ମୁମ୍ବଇ- ମହାରାଷ୍ଟ୍ରର ଖାରଗରରେ ଅଂଶୁଘାତରେ ମୃତ୍ୟୁ ସଂଖ୍ୟା ୧୪ରେ ପହଞ୍ଚିଛି ।ଖାରଗରରେ ଏକ ସଭାରେ ଲକ୍ଷ ଲକ୍ଷ ଲୋକ ପହଞ୍ଚିଥିବା ବେଳେ ପ୍ରଚଣ୍ଡ ଖରା ଯୋଗୁଁ ଅନେକ ଲୋକଙ୍କର ଅଂଶୁଘାତ ହୋଇଥିଲା । ଏଥିରେ ଅନେକ ଲୋକଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ଶହ ଶହ ଲୋକ ଅସୁସ୍ଥ ହୋଇପଡିଥିଲେ । ୫୦ରୁ ଅଧିକ ଲୋକଙ୍କୁ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । ପୂର୍ବରୁ ୧୩ ଜଣଙ୍କର ମୃତ୍ୟୁ ହୋଇଥିବା ବେଳେ ମଙ୍ଗଳବାରରେ ଚିକିତ୍ସାଧୀନ ଅବସ୍ଥାରେ ଆଉ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି ।
ମଣିଷର ଶରୀରର ତାପମାତ୍ରା ୪୦ ଡିଗ୍ରୀ ପହଞ୍ଚିଗଲେ ବିଭିନ୍ନ ଅଙ୍ଗ ଅକାମୀ ହେବା ସହ କୋମାକୁ ଚାଲିଯିବାର ସମ୍ଭାବନା ରହିଥାଏ। ଏଥିରେ ଲୋକଙ୍କର ମୃତ୍ୟୁ ହୋଇଥାଏ । ଏହି ସଭାରେ ୩ ଲକ୍ଷ ଲୋକ ସାମିଲ ହୋଇଥିବା ବେଳେ ପ୍ରଚଣ୍ଡ ଖରାରେ ବିନା ଛାମୁଣ୍ଡିଆରେ ଏମାନେ ବସିଥିଲେ । ଏଥିପାଇଁ ଅଂଶୁଘାତରେ ଅନେକଙ୍କ ମୃତ୍ୟୁ ହୋଇଛି ।
ଏବେ ଓଡିଶାରେ ତାପମାତ୍ରା ବୃଦ୍ଧି ପାଇଛି । ବିଭିନ୍ନ ସ୍ଥାନର ତାପମାତ୍ରା ୪୦ ଡିଗ୍ରୀ ଉପରେ । ସକାଳୁଆ ସ୍କୁଲ୍ କରାଯାଇଛି । ମାତ୍ର ଦୂରରୁ ଆସୁଥିବା ଛାତ୍ର ଛାତ୍ରୀ ଅନେକ ସମୟରେ ଅସୁବିଧାର ସମ୍ମୁଖୀନ ହେଉଛନ୍ତି । ଗ୍ରୀଷ୍ମତାପରୁ ରକ୍ଷାପାଇଁ ଲୋକଙ୍କୁ ସଚେତନ କରାଯାଉଛି । ବିଭିନ୍ନ ସ୍ଥାନରେ ଜଳଚ୍ଛତ୍ର ସହ ଅନ୍ୟ ବ୍ୟବସ୍ଥା କରାଯାଇଛି ।
