ନୂଆଦିଲ୍ଲୀ: ଶୁକ୍ରବାର ରାତିରେ ଅଟାରୀ-ୱାଘା ସୀମା ଦେଇ ଭାରତୀୟ ବାୟୁସେନାର ୱିଙ୍ଗ କମାଣ୍ଡର ଅଭିନନ୍ଦନ ବର୍ଦ୍ଧମାନ ସ୍ବଦେଶ ଫେରିଛନ୍ତି। ବର୍ତ୍ତମାନ ତାଙ୍କର ବିଭିନ୍ନ ଚିକିତ୍ସା ଯାଞ୍ଚ ଚାଲିଛି। ଶନିବାର ସେ ନିଜ ପରିବାର ସଦସ୍ୟ ଏବଂ ଭାରତୀୟ ବାୟୁସେନାର କେତେଜଣ ବରିଷ୍ଠ ଅଧିକାରୀଙ୍କୁ ଭେଟିଥିଲେ। ଏହି ଅବସରରେ କିଛି ଗୁରୁତ୍ଵପୂର୍ଣ୍ଣ ତଥ୍ୟ ପଦାକୁ ଆସିଛି। ପାକିସ୍ତାନରେ ତାଙ୍କୁ ପ୍ରବଳ ମାନସିକ ନିର୍ଯାତନା ଦିଆଯାଇଥିବା ଅଭିନନ୍ଦନ କହିଛନ୍ତି।
ଅମର ଉଜାଲାରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଅଭିନନ୍ଦନ ବାୟୁସେନା ଅଧିକାରୀଙ୍କୁ ଭେଟିବା ଅବସରରେ କହିଛନ୍ତି ଯେ ତାଙ୍କୁ ପାକିସ୍ତାନୀ ଗୁଇନ୍ଦା ସଂସ୍ଥା ଆଇଏସଆଇ ହେପାଜତରେ ରଖାଯାଇଥିଲା। ଆଇଏସଆଇ ଅଧିକାରୀମାନେ ତାଙ୍କୁ କୌଣସି ଶାରିରୀକ ନିର୍ଯାତନା ଦେଇ ନ ଥିଲେ ମଧ୍ୟ ମାନସିକ ସ୍ତରରେ ତାଙ୍କୁ ଅତ୍ୟନ୍ତ ଦୁର୍ବଳ କରିବାକୁ ସମସ୍ତ ପ୍ରକାର ପ୍ରୟାସ କରାଯାଇଥିଲା।
ତାଙ୍କୁ ଭାରତ ପଠାଯିବାକୁ ହୋଇଥିବା ବିଳମ୍ବ ପଛରେ ମଧ୍ୟ ଆଇଏସଆଇର ଚକ୍ରାନ୍ତ ରହିଥିଲା। ଏହା ଜରିଆରେ ତାଙ୍କୁ ଏକ ପ୍ରକାର ମାନସିକ ଆଘାତ ମିଳୁଥିଲା। ଏହି ସମୟରେ ତାଙ୍କର ଏକ ଭିଡିଓ ପ୍ରସ୍ତୁତ କରାଯାଇ ବୟାନ ରେକର୍ଡ କରାଯାଇଥିଲା। ସେଥିରେ ତାଙ୍କୁ ପାକିସ୍ତାନ ସେନାର ପ୍ରଶଂସା କରିବା ସହ ଭାରତୀୟ ଗଣମାଧ୍ୟମକୁ ସମାଲୋଚନା କରିବାକୁ ଚାପ ପକାଯାଇଥିଲା।
ସୂତ୍ର ଅନୁସାରେ ଅଭିନନ୍ଦନଙ୍କୁ ଏବେ ଅଧିକ ଚିକିତ୍ସା ଆବଶ୍ୟକ ରହିଛି। କାରଣ ସେ ବିମାନରୁ ଡେଇଁପଡ଼ିଥିବାରୁ ତାଙ୍କ ଶରୀରରେ ଆଘାତ ଲାଗିଛି। ସ୍ଥାନୀୟ ଲୋକମାନେ ମଧ୍ୟ ତାଙ୍କୁ ମାରପିଟ କରିଛନ୍ତି। ଯଦିଓ ଶରୀରରେ କୌଣସି ଗମ୍ଭୀର ଆଘାତ ଲାଗିନାହିଁ, ତେବେ ସେ ବର୍ତ୍ତମାନ ବିମାନ ଉଡ଼ାଣ କରିପାରିବେ କି ନାହିଁ ତାହା ଡାକ୍ତର ହିଁ କହିପାରିବେ।
