ଜି. ଉଦୟଗିରି: ଉତ୍ତର ଘୁମୁସର ବନଖଣ୍ଡରୁ ପଳାଇ ଆସିଥିବା ଗୋଠାଛଡା ରକ୍ତମୁଖା ଦନ୍ତା ଜି.ଉଦୟଗିରି ବନାଞ୍ଚଳରେ ମାସାଧିକ କାଳ ଧରି ଉପଦ୍ରବ ଚଳାଇଛି। ଏହି ହାତୀ ଦୁଇ ଜଣଙ୍କୁ ଦଳି ମାରିବା ସହିତ ୬ରୁ ଅଧିକ ଗୋରୁଙ୍କୁ ବି ମାରିଛି। ତା’ ସହିତ ଅନେକ ଲୋକଙ୍କ ଘର ଭାଙ୍ଗିବା ସହ ଫସଲ ନଷ୍ଟ କରିଛି। ହାତୀ ଉପଦ୍ରବରେ ଅତିଷ୍ଠ ଅଞ୍ଚଳବାସୀ ମଙ୍ଗଳବାର ଜି. ଉଦୟଗିରି ବନ୍ଦ ଡାକରା ଦେଇଛନ୍ତି। ହାତୀକୁ କାବୁ କରି ଅନ୍ୟତ୍ର ସ୍ଥାନାନ୍ତର କରିବା ଦାବିରେ ଅଞ୍ଚଳବାସୀ ୧୨ ଘଣ୍ଟିଆ ବନ୍ଦ ପାଳନ କରୁଛନ୍ତି।
ସୂଚନାଯୋଗ୍ୟ, ଏହି ଗୋଠଛଡ଼ା ଦନ୍ତା ସୋମବାର ପୁଣି ଥରେ ଜି. ଉଦୟଗିରି ଅଞ୍ଚଳକୁ ଫେରି ଉପଦ୍ରବ କରିଥିଲା। ଦିବାଗୁଦା ଅଞ୍ଚଳରେ ହାତୀଟି ସୁରୁସୁ ପ୍ରଧାନଙ୍କ ୨ଟି ବଳଦକୁ କଚାଡ଼ି ମାରିଦେଇଥିଲା। ତାଙ୍କ ଗୁହାଳ ମଧ୍ୟ ଭାଙ୍ଗି ଦେଇଥିଲା। ଖବରପାଇ ବନ ବିଭାଗ କର୍ମଚାରୀ ପହଞ୍ଚି କିଛି ଗାଈଙ୍କୁ ଉଦ୍ଧାର କରିଥିଲେ।
ଗତ ଜୁଲାଇ ୨୬ରେ ଜି. ଉଦୟଗିରି ସେକ୍ସନ ଅଞ୍ଚଳରେ ହାତୀଟି ସାମନ୍ତ ଦିଗାଲ ନାମକ ବ୍ୟକ୍ତିଙ୍କୁ କଚାଡ଼ି ମାରିଥିଲା। ଏହାର ଦିନକ ପରେ ୨୮ ତାରିଖରେ ପାନୁରିଆ ସେକ୍ସନ ଅନ୍ତର୍ଗତ ଆଦୁନାଜୁ ଗ୍ରାମର ପ୍ରଶାନ୍ତ ନାୟକଙ୍କୁ କଚାଡ଼ି ମାରିଥିଲା।
