କଟକ: କଟକ ମାଲଗୋଦାମ ଅଞ୍ଚଳରେ ଜଣେ ବ୍ୟବସାୟୀଙ୍କୁ ଛୁରାମାଡ଼ ଘଟଣାରେ ସମ୍ପୃକ୍ତ ଅଭିଯୁକ୍ତ ମନୋଜ ସ୍ବାଇଁ ଓରଫ ମୁନୁଙ୍କୁ ପୁଲିସ ଏନକାଉଣ୍ଟର କରିଛି। ତା’ ବାମ ଗୋଡ଼ରେ ଗୁଳି ବାଜିଥିବାବେଳେ ଚିକିତ୍ସା ପାଇଁ ତା’କୁ ଏସସିବି ମେଡିକାଲରେ ଭର୍ତ୍ତି କରାଯାଇଛି। ମନୋଜର ଘର ଜଗତସିଂହପୁର ଜିଲାର ଏରସମା ଅଞ୍ଚଳରେ। ଅନ୍ୟପଟେ ମନୋଜ ପୁଲିସ ଉପରକୁ ବୋମା ଫିଙ୍ଗିବାରୁ ଆଇଆଇସି ରବିନାରାୟଣ ଭଞ୍ଜଙ୍କ ସମେତ ୩ ପୁଲିସ ଆହତ ହୋଇଛନ୍ତି।
ଶନିବାର ରାତିରେ ମାଲଗୋଦାମ ଅଞ୍ଚଳର ଜଣେ ବ୍ୟବସାୟୀଙ୍କୁ କେତେଜଣ ଦୁର୍ବୃତ୍ତ ଆକ୍ରମଣ କରିଥିଲେ। ପୁଲିସ ଅଭିଯୁକ୍ତମାନଙ୍କୁ ଧରିବା ପାଇଁ ଚଢ଼ାଉ ଜାରି ରଖିଥିଲା। ସୋମବାର ବିଳମ୍ବିତ ରାତିରେ ମନୋଜର ପତ୍ତା ମିଳିଥିଲା। ମନୋଜ ଜୋବ୍ରା ଅଞ୍ଚଳରେ ଥିବା ସୂଚନା ପାଇ ଚଢ଼ାଉ କରିଥିଲା। ପୁଲିସ ତା’କୁ ଧରିବାକୁ ଉଦ୍ୟମ କରିବା ସମୟରେ ମନୋଜ ପୁଲିସ ଉପରକୁ ଗୁଳି ଚଳାଇଥିଲା। ଫଳରେ ପୁଲିସ ପାଲଟା ଗୁଳିମାଡ଼ କରିଥିଲା। ମନୋଜଙ୍କ ବାମ ଗୋଡ଼ରେ ଗୋଟିଏ ଗୁଳିବାଜିବା ପରେ ସେ ତଳେ ପଡ଼ିଯାଇଥିଲା। ତେବେ ଏନକାଉଣ୍ଟର ସମୟରେ ମନୋଜ ପୁଲିସ ଉପରକୁ ବୋମାମାଡ଼ କରିଥିଲା। ଫଳରେ ଆଇଆଇସିଙ୍କ ସମେତ ୩ ପୁଲିସ କର୍ମଚାରୀ ଆହତ ହୋଇଥିଲେ। ମନୋଜଠାରୁ ୩ଟି ବୋମା ଜବତ କରାଯାଇଛି।
