ପାଟଣା: କେନ୍ଦୁଝର ଜିଲ୍ଲା ଢେଙ୍କିକୋଟରେ ଚତୁର୍ଦ୍ଧା ମୂର୍ତ୍ତିଙ୍କ ବାହୁଡା଼ ଯାତ୍ରା ଅନୁଷ୍ଠିତ ହୋଇଯାଇଛି। ପ୍ରଭୁଙ୍କ ସେବକ ମାନସ କୁମାର ପତି ଏବଂ ସହଯୋଗୀ ପୂଜକ ଓମ ପ୍ରକାଶ ଶତପଥିଙ୍କ ଦ୍ୱାରା ପୂର୍ବାହ୍ନ ୮ଟା ବେଳେ ଯଥାବିଧି ରୀତିନୀତି ସହ ପୂଜା ପାଠ କରାଯାଇଥିଲା। ପ୍ରାତଃସ୍ନାନ, ମଙ୍ଗଳ ଆଳତି, ସୂର୍ଯ୍ୟ ପୂଜା ସରିବା ପରେ ପହିଲି ଭୋଗ ଲାଗିଥିଲା। ପରେ ଷୋଡଶ ଉପଚାର କରି ହୋମ ଯଜ୍ଞ କରାଯାଇଥିଲା। ଅନୁଷ୍ଠାନର ପୁରୋଧା ତଥା ସଂକଳ୍ପଧାରୀ ରାମଚନ୍ଦ୍ର ସାହୁ,ପ୍ରଫୁଳ୍ଲ କୁମାର ସିଂହ, ଅଭିମନ୍ୟୁ ପଲେଇ, ନିର୍ମଳ ଚନ୍ଦ୍ର ମହାନ୍ତ, ସନ୍ତୋଷ ମଣ୍ଡଳ, ପୂର୍ଣ୍ଣ ଚନ୍ଦ୍ର ନାୟକ, ବିଜୟ କୁମାର ସାହୁ, ନୀଳମଣି ମଣ୍ଡଳ ସଂକଳ୍ପରେ ବସି ଢେଙ୍କିକୋଟ ଅଞ୍ଚଳର ଉନ୍ନତି କାମନା ମନାସିଥିଲେ। ପରେ ପୂର୍ଣ୍ଣାହୁତି ଓ ପୁଷ୍ପାଞ୍ଜଳି ପ୍ରଦାନ କରିଥିଲେ। ଅପରାହ୍ନ ୨ଟା ବେଳେ ପ୍ରଭୁଙ୍କ ନୀତିଭୋଗ ଲାଗିଥିଲା।
ଚତୁର୍ଦ୍ଧା ମୂର୍ତ୍ତିଙ୍କୁ ପହଣ୍ଡି ବିଜେ କରି ରଥାରୁଢ କରାଯିବା ପରେ ରାମଚନ୍ଦ୍ର ସାହୁ ଛେରା ପହରା କରିଥିଲେ। ଅପରାହ୍ନ ୫.୩୦ ବେଳେ ରଥ ଟଣା ଆରମ୍ଭ ହୋଇ ସନ୍ଧ୍ୟା ବେଳେ ରଥ ଶ୍ରୀମନ୍ଦିର ନିକଟ ରେ ଶାନ୍ତି ଶୃଙ୍ଖଳାର ସହ ପହଞ୍ଚିଥିଲା। ରଥଯାତ୍ରାରେ ୨୦ ହଜାରରୁ ଅଧିକ ଭକ୍ତଙ୍କ ସମାଗମ ହୋଇଥିଲା। ରଥର ଦୁଇ ଦଉଡି ମଧ୍ୟରୁ ଗୋଟିଏ ଦଉଡିରେ ମହିଳା ଭକ୍ତ ଏବଂ ଅନ୍ୟ ଦଉଡିକୁ ପୁରୁଷ ଭକ୍ତ ମାନେ ଧରି ପ୍ରଭୁଙ୍କ ରଥକୁ ଆନନ୍ଦର ସହ ଟାଣିଛନ୍ତି।
