ସମାଜ ଡିଜିଟାଲ ଡେସ୍କ: ରାଜଧାନୀ ଭୁବନେଶ୍ଵରରୁ ଦୁଇ ଜଣ ଠକଙ୍କୁ ଗିରଫ କରିଛି କମିଶନରେଟ ପୁଲିସ। ସେମାନେ ହେଲେ ରିଙ୍କୁ ସାଇନି ଏବଂ ମନିନ୍ଦର ସିଂହ। ଉଭୟଙ୍କ ଘର ହରିୟାଣାରେ। ଭୁବନେଶ୍ଵରର ମୈତ୍ରୀବିହାର ଅଞ୍ଚଳରୁ ସେମାନଙ୍କୁ ଗିରଫ କରାଯାଇଛି।
ରିଙ୍କୁ ନିଜକୁ ସାମାଜିକ ନ୍ୟାୟ ଏବଂ ମହିଳା ସଶକ୍ତୀକରଣ ଆୟୋଗଙ୍କ ପରିଚୟ ଦେଇ ଲୋକଙ୍କୁ ଠକୁଥିଲେ। ମନିନ୍ଦର ନିଜକୁ ରିଙ୍କୁଙ୍କ ବ୍ୟକ୍ତିଗତ ସହାୟକ ପରିଚୟ ଦେଇ ଠକେଇରେ ସାମିଲ ଥିଲେ। ଏପରି କି ସ୍ଵରାଷ୍ଟ୍ର ମନ୍ତ୍ରଣାଳୟରେ କମିଶନ ଭାବେ କାର୍ଯ୍ୟ କରୁଥିବା ନେଇ ନକଲି ପରିଚୟ ପତ୍ର ପ୍ରସ୍ତୁତ କରିଥିଲେ। କମିଶନରେଟ ପୁଲିସ ଏ ନେଇ ମନ୍ତ୍ରଣାଳୟ ସହ ଯୋଗାଯୋଗ କରିବା ପରେ ସତ୍ୟାସତ୍ୟ ପଦାକୁ ଆସିଥିଲା। ଏହା ସହିତ ହରିୟାଣା ପୁଲିସ ସହିତ ମଧ୍ୟ ଯୋଗାଯୋଗ କରାଯାଇଥିଲା ବୋଲି ପୁଲିସ କମିଶସନର ଗଣମାଧ୍ୟମକୁ ସୂଚନା ଦେଇଛନ୍ତି। ଯଦି କୌଣସି ବ୍ୟକ୍ତି ଏମାନଙ୍କ ଦ୍ଵାରା ଠକାମୀର ଶିକାର ହୋଇଛନ୍ତି, ତେବେ ସେମାନେ ଥାନାରେ ଜଣାଇବାକୁ କମିଶନର କହିଛନ୍ତି।
