ଶ୍ରୀନଗର : ଚଳିତବର୍ଷ ଜାମ୍ମୁ କାଶ୍ମୀରରେ ଅମରନାଥ ତୀର୍ଥଯାତ୍ରୀଙ୍କ ସଂଖ୍ୟା ଯଥେଷ୍ଟ ବୃଦ୍ଧି ପାଇଛି । ଶନିବାର ଯାତ୍ରାର ୨୮ ଦିନରେ ପ୍ରାୟ ୩.୭୫ ଲକ୍ଷରୁ ଅଧିକ ଶ୍ରଦ୍ଧାଳୁ ବରଫ ଶିବଲିଙ୍ଗକୁ ଦର୍ଶନ କରିଛନ୍ତି । ଯାହାକି ଦୀର୍ଘ ୧୧ ବର୍ଷର ରେକର୍ଡ ଭଙ୍ଗ କରିଛି । ଆଗକୁ ଏହି ସଂଖ୍ୟା ଯଥେଷ୍ଟ ବୃଦ୍ଧି ପାଇବ ବୋଲି ଆଶା କରାଯାଉଛି।
ଜାମ୍ମୁ କାଶ୍ମୀରରେ କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ଆଜି ଭଗବତୀନଗର ଯାତ୍ରୀ ନିବାସରୁ ୨୦୦୦ ତୀର୍ଥଯାତ୍ରୀ ପବିତ୍ର ଅମରନାଥ ଗୁମ୍ଫା ଅଭିମୁଖେ ଯାତ୍ରା କରିଛନ୍ତି । ଚଳିତବର୍ଷର ୨୭ତମ ବ୍ୟାଚ୍ର ଏହି ତୀର୍ଥଯାତ୍ରୀ ଶନିବାର ସକାଳୁ ମୂଳ ଶିବିର ବଲତାଲ ଓ ପହଲଗାମ୍ ଅଭିମୁଖେ ଯାତ୍ରା କରିଛନ୍ତି ।
ସୂଚନାଯୋଗ୍ୟ ୨୦୧୪ରେ ୩.୭୦ଲକ୍ଷ, ୨୦୧୨ରେ ୬.୨୦ ଲକ୍ଷ ଏବଂ ୨୦୧୧ରେ ୬.୩୫ ଲକ୍ଷ ତୀର୍ଥଯାତ୍ରୀ ବରଫ ଶିବଲିଙ୍ଗ ଦର୍ଶନ କରିଥିଲେ।
୨୦୫୦ ତୀର୍ଥଯାତ୍ରୀ ଭଗବତୀନଗର ମୂଳ ଶିବିର ଛାଡ଼ିଛନ୍ତି । ସୂଚନାଯୋଗ୍ୟ ୩ ହଜାର ୮୮୮ ମିଟର ଉଚ୍ଚତାରେ ଥିବା ଏହି ପବିତ୍ର ଗୁମ୍ଫା ଯାତ୍ରା ପାଇଁ ତୀର୍ଥଯାତ୍ରୀମାନେ ୬୨ ଦିନର ଯାତ୍ରା କରିଥାନ୍ତି । ଏହି ଯାତ୍ରା ଜୁଲାଇ ୧ ତାରିଖରୁ ଆରମ୍ଭ ହୋଇଛି ଏବଂ ଏହା ଅଗଷ୍ଟ ୩୧ ତାରିଖ ଶ୍ରାବଣ ପୂର୍ଣ୍ଣିମା ତଥା ରକ୍ଷାବନ୍ଧନ ପର୍ବ ଦିନ ଶେଷ ହେବ ।
