ମ.ରାମପୁର: ଚଳିତ ମାସ ୧୩ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦ୍ଘାଟନ କରିଥିବା କଳାହାଣ୍ଡି ଜିଲା ମ.ରାମପୁର ବ୍ଲକ ସାଲେପାଳି ପଞ୍ଚାୟତର ଡୁଟାଠାରେ ସାନ୍ଦୁଲ ଵ୍ୟାରେଜରେ ମଙ୍ଗଳବାର ଏକ ଅଘଟଣ ଘଟିଛି। ମାଟି ଅତଡ଼ା ଖସି ଜଣେ ଶ୍ରମିକଙ୍କ ମୃତ୍ୟୁ ହୋଇଥିବାବେଳେ ଦୁଇ ଜଣ ଗୁରୁତର ଭାବେ ଆହତ ହୋଇଛନ୍ତି। ମୃତକ ଜଣକ ବାପା ଓ ଦୁଇ ଗୁରୁତର ଦୁଇ ପୁଅ ବୋଲି ଜଣାପଡ଼ିଛି।
ସୂଚନା ଅନୁଯାୟୀ, ଦିନ ପ୍ରାୟ ସାଢେ ୧୦ଟା ସମୟରେ ବ୍ୟାରେଜର ଗେଟ୍ କାମ ଚାଲିଥିବା ବେଳେ ଏହି କାମରେ ୫ ଜଣ ଶ୍ରମିକ ନିୟୋଜିତ ଥିଲେ। ଏହି ସମୟରେ ମାଟି ଅତଡ଼ା ଖସି ଯିବାରୁ ତାମିଲନାଡ଼ୁର ନିଆନ ବାଗ କୋଶଳ ଗଜ୍(୫୩), ତାଙ୍କ ଦୁଇ ପୁଅ ସନ୍ଦୀପ ପ୍ରସାଦ କୋଶଳ ଗଜ(୨୮) ଓ ଦୀପକ୍ କୋଶଳ ଗଜ(୨୪) ମାଟି ତଳେ ଚାପି ହୋଇ ଯାଇଥିଲେ। ଅନ୍ୟ ଦୁଇ ଶ୍ରମିକଙ୍କୁ ଉଦ୍ଧାର କରାଯାଇଥିବା ବେଳେ ନିଆନ୍ ବାଗ ସବୁଠୁ ତଳେ ଚାପି ହୋଇଥିବା ଯୋଗୁଁ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଛି। ଖବର ପାଇ ମ.ରାମପୁର ପୁଲିସ ଘଟଣାସ୍ଥଳକୁ ଯାଇ ମୃତଦେହ ଜବତ କରିବା ସହ ଗୁରୁତର ଦୁଇ ଭାଇଙ୍କୁ ମ.ରାମପୁର ଡାକ୍ତରଖାନାରେ ଭର୍ତ୍ତି କରିଛି। ମୃତଦେହ ବ୍ୟବଚ୍ଛେଦ ପାଇଁ ରଖା ଯାଇଥିବାବେଳେ ପୁଲିସ ଏସଆଇ ଶ୍ରୀରାଜ ପାଢ଼ୀ ଘଟଣାର ତଦନ୍ତ କରୁଥିବା ଜଣାଯାଇଛି।
ସୂଚନାଯୋଗ୍ୟ, ୧୩୦ କୋଟି ଟଙ୍କାରେ ବ୍ୟାରେଜ୍ ନିର୍ମାଣ କରାଯାଇଛି ଏବଂ ୧୭୦ କୋଟି ଟଙ୍କାରେ କେନାଲ ନିର୍ମାଣ କରାଯାଇ ୫୦୦୦ ହଜାର ହେକ୍ଟର ଜମିକୁ ପାଣି ଯୋଗାଇବା ପାଇଁ ଏହି ବ୍ୟାରେଜର ନିର୍ମାଣ ହୋଇଛି।
