ଖୁଣ୍ଟା – ଖୁଣ୍ଟା ପୁଲିସ ଏକ ମୋବାଇଲ ଛିନତାଇ ମାମଲାରେ ୩ ଅଭିଯୁକ୍ତଙ୍କୁ ଗିରଫ କରିଥିବା ବେଳେ ସେମାନଙ୍କ ନିକଟରୁ ୫ ଗୋଟି ଏଣ୍ଡ୍ରୋଏଡ ମୋବାଇଲ ଓ ଛିନତାଇରେ ବ୍ୟବହୃତ ଗୋଟିଏ ବାଇକ ଜବତ କରିଛି। ଗିରଫ ଅଭିଯୁକ୍ତ ମାନେ ହେଲେ ପୁରୁଣା ବାରିପଦାର ସୁଶାନ୍ତ ନାୟକ ଓରଫ କାଳୁ(୨୫), ନିତ୍ୟାନନ୍ଦ ଦେହୁରୀ(୨୫) ଓ ଏସକେ ରାଜୁ(୪୦)। ଅଭିଯୋଗ ଅନୁସାରେ ଉଦଳା ଥାନା ପଦ୍ମପୁର ଅଞ୍ଚଳର ସଦନ କୁମାର କିସ୍କୁ ଗତ ୨୦୨୩ ମସିହା ଡିସେମ୍ବର ୧ ତାରିଖ ସନ୍ଧ୍ୟା ସମୟରେ ନହରା ବାଟ ଦେଇ ସମ୍ପର୍କୀୟ ଘରକୁ ସାଇକେଲରେ ଯାଉଥିଲେ। ନହରା ଛକରେ ସୁଶାନ୍ତ ଓ ନିତ୍ୟାନନ୍ଦ ଏକ ପ୍ଲାଟିନା ବାଇକରେ ପହଞ୍ଚି ସଦନଙ୍କୁ ରୋକିବା ସହ ତାଙ୍କ ମୋବାଇଲ ଫୋନ ଛିନତାଇ କରିଥିଲେ । ସେହିଦିନ ଉକ୍ତ ଘଟଣା ବାବଦରେ ଖୁଣ୍ଟା ଥାନାରେ ଏକ ମାମଲା ରୁଜୁ ହୋଇଥିଲା।
ଖୁଣ୍ଟା ଆଇଆଇସି ସୁଜାତା ଖମାରୀଙ୍କ ତତ୍ତ୍ୱାବଧାନରେ ପୁଲିସ ଅନୁସନ୍ଧାନ କରି ଘଟଣାରେ ସଂପୃକ୍ତ ଥିବା ସୁଶାନ୍ତ ଓ ନିତ୍ୟନନ୍ଦକୁ ଗିରଫ କରିଥିବା ବେଳେ ଛିନତାଇ ପାଇଁ ବାଇକ ଦେଇଥିବା ଓ ଉକ୍ତ ମୋବାଇଲ ରଖିଥିବା ଅଭିଯୋଗରେ ଏସକେ ରାଜୁକୁ ଗିରଫ କରାଯାଇଛି। ତଦନ୍ତ ବେଳେ ଅନ୍ୟାନ୍ୟ ସ୍ଥାନରୁ ଚୋରି କରାଯାଇଥିବା ୨ଗୋଟି ସାମସଙ୍ଗ, ୨ ଗୋଟି ଅପୋ ଓ ଗୋଟିଏ ଭିଭୋ ମୋବାଇଲ ଜବତ କରାଯାଇଥିଲା। ବୁଧବାର ସମସ୍ତ ଅଭିଯୁକ୍ତ ମାନଙ୍କୁ କୋର୍ଟ ଚାଲାଣ କରାଯାଇଛି।
