ପୁରୀ/ବାଲେଶ୍ବର : ବାଲି ଚୋରା ଚାଲାଣର ପର୍ଦ୍ଦଫାଶ ହୋଇଛି । ଗୁରୁବାର ରାତିରେ ପୁଲିସ ଓ ସେସୁ ମିଳିତ ଭାବେ ବଳିଆପଣ୍ଡା ଲାଇଟ ହାଉସ ବେଳାଭୂମିରୁ ମଙ୍ଗଳାନଦୀ ମୁହାଣ ଯାଏଁ ଚାଲିଥିବା ବେଆଇନ ବାଲି ଚୋରା ଚାଲାଣ ଉପରେ ଚଢଉ କରିଥିଲେ । ଚଢଉ ବେଳେ ୧୫ଟି ବାଲି ବୋଝେଇ ଟ୍ରକ ସମେତ ୨ଟି ଜେସିବି ଏବଂ ଗୋଟିଏ ହାଇୱା ଜବତ ହୋଇଛି । ଏହା ସହ ୯ ଜଣ ଡ୍ରାଇଭରଙ୍କୁ ମଧ୍ୟ ପୁଲିସ ଅଟକ ରଖିଛି ।
ସୂଚନାଯୋଗ୍ୟ, ବାଲି ଚୋରାଚାଲାଣ ଫଳରେ ମାଟିତଳେ ଥିବା ବିଦ୍ୟୁତ ତାର ନଷ୍ଟ ହେଉଛି । ଫଳରେ ୫୦ ଲକ୍ଷ ଟଙ୍କାରୁ ଅଧିକ କ୍ଷୟକ୍ଷତି ହୋଇଥିବା ନେଇ ସେସୁ ପକ୍ଷରୁ ଜିଲ୍ଲା ପ୍ରଶାସନ ନିକଟରେ ଅଭିଯୋଗ ହୋଇଥିଲା । ଅଭିଯୋଗକୁ ଭିତ୍ତି କରି ଗତକାଲି ବିଳମ୍ବିତ ରାତ୍ରରେ ଜିଲ୍ଲା ପ୍ରଶାସନର ବରିଷ୍ଠ ଅଧିକାରୀ, ଉପ ଜିଲ୍ଲାପାଳ, ସେସୁ ଅଧିକାରୀ, ବଳିଆପଣ୍ଡା ପୋଲିସ, ସମୁଦ୍ରକୂଳ ପୁଲିସ ମିଳିତ ଭାବେ ଚଢାଉ କରିଥିଲେ ।
ଅନ୍ୟପଟେ ଚୋରା ବାଲି ଉତ୍ତୋଳନକୁ ବିରୋଧ କରି ତଥା ବାଲି ମାଫିଆମାନଙ୍କ ଦାଦାଗିରିରୁ ତ୍ରାହି ପାଇଁ ବାଲେଶ୍ବର ଜିଲା ନୀଳଗିରି ଅନ୍ତର୍ଗତ ମିତ୍ରପୁର-ଉଦଳା ରାସ୍ତାର ଅଞ୍ଚଳବାସୀ ରାସ୍ତାରୋକ କରିଛନ୍ତି ।
