ନୂଆଦିଲ୍ଲୀ: ଲୋକସଭା ନିର୍ବାଚନରେ ପରାଜିତ ହେବା ପରେ କଂଗ୍ରେସର ସମସ୍ୟା ଥମିବାର ନାଁ ନେଉନାହିଁ। ନିର୍ବାଚନର ଠିକ୍ ପରେ ପରେ ଦଳର ଅଧ୍ୟକ୍ଷ ପଦରୁ ରାହୁଲ ଗାନ୍ଧୀ ଇସ୍ତଫା ଦେଇଛନ୍ତି। ଏହା ପରେ ଜୁଲାଇରେ କଂଗ୍ରେସକୁ ୨ଟି ବଡ଼ ଝଟ୍କା ଲାଗିଛି। କର୍ଣ୍ଣାଟକରେ କଂଗ୍ରେସ-ଜେଡିଏସ ମେଣ୍ଟରୁ ୧୫ ବିଦ୍ରୋହୀ ବିଧାୟକ ଇସ୍ତଫା ଦେବା ପରେ ସେଠାରେ ସରକାର ଭାଙ୍ଗିଯାଇଛି। ସେହିପରି ଗୋଆରେ ବି କଂଗ୍ରେସର ୧୫ ବିଧାୟକଙ୍କ ମଧ୍ୟରୁ ୧୦ ଜଣ ବିଜେପିରେ ସାମିଲ ହୋଇଛନ୍ତି। ଦଳ ସଙ୍କଟଜନକ ପରିସ୍ଥିତି ଦେଇ ଗତି କରୁଥିବାବେଳେ ରାହୁଲଙ୍କୁ ଦେଖା ମିଳୁନାହିଁ। କିନ୍ତୁ ଏପରି ଘଡ଼ିସନ୍ଧି ମୁହୂର୍ତ୍ତରେ ଯଦି କୌଣସି କଂଗ୍ରେସ ନେତା ସାହସ ଦେଖାଇଛନ୍ତି, ତେବେ ସେ ହେଉଛନ୍ତି ରାହୁଲଙ୍କ ଭଉଣୀ ପ୍ରିୟଙ୍କା ଗାନ୍ଧୀ ଭଦ୍ରା। ଲୋକସଭା ନିର୍ବାଚନରେ ପରାଜୟ ପରେ ପ୍ରିୟଙ୍କା ରାଜନୀତିରେ ଅଧିକ ସକ୍ରିୟ ହୋଇପଡ଼ିଛନ୍ତି। ବର୍ତ୍ତମାନ ସେ ନିଜ କଥାକୁ ଅଧିକ ତୀକ୍ଷ୍ଣ ଏବଂ ଶାଣିତ ଢଙ୍ଗରେ ଉପସ୍ଥାପନ କରୁଛନ୍ତି। ନିର୍ବାଚନୀ ସଭା ହେଉ କି ସୋସିଆଲ ମିଡିଆ, ସେ ବିରୋଧୀଙ୍କୁ କଡ଼ା ଶବ୍ଦରେ ଟାର୍ଗେଟ କରୁଛନ୍ତି। ସୋସିଆଲ ମିଡିଆ ଉପରେ ନଜର ଦେଲେ, ପ୍ରିୟଙ୍କା ନିଜ ଭାଇ ରାହୁଲଙ୍କଠାରୁ ବି ଆଗରେ ରହିଛନ୍ତି।
ଇଣ୍ଡିଆ ଟୁଡେର ଡାଟା ଇଣ୍ଟେଲିଜେନ୍ସ ୟୁନିଟ ଗତ ମାର୍ଚ୍ଚ ୧ରୁ ୨୦ ଜୁଲାଇ ପର୍ଯ୍ୟନ୍ତ ରାହୁଲ ଏବଂ ପ୍ରିୟଙ୍କାଙ୍କ ଟ୍ବିଟର ତଥ୍ୟ ବିଶ୍ଳେଷଣ କରିଛି। ସେଥିରୁ ଜଣାପଡ଼ିଛି ଯେ, ପ୍ରିୟଙ୍କା ସୋସିଆଲ ମିଡିଆ ପ୍ଲାଟଫର୍ମରେ ଅଧିକ ସକ୍ରିୟ ହୋଇଛନ୍ତି। କିନ୍ତୁ ରାହୁଲ ପୂର୍ବ ତୁଳନାରେ କମ୍ ସକ୍ରିୟ ରହିଛନ୍ତି।
ତଥ୍ୟ ଅନୁସାରେ, ପ୍ରିୟଙ୍କା ଗାନ୍ଧୀ ନିର୍ବାଚନର ଠିକ ପୂର୍ବରୁ ଫେବୃୟାରୀରେ ଟ୍ବିଟର ଆକାଉଣ୍ଟ ଖୋଲିଥିଲେ। ସେ ମାର୍ଚ୍ଚରେ ପ୍ରଥମ ଟ୍ବିଟ୍ କରିଥିଲେ। ମାର୍ଚ୍ଚରେ ସେ ମୋଟ ୧୮ଟି ଟ୍ବିଟ୍ ପୋଷ୍ଟ କରିଥିଲେ। ଏପ୍ରିଲରେ ୧୬ଥର ଏବଂ ମେ ମାସରେ ୮ ଥର ଟ୍ବିଟ୍ କରିଛନ୍ତି। ଲୋକସଭା ନିର୍ବାଚନ ଶେଷ ହେବା ପରେ ସେ ପୁଣି ଥରେ ସକ୍ରିୟ ହୋଇଥିଲେ ଏବଂ ଜୁନରେ ୧୮ ଥର ଟ୍ବିଟ୍ କରିଥିଲେ। ୨୦ ଜୁଲାଇ ମଧ୍ୟରେ ସେ ୩୮ଟି ଟ୍ବିଟ୍ କରିଛନ୍ତି। ଅନ୍ୟପଟେ ରାହୁଲ ମାର୍ଚ୍ଚରେ ୪୭ ଟ୍ବିଟ୍ କରିଥିବାବେଳେ ଏପ୍ରିଲରେ ୫୪ ଟ୍ବିଟ୍ କରିଥିଲେ। କିନ୍ତୁ ଏହାପରଠାରୁ ତାଙ୍କର ଟ୍ବିଟ୍ ସଂଖ୍ୟା କମି କମି ଯାଇଛି। ମେ ମାସରେ ସେ ୪୫ ଥର ଟ୍ବିଟ୍ କରିଥିଲାବେଳେ ଜୁନରେ ୨୪ ଏବଂ ୨୦ ଜୁଲାଇ ମଧ୍ୟରେ ୧୨ ଥର ଟ୍ବିଟ୍ କରିଛନ୍ତି।
ତେବେ ନିଜ ଟ୍ବିଟ୍ ମାଧ୍ୟମରେ ପ୍ରିୟଙ୍କା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ବିରୋଧରେ ନିଜ ସ୍ବରକୁ ଅଧିକ ଶାଣିତ ଏବଂ ଆକମଣାତ୍ମକ ଢଙ୍ଗରେ ଉପସ୍ଥାପନ କରିଛନ୍ତି, ଯାହା ରାହୁଲଙ୍କ ତୁଳନାରେ ବେଶ୍ ଅଧିକ।
