ମହାଭାରତରେ ଶ୍ରୀକୃଷ୍ଣଙ୍କ ସ୍ବଭାବ ଦେଖି ଆମେ ଅନେକ କଥା ଶିଖିପାରିବା। ଯେପରି କେଉଁ ସମୟରେ କିପରି କଥା ହେବା, କେଉଁ ବ୍ୟକ୍ତି ସହ କିପରି କଥା ହେବା, ବ୍ୟବହାର ଓ ସହନଶୀଳ ଇତ୍ୟାଦି। ଏହିପରି କିଛି ଅମୂଲ୍ୟ ବାର୍ତ୍ତା ରହିଛି ଯାହାକୁ ଆମେ ମାନି ଚଳିବା ଦ୍ବାରା ଜୀବନରେ ଅନେକ ଆଗକୁ ସଫଳତାର ସହ ଯାଇପାରିବା। କିନ୍ତୁ କ୍ରୋଧ ହେଉଛି ମନୁଷ୍ୟର ପରମ ଶତ୍ରୁ। କ୍ରୋଧ ଦ୍ବାରା ମନୁଷ୍ୟ କ’ଣ କରିଥାଏ ତାହା ଜାଣି ପାରି ନ ଥାଏ। ଆସନ୍ତୁ ଜାଣିବା କ୍ରୋଧରୁ ମୁକ୍ତି ପାଇବା ପାଇଁ କ’ଣ କରିବା ଉଚିତ …
ବେଳେବେଳେ ଛୋଟ ଛୋଟ କଥା ପାଇଁ କ୍ରୋଧ ଆସିଥାଏ। ସେହି କ୍ରୋଧର ଅଗ୍ନିରେ ସବୁ ସମ୍ପର୍କ ଜଳି ପୋଡି ପାଉଁଶ ହୋଇଯାଇଥାଏ। ତେଣୁ କ୍ରୋଧ ପାଇଁ କୌଣସି ସମ୍ପର୍କକୁ ଭାଙ୍ଗିବାକୁ ଦିଅନ୍ତୁ ନାହିଁ।
କୌଣସି ସମ୍ପର୍କରେ ଫାଟ ସୃଷ୍ଟି ହେଲେ ତାହା ଆମ ନିଷ୍ଠା ଉପରେ ପ୍ରଶ୍ନବାଚୀ ସୃଷ୍ଟି କରିଥାଏ। ତାପରେ ସମ୍ମାନ ଉପରେ କଥା ଉଠିଥାଏ। ଯଦି ଆପଣ କାହା ଉପରେ ରାଗି ଥାଆନ୍ତି ତେବେ ତାଙ୍କ ଦୃଷ୍ଟିରେ ନିଜର ସମ୍ମାନ ହରାଇବାର ସମ୍ଭାବନା ରହିଥାଏ।
କିଛି ସାମାନ୍ୟ କଥାରେ ରାଗିବା ଦ୍ବାରା ଲୋକମାନଙ୍କର ଆମ ଉପରୁ ବିଶ୍ବାସ ଉଠି ଯାଇଥାଏ। ତାପରେ ସେମାନଙ୍କର ଆମ ପ୍ରତି ସ୍ବଭାବରେ ପରିବର୍ତ୍ତନ ଆସିଥାଏ।
କ୍ରୋଧରୁ ମୁକ୍ତି ପାଇବାର ଉପାୟ :
ଯେକୌଣସି ପରିସ୍ଥିତି ହେଉ ନା କାହିଁକି ସବୁବେଳେ ହସ ହସ ମୁହଁରେ ରହିବା ଉଚିତ।
ଯେକୌଣସି କଥା ହେଉ ନା କାହିଁକି ହଠାତ ରାଗି ନ ଯାଇ ତାଉପରେ ଗଭୀର ଭାବେ ଚିନ୍ତା କରିବା ଉଚିତ।
କେବେ ବି କୌଣସି କାରଣ ପାଇଁ କ୍ଷଣିକ ଆବେଗ ହୋଇ ପ୍ରତିକ୍ରିୟା ରଖନ୍ତୁ ନାହିଁ। ଏହାଦ୍ବାରା ଅସୁବିଧାର ସମ୍ମୁଖୀନ ହେବାକୁ ପଡିଥାଏ।
ସବୁ ପରିସ୍ଥିତିକୁ ଗମ୍ଭୀରତାର ସହ ଦେଖନ୍ତୁ। ତାପରେ ଯାଇ ଯେକୌଣସି ପଦକ୍ଷେପ ନିଅନ୍ତୁ।
ପ୍ରତିଦିନ ଯୋଗ କରନ୍ତୁ। ଏହାସହ ହସିବାର ଅଭ୍ୟାସ ମଧ୍ୟ କରନ୍ତୁ। ଏହି ଦୁଇଟି ଅଭ୍ୟାସ ଆପଣଙ୍କ ବ୍ୟକ୍ତିତ୍ବରେ ସକାରାତ୍ମକ ପରିବର୍ତ୍ତନ ଆଣିବାରେ ସହାୟକ ହେବ।
