ନୂଆଦିଲ୍ଲୀ :୨୦୨୩ ମସିହାରେ ଜାରି ହୋଇଥିବା ବାଣିଜ୍ୟିକ ପାଇଲଟ୍ ଲାଇସେନ୍ସର ସମୁଦାୟ ସଂଖ୍ୟା ୧୬୨୨ । ଏଥିରୁ ୨୯୪ ମହିଳା ସାମିଲ ଥିବାନେଇ ସୂଚନା ଦେଇଛି ବିିମାନ ଚଳାଚଳ ମନ୍ତ୍ରାଳୟ । ରାଜ୍ୟସଭାରେ ଏକ ଲିଖିତ ଉତ୍ତରରେ ମନ୍ତ୍ରୀ ଭି କେ ସିଂହ କହିଛନ୍ତି କି ୨୦୨୨ର ୨୪୦ ତୁଳନାରେ ୨୦୨୩ରେ ମହିଳାଙ୍କୁ ଜାରି ହୋଇଥିବା ଲାଇସେନ୍ସ ସଂଖ୍ୟା ୨୯୪ । ଏଥିରେ ୨୨ ପ୍ରତିଶଥ ବୃଦ୍ଧି ହୋଇଥିବା ଦେଖିବାକୁ ମିଳିଛି ।
ମନ୍ତ୍ରୀ କହିଛନ୍ତି କି ବିଭିନ୍ନ ଭାରତୀୟ ଅପରେଟରଙ୍କ ସହ କାର୍ଯ୍ୟରତ ମହିଳା ପାଇଲଟଙ୍କ ସମୁଦାୟ ସଂଖ୍ୟା ଉଡାଣ ଚାଳକ ଦଳ ସଂଖ୍ୟାର ପ୍ରାୟ ୧୪ ପ୍ରତିଶତ । ସେ କହିଛନ୍ତି କି ସିଭିଲ ଏଭିଏସନ ମିନିଷ୍ଟ୍ରି ଏବଂ ଏଥି ସହିତ ଜଡିତ ସଙ୍ଗଠନ ଦେଶରେ ମହିଳା ଏବଂ ପୁରୁଷ ପାଇଲଟଙ୍କ ସଂଖ୍ୟା ବଢାଇବା ପାଇଁ ପଦକ୍ଷେପ ଉଠାଇଛନ୍ତି । ମହିଳା ପାଇଲଟଙ୍କ ସଂଖ୍ୟା ବୃଦ୍ଧି ପାଇଁ ପ୍ରୋତ୍ସାହିତ କରାଯାଉଛି । ଏଥିପାଇଁ ସ୍କୁଲ ଛାତ୍ରୀ, ଖାସ୍ କରି କମ୍ ଆୟ ବିଶିଷ୍ଟ ପରିବାର ଉପରେ ବିଶେଷ ଧ୍ୟାନ ଦିଆଯାଉଛି ।
କୁହୁଡି କାରଣରୁ ବିମାନ ବିଳମ୍ବକୁ ନେଇ ଭି କେ ସିଂହ କହିଛନ୍ତି କି ଉଡାଣ ରଦ୍ଦ ହେବାର କାରଣ ଘନ କୁହୁଡି । ଖାସ୍ କରି ଡିସେମ୍ବର ଏବଂ ଜାନୁୂୟାରୀ ସମୟରେ ଉତ୍ତର ଭାରତ ସ୍ଥିତ ବିମାନବନ୍ଦରରେ ଘନ କୁହୁଡି ଯୋଗୁଁ ଅନେକ ବିମାନ ରଦ୍ଦ ହୋଇଛି । ଅନେକ ବିମାନବନ୍ଦରରେ ଦୃଶ୍ୟମାନ ସୂଚକାଙ୍କ ହ୍ରାସ ପାଇଁ ଶୂନ୍ୟ ମିଟର ହୋଇଯାଇଛି ଯାହା ଫଳରେ ବିମାନ ଚଳାଚଳ ପ୍ରଭାବିତ ହୋଇଛି ।
