାଧିନ ଅବସ୍ଥାରେ ଅଗଷ୍ଟ ୧ ତାରିଖରେ ମୃତ୍ୟୁ ବରଣ କରିଥିବା ଜଣାପଡିଛି। ଘରୋଇ ଅର୍ଥଲଗାଣ କାରୀ ସଂସ୍ଥାର ଜୁଲୁମ ସହି ନପାରି ଜଣେ ମହିଳାଙ୍କ ଜୀବନ ଚାଲିଯିବା ଅଞ୍ଚଳରେ ଆଲୋଡନ ସୃଷ୍ଟି କରିଛି। ଘଟଣା ଦିନ ଟଙ୍କା ଅସୁଲି କରିବା ପାଇଁ ଆସିଥିବା କର୍ମଚାରୀଙ୍କୁ ଗାଁ ଲୋକେ ଅଟକ ରଖିଥିବା ବେଳେ ବଙ୍ଗୋମୁଣ୍ଡା ପୁଲିସ ପହଞ୍ଚି ଥାନାକୁ ଆଣିଥିଲେ। ଏ ନେଇ ପୀଡିତ ପରିବାର ପକ୍ଷରୁ ଥାନାରେ କୌଣସି ଅଭିଯୋଗ ହୋଇନଥିବା ଦର୍ଶାଇ ପୁଲିସ ସେମାନଙ୍କୁ ଛାଡିଦେଇଥିଲା। ଆତ୍ମହତ୍ୟା ଉଦ୍ୟମ କରିଥିବା ମହିଳାଙ୍କ ମୃତ୍ୟୁ ହେବା ପରେ ପୁଲିସ ପ୍ରଶାସନ ଏହି ଘଟଣାର ଗୁରୁତ୍ୱ କେତେ ଦେଉଛି ତାହା ଆଗାମୀ ଦିନରେ ଜଣାପଡିବ। ମହିଳାଙ୍କ ମୃତ୍ୟୁ ଦୁଇ ପୁଅ ମାତୃହରା ହୋଇଯାଇଛନ୍ତି। ଏଭଲି ସ୍ଥିତିରେ ଏହି ପରିବାରକୁ ସରକାରୀ ସହାୟତା ଏବଂ କ୍ଷତିପୂରଣ ପ୍ରଦାନ କରିବା ପାଇଁ ଦାବି ହେଉଛି। ଏହି ଘଟଣା ପରେ ଘରୋଇ ଅର୍ଥଲଗାଣ ସଂସ୍ଥା ଗୁଡିକର ଜୁଲୁମ ବୃଦ୍ଧି ପାଉଛି ନା ଲୋକଙ୍କ ଅସୁବିଧାକୁ ଦୃଷ୍ଟିରେ ରଖି କେତେ ଦୂର କୋହଳ ମନୋଭବା ଜାତ ଦେଉଚି ଆଗାମୀ ଦିନରେ ସଂସ୍ଥା ଗୁଡିକର ଅସଲ ରୂପ ଜଣାପଡିବ।
ଘରୋଇ ଅର୍ଥ ଲଗାଣକାରୀ ସଂସ୍ଥାର ଜୁଲୁମ ଅଭିଯୋଗ; କିରୋସିନି ଢାଳି ଆତ୍ମହତ୍ୟା ଉଦ୍ୟମ ମହିଳାଙ୍କ ମୃତ୍ୟୁ
Popular Categories
Previous article
Next article