ନୂଆଦିଲ୍ଲୀ : କେନ୍ଦ୍ର ସରକାରୀ କର୍ମଚାରୀ ଅଧିକ ଶିକ୍ଷାଗତ ଯୋଗ୍ୟତା ହାସଲ କଲେ ସେମାନଙ୍କୁ ସେହି ପରିମାଣରେ ଅଧିକ ପ୍ରୋତ୍ସାହନ ରାଶି ମିଳିବ। ଏହି ରାଶିର ପରିମାଣ ୧୦ ହଜାରରୁ ୩୦ ହଜାର ଟଙ୍କା ପର୍ଯ୍ୟନ୍ତ ହେବ ବୋଲି ସୋମବାର ସରକାରୀ ଭାବେ କୁହାଯାଇଛି। ସମ୍ପୃକ୍ତ କର୍ମଚାରୀଙ୍କୁ ଏକକାଳୀନ ପ୍ରାୟ ୫ଗୁଣ ଅଧିକ ପ୍ରୋତ୍ସାହନ ରାଶି ପ୍ରଦାନ ସଂକ୍ରାନ୍ତ ପ୍ରସ୍ତାବକୁ ସରକାର ଅନୁମୋଦନ ଦେଇଛନ୍ତି। ପିଏଚ୍ଡି ଭଳି ଯୋଗ୍ୟତା ହାସଲ କ୍ଷେତ୍ରରେ ଏଭଳି ପ୍ରୋତ୍ସାହନ ବ୍ୟବସ୍ଥା କାର୍ଯ୍ୟକାରୀ କରାଯାଇଛି। ଦୀର୍ଘ ଦୁଇ ଦଶନ୍ଧି ପରେ ସରକାର ଏ ସମ୍ପର୍କିତ ନିୟମକାନୁନ୍କୁ ସଂଶୋଧନ କରିଛନ୍ତି। ଏ ନେଇ ସ୍ବତନ୍ତ୍ର ମାର୍ଗଦର୍ଶିକା ମଧ୍ୟ ଜାରି ହୋଇଛି। ପୂର୍ବରୁ ଏହି ରାଶିର ପରିମାଣ ମାତ୍ର ୨ହଜାରରୁ ୧୦ହଜାର ଟଙ୍କା ଥିଲା। ସରକାରୀ ଚାକିରିରେ ଯୋଗଦେବା ପରେ ୩ବର୍ଷ ବା କମ୍ ସମୟ ମଧ୍ୟରେ କୌଣସି କର୍ମଚାରୀ ଡିଗ୍ରୀ କିମ୍ବା ଡିପ୍ଲୋମା ଡିଗ୍ରୀ ହାସଲ କଲେ ତାଙ୍କୁ ୧୦ ହଜାର ଟଙ୍କା ମିଳିବ। ସେହିଭଳି ତିନି ବର୍ଷରୁ ଅଧିକ ସମୟ ନେଇ ଉକ୍ତ ଡିଗ୍ରୀ ହାସଲ କଲେ ୧୫ହଜାର ଟଙ୍କା ମିଳିବ। ବର୍ଷକ ମଧ୍ୟରେ ସ୍ନାତକୋତ୍ତର (ପିଜି) ବା ଡିପ୍ଲୋମା ଶେଷ କଲେ ୨୦ହଜାର ଓ ଏହାଠାରୁ ଅଧିକ ସମୟ ନେଲେ ୨୫ହଜାର ଟଙ୍କା ମିଳିବ। ପିଏଚ୍ଡି ଡିଗ୍ରୀ ହାସଲ କଲେ ସର୍ବାଧିକ ୩୦ହଜାର ଟଙ୍କା ମିଳିବ ବୋଲି ବିଜ୍ଞପ୍ତିରେ କୁହାଯାଇଛି। କୌଣସି କର୍ମଚାରୀ ସର୍ବାଧିକ ଦୁଇଥର ପାଇଁ ଏହି ସୁବିଧା ହାସଲ କରିପାରିବେ। କେନ୍ଦ୍ର ସରକାରଙ୍କ ଅଧୀନରେ ସମ୍ପ୍ରତି ସାରା ଦେଶରେ ୪୮ଲକ୍ଷ ୪୧ହଜାର କର୍ମଚାରୀ ଅଛନ୍ତି। ଉପରୋକ୍ତ ବ୍ୟବସ୍ଥା ସେମାନଙ୍କ କାର୍ଯ୍ୟଦକ୍ଷତା ବୃଦ୍ଧି ପାଇବ ବୋଲି ଏଥିରେ କୁହାଯାଇଛି।
Popular Categories
Previous article
Next article