ନୂଆଦିଲ୍ଲୀ: ଆମେରିକାର କୋଲୋରାଡା ରାଜ୍ୟ ଅନ୍ତର୍ଗତ ବ୍ରେକେନରିଜରେ ଆୟୋଜିତ ଅନ୍ତର୍ଜାତୀୟ ବରଫ ମୂର୍ତ୍ତି ନିର୍ମାଣ ପ୍ରତିଯୋଗିତାରେ ଭାରତୀୟ ଦଳକୁ ତୃତୀୟ ସ୍ଥାନ ମିିଳିଛି। ଜାହୁର ଡିନ୍ ଲୋନ୍ଙ୍କ ନେତୃତ୍ବାଧୀନ ଭାରତୀୟ ଦଳରେ ମୃଦୁଲ ଉପାଧ୍ୟାୟ, ସୋହେଲ୍ ଖାନ ଓ ମ୍ୟାଟ୍ ସେଲି ରହିଥିଲେ। ଭାରତୀୟ ଦଳ ବରଫରେ ପ୍ରସ୍ତୁତ କରୁଥିବା ‘ମାଇଣ୍ଡ ଇନ୍ ମେଡିଟେସନ୍’ ମୂର୍ତ୍ତିକୁ ଦର୍ଶକ ଓ ବିଚାରକମଣ୍ଡଳୀ ଉଚ୍ଚପ୍ରଶଂସା କରିଥିଲେ। ବିଯୁକ୍ତ ୨୫ରୁ ବିଯୁକ୍ତ ୩୫ ଡିଗ୍ରୀ ମଧ୍ୟରେ ୪ ଦିନ ଅତିବାହିତ କରି ଭାରତୀୟ ଦଳ ଏହି ମୂର୍ତ୍ତି ନିର୍ମାଣ କରିଥିଲେ। ବିଶ୍ବର ୧୨ଟି ଦେଶର ପ୍ରତିଯୋଗୀ ଏଥିରେ ଭାଗ ନେଇଥିବାବେଳେ ଜର୍ମାନୀ ପ୍ରଥମ ଓ ମେକ୍ସିକୋ ଦଳ ଦ୍ବିତୀୟ ସ୍ଥାନ ହାସଲ କରିଥିଲା। ଆୟୋଜକ କମିଟିର ସଦସ୍ୟ କାଲଭିନ୍ କହିଥିଲେ, ଭାରତୀୟ ଦଳ ଯେପରି ଭାବେ ନିଖୁଣ ମୂର୍ତ୍ତି ନିର୍ମାଣ କଲେ ତାହା ବାସ୍ତବିକ ପ୍ରଶଂସନୀୟ।
ସୂଚନାଯୋଗ୍ୟ, ଧ୍ୟାନ କରିବା ସମୟରେ ମନରେ ଯେଉଁ ସବୁ ଭାବନା ଆସେ ତାହାକୁ ନେଇ ଏହି ‘ମାଇଣ୍ଡ ଇନ୍ ମେଡିଟେସନ୍’ ମୂର୍ତ୍ତି ନିର୍ମାଣ କରାଯାଇଛି। ଭାରତୀୟ ଦଳର ନେତୃତ୍ବ ନେଉଥିବା ଜାହୁର କହିଥିଲେ ୨୦୧୭ରୁ ପ୍ରତିବର୍ଷ ବ୍ରେକେନରିଜରେ ଏହି ପ୍ରତିଯୋଗିତା ଅନୁଷ୍ଠିତ ହୋଇ ଆସୁଛି। ଏହି ଅନ୍ତର୍ଜାତୀୟ ପ୍ରତିଯୋଗିତାରେ ଭାଗ ନେବାର ସୁଯୋଗ ମିଳିବା ସୌଭାଗ୍ୟର କଥା। ପ୍ରତିବର୍ଷ ଭାରତୀୟ କଳାକାର ଏହି ପ୍ରତିଯୋଗିତାରୁ କିଛି ନା କିଛି ନୂଆ ଶିଖିଥାନ୍ତି। ଚଳିତଥର ଆୟୋଜକଙ୍କ ତରଫରୁ ଭାରତୀୟ ଦଳକୁ ମୂର୍ତ୍ତି ନିର୍ମାଣ ପାଇଁ ଉପଯୁକ୍ତ ଯନ୍ତ୍ରପାତି ଯୋଗାଇ ଦିଆଯାଇଥିଲା।
