ନୂଆଦିଲ୍ଲୀ : ବ୍ୟବସାୟୀ ଅନୁପମ ମିତ୍ତଲଙ୍କ ମାଟ୍ରିମୋନିଆଲ୍ ଓ୍ବେବସାଇଟ୍ ଶାଦି ଡଟ୍ କମରେ ଏକ ବିଶେଷ ସୁବିଧା ଆସିଛି । ଗତ କିଛି ଦିନ ହେବ ଏହା ଭାଇରାଲ ହେବାରେ ଲାଗିଛି । ସାମାଜିକ ଗଣମାଧ୍ୟମରେ ମଧ୍ୟ ଲୋକମାନେ ଏନେଇ ଚର୍ଚ୍ଚା କରୁଛନ୍ତି । ଏହି ନୂଆ ଫିଚରକୁ ଯୌତୁକ କାଲକୁଲେଟର ନାଁ ଦିଆଯାଇଛି । ଉପଭୋକ୍ତାଙ୍କୁ କୁହାଯାଇଛି କି ସେମାନେ ଏଥିରେ ନିଜ ତଥ୍ୟ ଦେଇ ନିଜ ଦାମ୍ ଜାଣିପାରିବେ । ଏଥିରେ କୁହାଯାଇଛି କି ସବୁ ତଥ୍ୟ ଦେଇ ଜଣାପଡିବ କି କୌଣସି ବ୍ୟକ୍ତି କନ୍ୟାପକ୍ଷରୁ କେତେ ଯୌତୁକ ନେଇପାରିବ । କିନ୍ତୁ ଏଥିରେ ତଥ୍ୟ ଭରିବା ପରେ ଫଳାଫଳ କିଛି ଅଲଗା ହିଁ ଆସୁଛି । ଏଥିରେ ଯୌତୁକ ଯୋଗୁଁ ହେଉଥିବା ମହିଳାଙ୍କ ମୃତ୍ୟୁ ସଂଖ୍ୟା ନଜର ଆସୁଛି ।
View this post on Instagram
ତଥ୍ୟରେ ଉପଭୋକ୍ତାଙ୍କୁ ଶିକ୍ଷାଗତ ଯୋଗ୍ୟତା, ଆର୍ଥିକ ସ୍ଥିତି ସମେତ ଅନେକ ଜିନିଷ ଭରିବାକୁ କୁହାଯାଉଛି । ସେଥିରେ କ୍ଲିକ୍ କରିବା ପରେ ଆକଳନ ସାମ୍ନାକୁ ଆସୁଛି । ଏହି ଫିଚର ନେଇ ଅନୁପମ ମିତ୍ତଲ ଏକ ଭିଡିଓ ସେୟାର କରିଛନ୍ତି । ଭିଡିଓରେ କ୍ୟାପ୍ସନରେ ଫିଲ୍ମ ‘ଓମ୍ ଶାନ୍ତି ଓମ୍’ର ଫେମସ ଡାଇଲଗ୍ ‘ଏକ ଚୁଟକି ସିନ୍ଦୁର କି କିମତ୍ ତୁମ କ୍ୟା ଜାନୋଗେ ରମେଶ ବାବୁ’ ଲେଖାଯାଇଛି । ଭିଡିଓରେ ମିତ୍ତଲ କହୁଛନ୍ତି କି ଆଗରୁ ଯୌତୁକ ହିସାବ କରିବା ବହୁତ ସହଜ ଥିଲା । କିନ୍ତୁ ଆଜି କାଲି ଅନେକ ସମସ୍ୟା ବଢିଯାଇଛି ।
ଯୌତୁକ ଦାବି କରୁଥିବା ଲୋକଙ୍କ ପାଇଁ ମିତ୍ତଲଙ୍କ ଏହି ଭିଡିଓ ଏକ କଟାକ୍ଷ ସଦୃଶ । ଏହି ଭିଡିଓକୁ ଏପର୍ଯ୍ୟନ୍ତ ୮.୭୮ ଲକ୍ଷ ଲୋକ ଦେଖିସାରିଲେଣି ଯଦିଓ ୨୯ ହଜାରରୁ ଅଧିକ ଲୋକ ଏହାକୁ ପସନ୍ଦ କରିଛନ୍ତି । ସାମାଜିକ ଗଣମାଧ୍ୟମରେ ଲୋକେ ଏଥିରେ ପ୍ରତିକ୍ରିୟା ରଖୁଛନ୍ତି ।
