ସିଡ୍ନୀ : ୭୧ ବର୍ଷ ପ୍ରତୀକ୍ଷାର ଅନ୍ତ ଘଟାଇ ଭାରତୀୟ କ୍ରିକେଟ ଦଳ ନିକଟରେ ଅଷ୍ଟ୍ରେଲିଆ ମାଟିରେ ଘରୋଇ ଦଳକୁ ୨-୧ରେ ପରାସ୍ତ କରି ଟେଷ୍ଟ ସିରିଜ ଜିତିବା ସହ ଇତିହାସ ସୃଷ୍ଟି କରିଛି। ଅଧିନାୟକ ବିରାଟ କୋହଲିଙ୍କ ସମେତ ସମସ୍ତ ଭାରତୀୟ ଖେଳାଳି ଓ କ୍ରିକେଟପ୍ରେମୀଙ୍କ ପାଇଁ ଏହା ଏକ ସୁସମ୍ବାଦ ପାଲଟିଛି। କୋହଲି ଓ ତାଙ୍କର ଅଭିନେତ୍ରୀ ପତ୍ନୀ ଅନୁଷ୍କା ଶର୍ମା ସୋମବାର ହୋଟେଲରେ କେକ୍ କାଟି ବିଜୟୋତ୍ସବ ପାଳନ କରିଛନ୍ତି। ଏହି ସଫଳତା ପାଇଁ ଅନୁଷ୍କା ଇନ୍ଷ୍ଟାଗ୍ରାମରେ ଭାରତୀୟ ଦଳକୁ ଅଭିନନ୍ଦନ ଜଣାଇବା ସହ କୋହଲିଙ୍କ କେକ୍ କାଟିବା ଫଟୋକୁ ଅପ୍ଲୋଡ କରିଛନ୍ତି। ସୋମବାର ସିଡ୍ନୀ ଟେଷ୍ଟର ପଞ୍ଚମ ଦିନର ଖେଳ ସମ୍ପୂର୍ଣ୍ଣ ବାତିଲ ହେବାପରେ ବିଜେତା ଭାରତୀୟ ଦଳକୁ ବର୍ଡର-ଗାଭାସ୍କର ଟ୍ରଫି ପ୍ରଦାନ କରାଯାଇଥିଲା।
