ନୂଆଦିଲ୍ଲୀ : ରାଷ୍ଟ୍ରପତି ଭବନ ନକଟରେ ଥିବା ବିଜୟ ଚୌକରେ ମଙ୍ଗଳବାର ଧ୍ୱଜା ଅବତରଣ ଉତ୍ସବ ଅନୁଷ୍ଠିତ ହୋଇଯାଇଛି। ଗଣତନ୍ତ୍ର ଦିବସରେ ଉତ୍ତୋଳିତ ତ୍ରିରଙ୍ଗା ଧ୍ୱଜାକୁ ମଙ୍ଗଳବାର ଅବତରଣ କରାଯାଇଛି। ବିଭିନ୍ନ ଅନୁଷ୍ଠାନ, ସରକାରୀ ଓ ବେସରକାରୀ ସଂସ୍ଥା ମାନଙ୍କରେ ଗୋଟିଏ ଦିନରେ ପତାକା ଉତ୍ତୋଳନ ଓ ଅବତରଣ କରାଯାଇଥାଏ। କେବଳ ରାଷ୍ଟ୍ରପତି ଭବନରେ ପତାକା ଉତ୍ତୋଳନର ତିନି ଦିନରେ ଅବତରଣ କରାଯାଇଥାଏ। ଏହାକୁ ଧ୍ୱଜା ଅବତରଣ ଉତ୍ସବ ବୋଲି କୁହାଯାଏ।
ଏହି ଅବସରରେ ରାଷ୍ଟ୍ରପତି ଭବନ, ଦକ୍ଷୀଣ ଭାଗ ଓ ଉତ୍ତର ଭାଗକୁ ରଙ୍ଗବେରଙ୍ଗ ଆଲୋକମାଳା ଦ୍ୱାରା ସୁସଜ୍ଜିତ କରାଯାଇଛି। ଏହି କାର୍ଯ୍ୟକ୍ରମରେ ରାଷ୍ଟ୍ରପତି ରାମନାଥ କୋବିନ୍ଦ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହ, ପ୍ରତିରକ୍ଷା ମନ୍ତ୍ରୀ ନିର୍ମଳା ସୀତାରମଣ ପ୍ରମୁଖ ବ୍ୟକ୍ତି ଯୋଗ ଦେଇଥିଲେ। ଜଳ, ସ୍ଥଳ ଓ ବାୟୁ ସେନାର ସ୍ୱତନ୍ତ୍ର ବ୍ୟାଣ୍ଡ ଧ୍ୱନୀ ଦ୍ୱାରା ଏହି କାର୍ଯ୍ୟକ୍ରମ ସମାପ୍ତ ହୋଇଛି। ଏହି କାର୍ଯ୍ୟକ୍ରମରେ ସମସ୍ତ ସେନା ନିଜର କାର୍ଯ୍ୟକ୍ଷେତ୍ରକୁ ଫେରିବା ପାଇଁ ରାଷ୍ଟ୍ରପତିଙ୍କୁ ଅନୁମତି ମାଗିଥାନ୍ତି।
ସୂଚନାଯୋଗ୍ୟ ଯେ ରାଜତନ୍ତ୍ର ଶାସନ ସମୟରେ ଯୁଦ୍ଧକୁ ବିରାମ ଦେବା ପାଇଁ ଏହି କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଚଳିତ ଥର ସାରା ଜାହାଁ ସେ ଆଚ୍ଛା ସଙ୍ଗୀତ ମାଧ୍ୟମରେ ଏହି କାର୍ଯ୍ୟକ୍ରମର ସମାପ୍ତ ହୋଇଥିଲା।