ଜଳଭଣ୍ଡାରରେ ଛାତ୍ର ନିଖୋଜ ଘଟଣା : ହତ୍ୟା ମାମଲା ରୁଜୁ ଦାବିରେ ରାସ୍ତାରୋକ

ଭବାନୀପାଟଣା : ଗତକାଲି ଢ଼ୁସଗୁଡ଼ା ସ୍ଥିତ ରେତ ଜଳଭଣ୍ଡାରରେ ଗାଧୋଉଥିବା ବେଳେ ଜଣେ ଛାତ୍ର ନିଖୋଜ ହୋଇ ଯାଇଛନ୍ତି । ତେବେ ସେ ଯେଉଁ ସାଙ୍ଗ ମାନଙ୍କ ସହ ଆସିଥିଲେ , ସେମାନେ ତାଙ୍କୁ ପାଣିକୁ ଠେଲି ଦେଇ ଥାଇ ପାରନ୍ତି ବୋଲି ପରିବାର ଲୋକେ ଗତକାଲି ନର୍ଲା ଥାନାରେ ଅଭିଯୋଗ କରିଥିଲେ। କିନ୍ତୁ ପୁଲିସ ଏଯାଏଁ ଏତଲା ଗ୍ରହଣ ନ କରିବା ପ୍ରତିବାଦରେ ଆଜି ଛତିଗୁଡା ଛକରେ ନିଖୋଜ ଛାତ୍ରଙ୍କ ପରିବାର ଲୋକେ ରାସ୍ତାରୋକ କରିଛନ୍ତି ।
ଉଲ୍ଲେଖଯୋଗ୍ୟ , ନିଖୋଜ ଛାତ୍ର ଆଲୋକ ପଣ୍ଡା ଓରଫ ସିଲୁ ଗତକାଲି ସାଙ୍ଗ ମାନଙ୍କ ସହ ରେତ ପ୍ରକଳ୍ପର ଜଳଭଣ୍ଡାରକୁ ବୁଲିବାକୁ ଯାଇଥିଲେ । ସେଠାରେ ଗାଧୋଉଥିବା ବେଳେ ଅସାବଧାନତା ବଶତଃ ପାଣିରେ ବୁଡି ଯାଇଥିଲେ । ତେବେ ତାଙ୍କ ସହିତ ଆସିଥିବା ଦୁଇ ଛାତ୍ର ଏବଂ ଦୁଇ ଛାତ୍ରୀ ସେମାନଙ୍କୁ ପାଣିକୁ ଠେଲି ଦେଇଥିବା ଅଭିଯୋଗ କରି ପରିବାର ଲୋକେ ଗତକାଲି ନର୍ଲା ଥାନାରେ ଲିଖିତ ଅଭିଯୋଗ କରିଥିଲେ ।
ତେବେ ପୁଲିସ ଏନେଇ ସମ୍ପୃକ୍ତ ଛାତ୍ରଛାତ୍ରୀ ମାନଙ୍କୁ ଗତକାଲି ବିଳମ୍ୱିତ ରାତି ଯାଏଁ ପଚରା ଉଚରା ପରେ ଛାଡ଼ି ଦେଇଛି । ଗତକାଲି ଠାରୁ ଭବାନିପାଟଣା ଅଗ୍ନିଶମ ବିଭାଗ ଏବଂ ନର୍ଲା ପୁଲିସ ଉଦ୍ଧାର କାର୍ୟ୍ୟ ଜାରି ରଖିଥିଲେ । ଆଜି ସକାଳୁ ମଧ୍ୟ ନିଖୋଜ ଛାତ୍ରଙ୍କୁ ଜଳଭଣ୍ଡାରରେ ଖୋଜା ଖୋଜି ଚାଲିଛି । ତେବେ ନିଖୋଜଙ୍କ ସଂକ୍ରାନ୍ତରେ କିଛି ସୂଚନା କିମ୍ବା ନିଖୋଜ ଛାତ୍ର ଏଯାଏଁ ମିଳିନଥିବାରୁ ପୁଲିସର ତଦନ୍ତ ଚାଲୁ ରହିଛି । ଅନ୍ୟପକ୍ଷରେ ନିଖୋଜଙ୍କ ସାଙ୍ଗ ମାନଙ୍କ ବିରୁଦ୍ଧରେ ମାମଲା ରୁଜୁ ଦାବିରେ ଆଜି ସକାଳ ୯ ଟା ୩୦ ରୁ ଛତିଗୁଡା ଛକରେ ରାସ୍ତା ରୋକ ଚାଲିଛି । ଫଳରେ ଭବାନୀପାଟଣାରୁ ନର୍ଲା, ମଦନପୁର ରାମପୁର , ଲାଞ୍ଜିଗଡ ତଥା ରାୟଗଡା ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଛି । ବରିଷ୍ଠ ପୁଲିସ ଅଧିକାରି ମାନେ ଘଟଣାସ୍ଥଳକୁ ଯାଇ ଲୋକଙ୍କୁ ବୁଝାସୁଝା କରୁଛନ୍ତି । ତଥାପି ଖବର ଲେଖାଯିବା ବେଳକୁ ରାସ୍ତାରୋକ ଜାରି ରହିଛି ।