ଆଠଗଡ଼: ଆଠଗଡ଼ ଥାନା ଅନ୍ତର୍ଗତ ଦୋରଡ ଛକ ନିକଟରେ ରବିବାର ସନ୍ଧ୍ୟାରେ ଦୁଇଟି ବାଇକ୍ ମୁହାଁମୁହିଁ ଧକ୍କା ହେବା ଫଳରେ ତିନିଜଣ ଗୁରୁତର ଆହତ ହୋଇଥିବା ଜଣାପଡିଛି। ଗୁରୁତର ଆହତଙ୍କୁ ସ୍ଥାନୀୟ ଲୋକଙ୍କ ସହାୟତାରେ ପ୍ରଥମେ ଆଠଗଡ଼ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇ ପ୍ରାଥମିକ ଚିକିତ୍ସା ବେଳେ ଅବସ୍ଥା ଗୁରୁତର ହେବାରୁ ସେମାନଙ୍କୁ କଟକ ବଡ଼ ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଛି।
ଆଠଗଡ଼ ଥାନା ଅନ୍ତର୍ଗତ ତଳଗଡ ଗ୍ରାମର ବାଦଲ ଝାଟି (୨୨) ଏବଂ ଦିପୁନା ନାଏକ (୨୧ ) ଗୋଟିଏ କୁଲର ଠିକ୍ କରି ଏକ ବାଇକରେ ଗ୍ରାମକୁ ଫେରୁଥିବା ବେଳେ ଦୋରଡ ଛକ ନିକଟରେ ଗୋଟିଏ ଅଟୋକୁ ଅତିକ୍ରମ କରୁଥିଲେ ଏବଂ ଏହି ସମୟରେ ସାମ୍ନା ପଟୁ ଆସୁଥିବା ଢେଙ୍କାନାଳ ସଦର ଥାନା ଅନ୍ତର୍ଗତ ତାଳବରକୋଟ ଗ୍ରାମର ସତ୍ୟ (୨୨)ଙ୍କ ମଟର ସାଇକେଲ ସହିତ ମୁହାଁମୁହିଁ ଧକ୍କା ହୋଇଥିଲା । ଖବର ପାଇ ଆଠଗଡ଼ ପୁଲସ ଘଟଣାସ୍ଥଳରେ ପହଞ୍ଚି ଦୁଇଟି ଯାକ ବାଇକ ଜବତ କରିଥିବା ବେଳେ ଏ ବାବଦରେ ନିଜ ଆଡୁ ଗୋଟିଏ ମାମଲା ରୁଜ୍ଜୁ କରିଥିବା ଜଣାପଡିଛି।
