ପାଟଣା : କେନ୍ଦୁଝର ଜିଲ୍ଲାର ପାଟଣା, ସାହାରପଡା ଘଟଗାଁ ବ୍ଳକ ଅଞ୍ଚଳରେ ରବିବାର ସରକାରୀ ସ୍ତରରେ କୃଷି ବିଭାଗ ପକ୍ଷରୁ ଅକ୍ଷୟ ତୃତୀୟାର ଅକ୍ଷୀମୁଠୀ ଅନୁକୂଳ କାର୍ଯ୍ୟକ୍ରମ କରୋନା କଟକଣା ଯୋଗୁ ସ୍ଥଗିତ ଥିବା ବେଳେ କେତେକ ଗ୍ରାମରେ ଚାଷୀମାନେ ନିଜ ନିଜ ଚାଷ ଜମିରେ ଅକ୍ଷୀମୁଠୀ ଅନୁକୂଳ କରିଛନ୍ତି । କାନ୍ଧରେ ଅକ୍ଷୀମୁଠି ଓ ହାତରେ ପାଣିଢାଳ ଧରି ଗୃହକର୍ତ୍ତା ବିଲକୁ ଯାଇ ପୂଜାର୍ଚ୍ଚନା କରି ଅକ୍ଷୀମୁଠି ଶସ୍ୟ ବୁଣିବା ପରେ ବଳଦ ସାହାଯ୍ୟରେ ହଳ କରି ବିଧି ରକ୍ଷା କରିଛନ୍ତି । ଚାଷ ପାଇଁ ଏହି ପବିତ୍ର ଦିବସକୁ ଅଣଦେଖା କଲେ ଅମଙ୍ଗଳ ହୁଏ ଓ ବିଲରେ ସୁନା ଫଳେ ନାହିଁ ବୋଲି ପୁରୁଖା ଲୋକମାନଙ୍କ ମୁହଁରୁ ଶୁଣି ଥିବାରୁ ହଳବଳଦ ନେଇ ଲୋକେ ଅକ୍ଷୀମୁଠୀ ଅନୁକୂଳ କରିବା ଘଟଣାକୁ ସ୍ଵାଗତ କରାଯାଇଛି । ପାଟଣା ବ୍ଲକ୍ ଅନ୍ତର୍ଗତ ଚିନାମାଳିପଶି ଗ୍ରାମରେ ଅକ୍ଷୀମୁଠି ଅନୁକୂଳ କରିବାପାଇଁ ଅଗ୍ରଣୀ ଚାଷୀ ରାମ ଚନ୍ଦ୍ର ନାୟକ ଆଜି ସସ୍ତ୍ରିକ ବିଲ କୁ ଯାଇ ଅକ୍ଷୀମୁଠି ଅନୁକୂଳ କରିଥିବା ଦେଖାଯାଇଥିଲା ।
Comments are closed.