କଲମପୁର: କଲମପୁର କୋଟାଗାଁ ମୁଖ୍ୟ ରାସ୍ତାର କର୍ମେଲ ହାତୀ ନଦୀ ପୋଲ ନିକଟରେ ମହୁମାଛି ଆକ୍ରମଣରେ ଜଣେ ପଥଚାରୀ ଗୁରୁତର ହୋଇଛନ୍ତି। ଜଣେ ସାଇକଲ ଆରୋହୀ ଏହି ରାସ୍ତା ଦେଇ କଲମପୁର ସାପ୍ତାହିକ ବଜାରକୁ ଆସୁଥିବାବେଳେ ମହୁମାଛି ଆକ୍ରମଣରେ ଗୁରୁତର ହୋଇଛନ୍ତି। ତାଙ୍କୁ ସ୍ଥାନୀୟ ଲୋକ ଉଦ୍ଧାର କରି ଚିକିତ୍ସା ପାଇଁ କଲମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛନ୍ତି।
ସୂଚନା ଅନୁସାରେ, ଉମେର ଗ୍ରାମର ଶ୍ୟାମ ସୁନ୍ଦର ସାହୁ ନାମକ ଜନୈକ ବ୍ୟକ୍ତି ଏକ ସାଇକଲ ଯୋଗେ କଲମପୁର ସାପ୍ତାହିକ ବଜାରକୁ ଆସୁଥିଲେ। ଏହି ସମୟରେ କର୍ମେଲ ହାତୀ ନଦୀ ପୋଲ ନିକଟସ୍ଥ ବଟ ଗଛରେ ବସା ବାନ୍ଧିଥିବା ମହୁ ମାଛି ଏଣେ ତେଣେ ଉଡ଼ି ବୁଲୁଥିଲେ। ଶ୍ୟାମ ସୁନ୍ଦର ଘଟଣା ସ୍ଥଳରେ ପହଞ୍ଚିବା ପରେ ବହୁ ସଂଖ୍ୟାରେ ମହୁ ମାଛି ଶ୍ୟାମ ସୁନ୍ଦରଙ୍କୁ ଆକ୍ରମଣ କରିଥିଲେ। ଶ୍ୟାମ ସୁନ୍ଦର ମହୁମାଛି ଆକ୍ରମଣରେ ଅସହାୟ ହୋଇ ରାସ୍ତା ଉପରେ ପଡ଼ିଯାଇ ନିଜର ସୁରକ୍ଷା ପାଇଁ ଚିତ୍କାର କରିଥିଲେ। କର୍ମେଲ ଗ୍ରାମର ରଘୁନାଥ ବଗର୍ତି ନାମକ ଯୁବକ ଅନ୍ୟ ଜଣେ ସହଯୋଗୀଙ୍କ ସହ ଘଟଣା ସ୍ଥଳରୁ ଶ୍ୟାମ ସୁନ୍ଦରଙ୍କୁ ଉଦ୍ଧାର କରି ଚିକିତ୍ସା ପାଇଁ କଲମପୁର ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ବର୍ତମାନ ଶ୍ୟାମ ସୁନ୍ଦରଙ୍କ ଚିକିତ୍ସା ଜାରି ରହିଛି।
