ଆଠଗଡ: ଆଠଗଡ ପଞ୍ଚାୟତ ସମିତି କାର୍ଯ୍ୟାଳୟ ସଭାଗୃହରେ ସୋମବାର କଟକ ଜିଲ୍ଲାପାଳଙ୍କ ଯୁଗ୍ମ ଜନଅଭିଯୋଗ ଶୁଣାଣି ଶିବିର ଅନୁଷ୍ଠିତ ହୋଇଯାଇଛି। ଏଥିରେ ଜିଲ୍ଲାପାଳ ଦତ୍ତାତ୍ରେୟ ଭାଉସାହେବ ସିନ୍ଦେ ଓ ଜିଲ୍ଲା ତଥା ଆଠଗଡ ଉପଖଣ୍ଡର ବରିଷ୍ଠ ଅଧିକାରୀମାନେ ଯୋଗ ଦେଇ ଅଞ୍ଚଳବାସୀଙ୍କର ବିଭିନ୍ନ ସାମୁହିକ ଓ ବ୍ୟକ୍ତିଗତ ଅଭିଯୋଗ ଶୁଣାଣି କରି ସେଗୁଡିକର ସମାଧାନ ପାଇଁ ପଦକ୍ଷେପ ନେଇଥିଲେ। ଏହି ଶିବିରରେ ୧୦୦ଟି ଅଭିଯୋଗ ହସ୍ତଗତ ହୋଇଥିବାବେଳେ ସେଥିମଧ୍ୟରୁ ୧୧ଟି ସାମୁହିକ ଏବଂ ୮୯ଟି ବ୍ୟକ୍ତିଗତ ସମସ୍ୟା ସମ୍ବଳିତ ଅଭିଯୋଗ ରହିଥିଲା। ତନ୍ମଧ୍ୟରୁ ୩୭ଟି ଅଭିଯୋଗ ଉକ୍ତ ଶିବିରସ୍ଥଳରେ ହିଁ ସମାଧାନ କରାଯାଇଥିବା ବେଳେ ଅନ୍ୟ ଅଭିଯୋଗଗୁଡ଼ିକ ତଥ୍ୟ ଅନୁଧ୍ୟାନ ପରେ ବିଭିନ୍ନ ବିଭାଗ ଦ୍ବାରା ପର୍ଯ୍ୟାୟ କ୍ରମେ ସମାଧାନ କରାଯିବ ବୋଲି ଜିଲ୍ଲା ପ୍ରଶାସନ ପକ୍ଷରୁ କୁହାଯାଇଛି।
ଏହି ଶିବିରକୁ ଆସି ସ୍ଵାସ୍ଥ୍ୟ ଚିକିତ୍ସା ପାଇଁ ଜିଲ୍ଲାପାଳଙ୍କୁ ସହାୟତା ନିମନ୍ତେ ଆବେଦନ କରିଥିବା କନ୍ତୋଲ ୧୭ ନଂ ୱାର୍ଡର ହୁସେନ ଖାଁ, ୱାର୍ଡ ନଂ ୧୨ର ଶାନ୍ତିଲତା ବେହେରାଙ୍କୁ ରେଡକ୍ରସ ପାଣ୍ଠିରୁ ଏବଂ ଏନଏସି ଅଞ୍ଚଳର ସଂଯୁଲତା ଜେନାଙ୍କୁ ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ୫ ହଜାର ଟଙ୍କା ଲେଖାଁଏ ସହାୟତା ରାଶି ମଞ୍ଜୁର କରାଯାଇଥିଲା । ଏହି ଶିବିରରେ ଗ୍ରାମାଞ୍ଚଳ ଏସପି ପ୍ରତୀକ ସିଂହ, ଆଠଗଡ ଉପଜିଲ୍ଲାପାଳ ପ୍ରହଲ୍ଲାଦ ନାରାୟଣ ଶର୍ମା, ଡିଏଫଓ ଡାକ୍ତର ଯଜ୍ଞଦତ୍ତ ପତି, ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡାକ୍ତର ମକରନ୍ଦ ବେଉରା, ତହସିଲଦାର କ୍ଷେତ୍ରମୋହନ ସ୍ୱାଇଁ, ବିଡିଓ ବିଜୟ କେତନ ଚୌଧୁରୀଙ୍କ ସମେତ ବହୁ ଜିଲ୍ଲାସ୍ତର, ଉପଖଣ୍ଡ ଓ ବ୍ଲକସ୍ତରୀୟ ଅଧିକାରୀ ଉପସ୍ଥିତ ରହି ଲୋକଙ୍କ ସମସ୍ୟା ସମାଧାନରେ ସହଯୋଗ କରିଥିଲେ ଥିଲେ ।
Comments are closed.