ବେଙ୍ଗାଲୁରୁ: ବହୁ ଚର୍ଚ୍ଚିତ କର୍ନାଟକ ଯୌନ କେଳେଙ୍କରୀ ମାମଲାର ମୁଖ୍ୟ ଅଭିଯୁକ୍ତ ପ୍ରଜ୍ଜ୍ୱଳ ରେଭାନ୍ନାଙ୍କ ମା’ ତଥା ହୋଲେନାରସିପୁରା ବିଧାୟକ ଏଚଡି ରେଭାନ୍ନାଙ୍କ ସ୍ତ୍ରୀ ଭବାନୀ ରେଭାନ୍ନାଙ୍କୁ ଆଗୁଆ ଜାମିନ ମିଳିଛି। ଶୁକ୍ରବାର କର୍ନାଟକ ହାଇକୋର୍ଟ ଭବାନୀଙ୍କୁ ସର୍ତ୍ତମୂଳକ ଆଗୁଆ ଜାମିନ ପ୍ରଦାନ କରିଛନ୍ତି। ମହୀଶୁରର କେ.ଆର. ନଗର ଥାନାରେ ଭବାନୀଙ୍କ ନାମରେ ଅପହରଣ ମାମଲା ରୁଜୁ ହୋଇଥିଲା।
ବିଚାରପତି କ୍ରିଷ୍ଣା ଏସ ଦିକ୍ଷିତ ପିଟିଶନର ଶୁଣାଣି କରି ଏହି ଜାମିନ ଦେଇଛନ୍ତି। କିଛି ସର୍ତ୍ତ ରଖି ବିଚାରପତି କହିଛନ୍ତି ଯେ, ଆବେଦନକାରୀ ଭବାନୀ ବିଚାର ବିଭାଗୀୟ ତଦନ୍ତକାରୀ ଅଧିକାରୀଙ୍କ ସମ୍ମୁଖରେ ଶୁକ୍ରବାର ଅପରାହ୍ନ ୧ଟାରେ ହାଜର ହେବା ସହିତ ତଦନ୍ତ ପ୍ରକ୍ରିୟାରେ ପୂର୍ଣ୍ଣ ସହଯୋଗ କରିବେ। ଅନ୍ୟପଟେ ତଦନ୍ତ ଆଳରେ ଅଧିକାରୀ ତାଙ୍କୁ ଅପରାହ୍ନ ୫ଟାରୁ ଅଧିକ ସମୟ ପର୍ଯ୍ୟନ୍ତ କାର୍ଯ୍ୟାଳୟରେ ବସାଇ ରଖିପାରିବେ ନାହିଁ।
ବିଚାରପତି ଆହୁରି କହିଥିଲେ ଯେ, କେବଳ ଏହି ସର୍ତ୍ତ ଅନୁସାରେ ଜାମିନ ଦିଆଯାଉଛି। ଏହା କୌଣସି ପୁରସ୍କାର ନୁହେଁ। ତେଣୁ ଏହାକୁ ନେଇ କୌଣସି ପ୍ରଚାର ଉତ୍ସବ ମନାଇବେ ନାହିଁ। ଅନ୍ୟପଟେ ମାମଲାର ତଦନ୍ତ କରୁଥିବା ଏସଆଇଟି ଦାବି କରିଛି ଯେ, ଭବାନୀ ହେଉଛନ୍ତି ଯୌନ କେଳେଙ୍କରୀ ଘଟଣାର ମାଷ୍ଟରମାଇଣ୍ଡ। ତାଙ୍କୁ ବିଚାର ବିଭାଗୀୟ ହାଜତରେ ଜେରା କରାଯିବା ଉଚିତ।
