ନୂଆଦିଲ୍ଲୀ : ଉତ୍ତରାଖଣ୍ଡର ଚମୋଲୀ ଜିଲାର ଗୌଚର ଅଞ୍ଚଳରେ ସିସିଟିଭି ଫୁଟେଜ୍ରେ ଏକ ଆଶ୍ଚର୍ଯ୍ୟ ଓ ଭୟଭୀତ କରିବା ଭଳି ଘଟଣା ସାମ୍ନାକୁ ଆସିଛି । ଏଠାରେ ଏକ କଲରାପତରିଆ ବାଘ ରାତି ସମୟରେ ସହରର ଜନବସତି ଅଞ୍ଚଳକୁ ପ୍ରବେଶ କରି ଏକ କ୍ୟାମ୍ପ ସାମ୍ନାରୁ କୁକୁରକୁ ଟାଣି ନେଇ ଜଙ୍ଗଲ ଭିତରକୁ ପଳାଇଛି । ସମସ୍ତ ଘଟଣା ସିସିଟିଭିରେ କଏଦ ହୋଇଛି । ଏହାର ଫୁଟେଜ ଏବେ ସୋସିଆଲ ମିଡିଆରେ ଦ୍ରୁତ ଗତିରେ ଭାଇରାଲ୍ ହେବା ସହ ସଭିଁଙ୍କ ଧ୍ୟାନକୁ ଆକର୍ଷିତ କରୁଛି ।
गौचर में चीता ने की धमाकेदार एंट्री, कुत्ते को उठाया और D.B.L. के पास से "भागा-भागा" जंगल की सैर को निकल गया! आदमी बस "क्या ड्रामा है!" सोचता रह गया। वायरल वीडियो में ये जंगली ट्विस्ट देख लो! 😜 pic.twitter.com/pSZoHVeXx9
— bhUpi Panwar (@askbhupi) May 27, 2025
ଘଟଣା ଡିବିଏଲ କ୍ୟାମ୍ପ କାର୍ଯ୍ୟାଳୟର ନିକଟରେ ଘଟିଛି । ଏଠାରେ ଜଣେ ସୁରକ୍ଷା ଗାର୍ଡ ଡ୍ୟୁଟି କରୁଥିବା ସମୟରେ ନିକଟରେ ଶୋଇଥିବା କୁକୁର ଉପରେ କଲରାପତରିଆ ବାଘ ଆକ୍ରମଣ କରିଥିଲା । ସୌଭାଗ୍ୟବଶତଃ ସେଠାରେ ଥିବା ସୁରକ୍ଷାଗାର୍ଡଙ୍କ ଉପରେ ବାଘ ଆକ୍ରମଣ କରିନଥିବା ଦେଖାଯାଉଛି ।
ଭିଡିଓରେ ଦେଖିପାରିବେ ବାଘଟି ଧିରେ ଧିରେ ଆସି କିଛି କ୍ଷଣ ମଧ୍ୟରେ କୁକୁରକୁ ଟାଣି ନେଇ ସେଠାରୁ ପଳାଉଛି । ସେଠାରେ ଅନ୍ୟ କୁକୁରମାନେ ଥିବା ଦେଖାଯାଉଛି । ବାଘକୁ ଦେଖି ଅନ୍ୟ କୁକୁରମାନେ ସେଠାରୁ ପଳାଉଛନ୍ତି । ସ୍ଥାନୀୟ ଲୋକଙ୍କ କହିବାନୁଯାୟୀ, କିଛି ଦିନ ହେବ ଜଙ୍ଗଲରୁ ବାଘ, ଜଙ୍ଗଲୀ ଜନ୍ତୁ ଜନବସତି ଆଡକୁ ପଳାଇଆସୁଥିବାରୁ ଭୟର ବାତାବରଣ ରହିଛି । ଭିଡିଓ ଭାଇରାଲ୍ ହେବା ପରେ ବନ ବିଭାଗ ଓ ପ୍ରଶାସନ ସଜାଗ ରହିଛି ।
ଏହା ପୂର୍ବରୁ ଉତ୍ତରାଖଣ୍ଡର ବିଭିନ୍ନ ଅଞ୍ଚଳରେ ବାଘ ଏଭଳି ଆକ୍ରମଣ କରି ଗୃହ ପାଳିତ ପଶୁକୁ ନିଜର ଶିକାର କରିଛି । ହରିଦ୍ୱାରରେ ନିକଟରେ ବାଘ ଏକ ପୋଷା କୁକୁରକୁ ଶିକାର କରିବାକୁୁ ଚେଷ୍ଟା କରିଥିଲା । ଭିଡିଓକୁ ଦେଖିବା ପରେ ଲୋକେ ନିଜର ଭିନ୍ନ ଭିନ୍ନ ମତ ଦେଇଛନ୍ତି ।
