କଲକତା : ନିଜ ଜନ୍ମଦିନରେ ବିରାଟ କୋହଲି ସେହି ଚମତ୍କାର ପ୍ରଦର୍ଶନ କରିଛନ୍ତି, ଯାହାକୁ ସମଗ୍ର ବିଶ୍ବ କ୍ରିକେଟ୍ ଅପେକ୍ଷା କରିଥିଲା। ରବିବାର କଲକତାର ଇଡେନ୍ ଗାର୍ଡେନ୍ସରେ ଖେଳାଯାଉଥିବା ଆଇସିସି ବିଶ୍ବକପର ଭାରତ-ଦକ୍ଷିଣ ଆଫ୍ରିକା ମ୍ୟାଚ୍ରେ ନିଜ ଦିନିକିଆ କ୍ୟାରିୟରର ୪୯ତମ ଶତକ ହାସଲ କରିଛନ୍ତି କୋହଲି। ଏଥିସହ ସେ ସଚିନ ତେନ୍ଦୁଲକରଙ୍କ ରେକର୍ଡ଼ ସହ ସମକକ୍ଷ ହୋଇଛନ୍ତି। ସଚିନ୍ ଦିନିକିଆରେ ୪୯ ଶତକ ହାସଲ କରିଥିଲେ। ଏବେ ଏହି ରେକର୍ଡ଼ରେ କୋହଲିଙ୍କ ନାଁ ମଧ୍ୟ ସାମିଲ ହୋଇଯାଇଛି। ଆଉ ଗୋଟିଏ ଶତକ ହାସଲ ପରେ କୋହଲି ତେନ୍ଦୁଲକରଙ୍କ ବିଶ୍ବ ରେକର୍ଡ଼ ଭାଙ୍ଗିବେ। ବିରାଟଙ୍କ ଏହି ଶତକ ବଳରେ ଦକ୍ଷିଣ ଆଫ୍ରିକା ଆଗରେ ୩୨୭ ରନର କଷ୍ଟସାଧ୍ୟ ବିଜୟ ଲକ୍ଷ୍ୟ ରଖିଛି ଭାରତ। ସୂର୍ଯ୍ୟକୁମାର ଯାଦବ ଓ ରବୀନ୍ଦ୍ର ଜାଡେଜାଙ୍କ ସହ ଉପଯୋଗୀ ପାର୍ଟନରସିପ କରି ବିରାଟ କୋହଲି ଦଳୀୟ ସ୍କୋରକୁ ୫୦ ଓଭରରେ ୩୨୬ ରନରେ ପହଞ୍ଚାଇଛନ୍ତି।
ସୂଚନାଯୋଗ୍ୟ, ସଚିନ ତାଙ୍କ ଦିନିକିଆ କ୍ୟାରିୟରରେ ୪୬୩ ମ୍ୟାଚ୍ ଖେଳି ମୋଟ୍ ୪୯ ଶତକ ହାସଲ କରିବାରେ ସଫଳ ହୋଇଥିଲେ। ଅପରପକ୍ଷେ, କୋହଲି ୨୮୯ତମ ମ୍ୟାଚରେ ୪୯ ଶତକ ହାସଲ କରି ରେକର୍ଡ଼ ସୃଷ୍ଟି କରିଛନ୍ତି। ଦିନିକିଆରେ ସଚିନଙ୍କ ସହ ଏବେ କୋହଲି ସର୍ବାଧିକ ଶତକ ହାସଲ କରିଥିବା ବ୍ୟାଟ୍ସମ୍ୟାନ୍ ହୋଇଛନ୍ତି।
