କାଲିମେଳା: ମାଲକାନଗିରି ଜିଲ୍ଲା କାଲିମେଳା ବ୍ଲକ ଅନ୍ତର୍ଗତ ଗାଁ ପୋଖରୀକୁ ଗାଧୋଇବାକୁ ଯାଇ ପାଣିରେ ବୁଡି ୨ କୋମଳମତି ଶିଶୁଙ୍କ ଜୀବନ ଯାଇଥିବା ଦେଖିବାକୁ ମିଳିଛି । ଏଭିଳି ହୃଦୟବିଦାରକ ଘଟଣା କାଲିମେଳା ବ୍ଲକ କାଙ୍ଗୁରୁକୋଣ୍ଡା ପଂଚାୟତର ସାଲମାରିକୋଣ୍ଡା ଗ୍ରାମରେ ଘଟିଛି । ମିଳିଥିବା ସୁଚନା ଅନୁଯାୟୀ, ଉକ୍ତ ଗ୍ରାମରେ ରହୁଥିବା ଦେବା ମାଡକାମିଙ୍କ ୫ ବର୍ଷର ପୁଅ ବିବେକ ମାଡକାମି ଏବଂ ତାଙ୍କ ଘରକୁ ବୁଲିବାକୁ ଆସିଥିବା ଚିତ୍ରାଙ୍ଗପାଲ୍ଲୀ ପଂଚାୟତର ଉସକାପାଲ୍ଲୀ ଗ୍ରାମର ବଜା ପଡିଆମିଙ୍କ ଝିଅ ରାମେ ପଡିଆମି (୮) ଗୁରୁବାର ଅପରାହ୍ନ ପ୍ରାୟ ୨ ଟା ସମୟରେ ବିବେକ ଏବଂ ରାମେ ଦୁଇଜଣ ମିସି ସାଲମାରିକୋଣ୍ଡା ଗ୍ରାମରେ ତଥା ଦେବାଙ୍କ ଘର ଠାରୁ ପ୍ରାୟ ୫ ଶହ ମିଟର ଦୂରରେ ଥିବା ପୋଖରୀକୁ ଗାଧୋଇବାକୁ ଯାଇଥିଲେ । ଦୁର୍ଭାଗ୍ୟ ବସତଃ ଦୁଇଜଣ ଶିଶୁ ଗାଧୋଇବା ସମୟରେ ଉକ୍ତ ପୋଖରୀରେ ଥିବା ଗଭୀର ଜଳରେ ବୁଡିଯାଇଥିଲେ । ଦୀର୍ଘ ସମୟଧରି ଏହି ୨ଜଣ ଶିଶୁ ଘରକୁ ନଫେରିବାରୁ ପରିବାର ଲୋକେ ସେମାନଙ୍କୁ ଖୋଜିଖୋଜି କରି ଗାଁ ପୋଖରୀ ତୁଠ ନିକଟରେ ପହଂଚିଥିଲେ । ଉକ୍ତ ତୁଠରେ ଦୁଇଶିଶୁଙ୍କ ପୋଷାକ ପଡିଥିବା ଦେଖିବାକୁ ପାଇଥିଲେ । ୨ ଶିଶୁ ନିଖୋଜ ଥିବା ସମ୍ପର୍କରେ ପରିବାର ଲୋକେ ଗ୍ରାମବାସୀଙ୍କୁ ଜଣାଇବା ପରେ ସମସ୍ତେ ପୋଖରୀର ଗଭୀର ଜଳରେ ପସି ଦୁଇ ଶିଶୁଙ୍କୁ ଖୋଜିଥିଲେ । ପାଣିଭିତରୁ ଅପରାହ୍ନ ପ୍ରାୟ ୪ ଟା ସମୟରେ ୨ ଶିଶୁଙ୍କ ମୃତ ଶରୀରକୁ ଗ୍ରାମବାସୀ ମାନେ ଉଦ୍ଧାର କରିଥିଲେ । ଏହି ଘଟଣା ଚାରିଆଡେ ଖେଳିଯିବା ପରେ ଗାଁରେ ଶୁକାକୋଳ ପରିବେଶ ସୃଷ୍ଟି ହୋଇଥିଲ । ଏ ସମ୍ପର୍କରେ ପରିବାର ଲୋକେ କାଲିମେଳା ଥାନାରେ ଏକ ଲିଖିତ ଏତଲା ପ୍ରଦାନ କରିବା ପରେ ଏତଲାକୁ ଭିତିକରି କାଲିମେଳା ପୋଲିସ ପକ୍ଷରୁ ଏକ ଅପମୃତ୍ୟୁ ମାମଲା ୩/୨୦୧୯ ରୁଜୁ କରିବା ସହିତ ପୋଲିସ ଘଟଣା ସ୍ଥଳରେ ପହଂଚି ଦୁଇ ଶିଶୁଙ୍କ ମୃତ ଶରୀରକୁ ଜବତ କରି ଶବ ବ୍ୟବଛେଦ ନିମନ୍ତେ କାଲିମେଳା ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ । ଶବ ବ୍ୟବଛେଦ ପରେ ଦୁଇ ଶିଶୁଙ୍କ ମୃତ ଶରୀରକୁ ସେମାନଙ୍କ ଅଭିଭାବକକଙ୍କୁ ପୁଲିସ ପ୍ରଦାନ କରି ଘଟଣାର ତଦନ୍ତ ଜାରି ରଖିଥିବା ଜଣାପଡିଛି । ଉସକାପାଲ୍ଲୀ ଗାଁର ବଜା ପଡିଆମିର ଝିଅ ରାମେ ପଡିଆମି ସମ୍ପର୍କିୀୟ ମାମୁ ଦେବା ମାଡକାମି ଘରକୁ ବୁଲିବାକୁ ଆସିଥିବା ବେଳେ ଏହି ଘଟଣା ଘଟିଛି ।
Popular Categories
Previous article
Next article