ମୁମ୍ବଇ: ହୀରା ବ୍ୟବସାୟୀ ନିରବ ମୋଦୀ ଋଣ ଠକେଇ ମାମଲାରେ ପଞ୍ଜାବ ନ୍ୟାଶ୍ନାଲ୍ ବ୍ୟାଙ୍କର ଦୁଇ ଜଣ କାର୍ଯ୍ୟନିର୍ବାହୀ ନିର୍ଦ୍ଦେଶକ କେ ବୀରା ବ୍ରହ୍ମାଜୀ ରାଓ ଓ ସଞ୍ଜିବ ସରନ୍ଙ୍କୁ ବହିଷ୍କାର କରାଯାଇଛି। ଶ୍ରୀ ରାଓଙ୍କ ଅବସର ପାଇଁ ଆଉ ମାତ୍ର ଦୁଇ ଦିନ ରହିଥିବା ବେଳେ ସଞ୍ଜିବ ଆସନ୍ତା ମେ’ ମାସରେ ଅବସର ଗ୍ରହଣ କରିଥାନ୍ତେ। ପରିଚାଳନାରେ ଅପରାଗତା ଓ ଦାୟିତ୍ୱହୀନତା କାରଣରୁ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ଶ୍ରୀ ରାଓ ୨୦୧୪, ଜୁନ୍ରେ ପିଏନ୍ବିରେ ଯୋଗ ଦେବା ପୂର୍ବରୁ ବିଜୟା ବ୍ୟାଙ୍କର ଗୁରୁତ୍ୱପୂର୍ଣ୍ଣ ପଦବୀରେ ଥିଲେ। ସେହିପରି ସଞ୍ଜିବ ପିଏନ୍ବିରେ ୨୦୧୬ ସେପ୍ଟେମ୍ବରରେ କାର୍ଯ୍ୟନିର୍ବାହୀ ନିର୍ଦେଶକ ପଦକୁ ପଦୋନ୍ନତି ପୂର୍ବରୁ ମହାପ୍ରବନ୍ଧକ ଥିଲେ। ଏହାପୂର୍ବରୁ ପିଏନ୍ବିର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଉଷା ଅନନ୍ତସୁବ୍ରମଣ୍ୟନ୍୍ଙ୍କୁ ସରକାର ଏହି ଦୁର୍ନୀତି ମାମଲାରେ ବହିଷ୍କାର କରିଥିଲେ। ପିଏନବିରେ ଯୋଗ ଦେବା ପୂର୍ବରୁ ଉଷା ଆହ୍ଲାବାଦ୍ ବ୍ୟାଙ୍କରେ ପରିଚାଳନା ନିର୍ଦେଶକ ଓ ମୁଖ୍ୟ କାର୍ଯ୍ୟ ନିର୍ବାହୀ ପଦରେ ଥିଲେ।
