ନର୍ଲା : ନର୍ଲା ବ୍ଲକ ତୁଳାପଡା ଶିବ ମନ୍ଦିର ସମ୍ମୁଖ ଭାଗରେ ଥିବା ଦିଆରୀମୁଣ୍ଡା ପୋଖରୀ ଏକ ବିସ୍ତୀର୍ଣ୍ଣ ପଡିଆର ଭ୍ରମ ସୃଷ୍ଟି କରୁଛି। ଏକ ଅଜଣା ଲତା ଉକ୍ତ ପୋଖରୀରେ ରାତାରାତି ବଂଶ ବିସ୍ତାର କରି ସମ୍ପୂର୍ଣ୍ଣ ଜଳାଶୟକୁ ଘୋଡେଇ ରଖିଛି। ଫଳରେ ପୋଖରୀରେ ପାଣି ଦେଖିବାକୁ ମିଳୁନି। ଯେ କେହି ବ୍ୟକ୍ତି ଦେଖିଲେ ଭାବିବ ଏହା ଏକ ବିସ୍ତୀର୍ଣ୍ଣ ପଡିଆଟିଏ। ଏହି ପୋଖରୀର ପାଣି ସ୍ଥାନୀୟ ବାସିନ୍ଦାଙ୍କ ନିତ୍ୟ ବ୍ୟବହାର୍ୟ୍ୟ ହେଉଥିବା ବେଳେ ଏବେ ଲୋକେ ପାଣିର ବ୍ୟବହାର କରି ପାରୁ ନାହାନ୍ତି । ଅନ୍ୟପଟେ ମାଛ ଚାଷ ପାଇଁ ଉକ୍ତ ପୋଖରୀ ନିଲାମ ହୋଇଛି ।
ମାଛ ଚାଷ କରୁଥିବା ହିତାଧିକାରୀ ମାଛ ମାରିବା ସମ୍ଭବପର ନୁହେଁ । ଏଭଳି ପରିସ୍ଥିତି ଅତୀତରେ ରୁପ୍ରା ସାଗରରେ ଦେଖା ଦେଇଥିଲା ଓ ବହୁ କଷ୍ଟରେ ଏହି ଲତାର ବଂଶ ନିପାତ କରିବା ପରେ ଏବେ ପାଣି ସଫା ହୋଇଛି । ତେବେ ମାଛ ଧରାଳୀଙ୍କ ଜାଲରେ ଏହି ଲତା ଆସି ବିଭିନ୍ନ ପୋଖରୀରେ ବଂଶ ବିସ୍ତାର କରୁଛି । ଦିଆରୀମୁଣ୍ଡାକୁ ଲାଗି ବଣାମୁଣ୍ଡା କ୍ଷୁଦ୍ର ଜଳସେଚନ ପ୍ରକଳ୍ପ ରହିଛି। ଏହି ଲତା ବଣାମୁଣ୍ଡାକୁ ନିଶ୍ଚିତ ବ୍ୟାପିବ। ବଣାମୁଣ୍ଡାରେ ଯଦି ଏହି ଲତା ମାଡେ ତାହେଲେ ଲୋକେ ପାଣିର ବ୍ୟବହାର କରିବା ଅସମ୍ଭବ ହୋଇପଡିବ ଓ ଏହାକୁ ନିର୍ମୁଳ କରିବା ପାଇଁ ପ୍ରଶାସନକୁ ମୋଟା ଅଙ୍କ ଖର୍ଚ୍ଚ କରିବାକୁ ପଡିବ। ଦିଆରୀମୁଣ୍ଡାକୁ ପ୍ରଶାସନ ସଫା କରିବା ଉଚିତ ବୋଲି ସ୍ଥାନୀୟ ବାସିନ୍ଦା ଦାବୀ କରିଛନ୍ତି।
Comments are closed.