ଗଞ୍ଜାମ/ଜଗତସିଂହପୁର: ଗଞ୍ଜାମ ଜିଲାର ଆସିକା ଏବଂ ଜଗତ୍ସିଂହପୁର ଜିଲାର କୁଜଙ୍ଗରେ ରବିବାର ରାତିରେ ୨ଟି ପୃଥକ ଏନକାଉଣ୍ଟର ଘଟିଛି। ଆସିକା ପୁଲିସ ଏନକାଉଣ୍ଟରରେ ଦୁର୍ଦ୍ଦାନ୍ତ ଅପରାଧୀ ଗୁରୁପ୍ରସାଦ ସ୍ବାଇଁ ଆହତ ହୋଇଥିବାବେଳେ କୁଜଙ୍ଗ ପୁଲିସ ଗୁଳିରେ ବିକ୍ରମ ପାଲ୍ ଓରଫ ଡନ୍ ଗୁରୁତର ଆହତ ହୋଇଛନ୍ତି।
ସୂଚନା ମୁତାବକ, ଆସିକା ପୁଲିସ ଏନକାଉଣ୍ଟରରେ ଆହତ ଗୁରୁପ୍ରସାଦ ନାଁରେ ହତ୍ୟା ଏବଂ ଡକାୟତି ଭଳି ୧୩ଟି ମାମଲା ରହିଛି। ସେ ଓ ତାର ସହଯୋଗୀ ଆସିକାର ଚାରିମାଇଲ ନିକଟରେ ଥିବା ସୂଚନା ପାଇ ଆସିକା ପୁଲିସ ଚଢ଼ାଉ କରିଥିଲା। ପୁଲିସକୁ ଦେଖି ଗୁରୁପ୍ରସାଦ ଓ ତାର ସହଯୋଗୀ ଗୁଳି ଚଳାଇଥିଲେ। ପୁଲିସ ପକ୍ଷରୁ ପାଲଟା ଗୁଳିମାଡ଼ କରାଯିବାରୁ ଗୁରୁପ୍ରସାଦ ଆହତ ହୋଇଥିଲା। ତା’ର ବାମ ଗୋଡ଼ରେ ଗୁଳି ବାଜିଛି। ତା’ର ସହଯୋଗୀ ଫେରାର ହୋଇଯାଇଥିବା ଜଣାପଡ଼ିଛି। ଗୁରୁତର ଅବସ୍ଥାରେ ଗୁରୁପ୍ରସାଦକୁ ବ୍ରହ୍ମପୁର ବଡ଼ ମେଡିକାଲରେ ଭର୍ତ୍ତି କରାଯାଇଛି। ଗୁରୁପ୍ରସାଦ ନିକଟରୁ ଗୋଟିଏ ବନ୍ଧୁକ ଏବଂ ୨ ରାଉଣ୍ଡ ଗୁଳି ଜବତ ହୋଇଛି। ଅନ୍ୟପଟେ ଅପରାଧୀଙ୍କ ଗୁଳିମାଡ଼ରେ ୨ଜଣ ପୁଲିସ କର୍ମଚାରୀ ମଧ୍ୟ ଆହତ ହୋଇଛନ୍ତି।
ସେହିପରି କୁଜଙ୍ଗର କଙ୍କରଡ଼ିଆ ରାସ୍ତାରେ ପୁଲିସ ଏବଂ ଅପରାଧୀ ମୁହାଁମୁହିଁ ହୋଇଛନ୍ତି। ଅପରାଧୀ ପୁଲିସ ଉପରକୁ ଗୁଳି ଚଳାଇବାରୁ ପୁଲିସ ମଧ୍ୟ ପାଲଟା ଗୁଳିମାଡ଼ କରିଥିଲା। ଏଥିରେ ଅପରାଧୀ ବିକ୍ରମ ପାଲ୍ ଓରଫ ଡନ୍ ଆହତ ହୋଇଥିଲା। ବିକ୍ରମର ୨ ଗୋଡ଼ରେ ଗୁଳି ବାଜିଛି। ତା’କୁ ଗୁରୁତର ଅବସ୍ଥାରେ କଟକ ଏସସିବି ମେଡିକାଲକୁ ସ୍ଥାନାନ୍ତର କରାଯାଇଛି। ବିକ୍ରମ ସହିତ ମୁହାଁମୁହିଁ ବେଳେ ଜଣେ ପୁଲିସ ଏସଆଇ ଆହତ ହୋଇଛନ୍ତି। ବିକ୍ରମ ନାଁରେ ଏକାଧିକ ଆପରାଧିକ ମାମଲା ରହିଥିବା ପୁଲିସ ପକ୍ଷରୁ ସୂଚନା ମିଳିଛି।
Comments are closed.