ପ୍ରୟାଗରାଜ: ପ୍ରୟାଗରାଜରେ ସଫାରି କାର୍ର ବୋନେଟ୍ ଉପରେ ବସି ରିଲ୍ କରିବା ଜଣେ କନିଆଁଙ୍କୁ ମହାଙ୍ଗା ପଡ଼ିଛି। ଫଟୋ ଏବଂ ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହେବା ପରେ ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ କରି କାର ନାଁରେ ୧୫,୫୦୦ ଟଙ୍କାର ଚାଲାଣ କାଟିଛି।
ସିଭିଲ ଲାଇନ୍ସ ସ୍ଥିତ ବ୍ରାଇଡାଲ ଷ୍ଟୁଡିଓରେ ମେକଅପ୍ ହେବା ପରେ ଜଣେ କନିଆଁ ରିଲ୍ କରିବା ପାଇଁ ଷ୍ଟୋନ କ୍ୟାଥେଡ୍ରାଲରେ ପହଞ୍ଚିଥିଲେ। ଟାଟା ସଫାରି କାର୍ର ବୋନେଟ୍ ଉପରେ ବସି ସେ ରିଲ୍ କରିଥିଲେ। ଏହାପରେ ବିନା ହେଲ୍ମେଟ୍ରେ ସ୍କୁଟି ଚଲାଇ ମଧ୍ୟ ରିଲ୍ କରିଥିଲେ। ଏହି ସମୟରେ ତାଙ୍କୁ ଦେଖିବା ପାଇଁ ସେଠାରେ ଭିଡ଼ ଜମିଥିଲା। ଦେଖୁ ଦେଖୁ ଏହି ଦୃଶ୍ୟ ସାମାଜିକ ଗଣମାଧ୍ୟମରେ ଭାଇରାଲ ହୋଇଥିଲା। ଏହାପରେ ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ସଫାରି ବୋନେଟ୍ ଉପରେ ବସି ରିଲ୍ କରିବାକୁ ନେଇ ୧୫,୫୦୦ ଟଙ୍କା ଓ ବିନା ହେଲମେଟ୍ରେ ସ୍କୁଟି ଚଲାଇବାକୁ ନେଇ ୧୫୦୦ ଟଙ୍କାର ଚାଲାଣ କାଟିଛି।
କୁହାଯାଉଛି ଯେ, ଟାଟା ସଫାରିଟି ଜିଲାର ଶଙ୍କରଗଡ଼ର ସୌରଭ କୁମାରଙ୍କ ନାମରେ ପରିବହନ ବିଭାଗରେ ପଞ୍ଜିକୃତ ହୋଇଛି। ବୋନେଟ୍ ଉପରେ ବସି ରିଲ୍ କରିଥିବା ଯୁବତୀଙ୍କ ନାଁ ବର୍ଣ୍ଣିକା ଚୌଧୁରୀ ଓ ସେ ଅଲ୍ଲାପୁର ବାସିନ୍ଦା ବୋଲି ଜଣାପଡ଼ିଛି।
