ପିକ୍‌ଅପ ଭ୍ୟାନ ଧକ୍କାରେ ଯୁବକଙ୍କ ମୃତ୍ୟୁ

ଆଠଗଡ: ଆଠଗଡ-ମୁଣ୍ଡଳୀ ରାସ୍ତାରେ ଗୁରୁବାର ଏକ ସଡକ ଦୁର୍ଘଟଣାରେ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି। ଶୁକ୍ରବାର ସକାଳେ ଢେଙ୍କାନାଳରୁ ଦୁଇଜଣ ଯୁବକ ଏକ ବାଇକ ଯୋଗେ ପୁରୀ ଯାଉଥିଲେ। ଆଠଗଡ-ମୁଣ୍ଡଳି ରାସ୍ତାର ମେଘା ଗଡା ବୁଲାଣି ରାସ୍ତାରେ ବିପରୀତ ଦିଗରୁ ଆସୁଥିବା ଏକ ପିକ୍‌ଅପ୍ ଭ୍ୟାନ ସେମାନଙ୍କ ବାଇକକୁ ଧକ୍କା ଦେଇ ସେଠାରୁ ଦ୍ରୁତଗତିରେ ଚାଲିଯାଇଥିଲା। ଦୁର୍ଘଟଣା ପରେ ବାଇକରେ ଥିବା ଦୁଇ ଆରୋହୀ ଗୁରୁତର ଆହତଥିଲେ। ସେମାନଙ୍କୁ ତୁରନ୍ତ ଆଠଗଡ ଉପଖଣ୍ଡ ଚିକିତ୍ସାଳୟକୁ ଅଣାଯାଇଥିଲା। ସେଠାରେ ଜଣଙ୍କର ମୃତ୍ୟୁ ଘଟିଥିଲା। ମୃତକ ହେଲେ ଢେଙ୍କାନାଳ ମହିଷାପାଟ ରେଙ୍ଗାଲୀ କଲୋନୀର ଜ୍ୟୋର୍ତିମୟ ମହାରଣା(୨୧) ଏବଂ ଗୁରୁତର ଆହତ ଯୁବକ ଢେଙ୍କାନାଳ ସହରର ଦୀପକ କୁମାର ସାହୁ(୨୧) । ଘଟଣା ସଂପର୍କରେ ମୃତକଙ୍କ ପିତା ପ୍ରମୋଦ ମହାରଣା ଆଠଗଡ ଥାନାରେ ଲିଖିତ ଅଭିଯୋଗ କରିଛନ୍ତି। ଆଠଗଡ ପୁଲିସ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି। ଆଠଗଡ ଉପଖଣ୍ଡ ଚିକିତ୍ସାଳୟରେ ଜ୍ୟୋର୍ତିମୟଙ୍କ ମୃତଦେହ ବ୍ୟବଚ୍ଛେଦ କରାଯାଇ ପରିବାରବର୍ଗଙ୍କୁ ହସ୍ତାନ୍ତର କରାଯାଇଛି।