ଭୁବନେଶ୍ବର: ସାରା ରାଜ୍ୟରେ ପ୍ରବଳ ଗ୍ରୀଷ୍ମ ପ୍ରବାହ ଜାରି ରହିଛି। ଗତକାଲି ଭଳି ଆଜି ବି ବାରିପଦା ରାଜ୍ୟର ସର୍ବାଧିକ ଉତ୍ତପ୍ତ ସହର ଭାବେ ପରିଗଣିତ ହୋଇଛି। ଆଜି ବାରିପଦା ତାପମାତ୍ରା ୪୪ ଡିଗ୍ରୀ ସେଲିସିୟସ ରହିଛି। ଗତକାଲି ୪୩.୫ ଡିଗ୍ରୀରେ ରାଜ୍ୟର ଏହା ସର୍ବାଧିକ ଉତ୍ତପ୍ତ ସହର ରହିଥିଲା। ଝାରସୁଗୁଡ଼ା ତାପମାତ୍ର ୪୨ ଡିଗ୍ରୀ ହୋଇଥିବାବେଳେ ସମ୍ବଲପୁର ୪୧.୮, ଭୁବନେଶ୍ବର ୪୦.୨ ଡିଗ୍ରୀ ଓ ଚାନ୍ଦବାଲି ୪୦ ଡିଗ୍ରୀ, ହୀରାକୁଦ ୪୦, କେନ୍ଦୁଝର ୩୮, ବାଲେଶ୍ବର ୩୬.୪, ଗୋପାଳପୁର ଓ ପୁରୀ ତାପମାତ୍ରା ୩୩.୨, ପାରାଦ୍ବୀପ ୩୨.୪ ରେକର୍ଡ କରାଯାଇଛି। କଟକ ସହର ତାପମାତ୍ରା ୪୧.୨ ଡିଗ୍ରୀ ସେଲିସିୟସ ରହିଛି।
ରାଜ୍ୟରେ ଜାରି ରହିଥିବା ଗ୍ରୀଷ୍ଣ ପ୍ରବାହକୁ ଦୃଷ୍ଟିରେ ରଖି ୭ ଜିଲାକୁ ପାଣିପାଗ ବିଭାଗର ୟେଲୋ ୱାର୍ଣ୍ଣିଂ ସତର୍କ ସୂଚନା ଦିଆଯାଇଛି। ଝାରସୁଗୁଡ଼ା, ସମ୍ବଲପୁର, ସୁନ୍ଦରଗଡ଼, କେନ୍ଦୁଝର, ମୟୁରଭଞ୍ଜ, ଦେବଗଡ଼ ଓ ଅନୁଗୁଳ ଜିଲାକୁ ପାଣିପାଗ ବିଭାଗ ପକ୍ଷରୁ ଏହି ୭ଟି ଜିଲା ପାଇଁ ୟେଲୋ ୱାର୍ଣ୍ଣିଂ ଜାରି ହୋଇଛି।
ତେବେ ଆସନ୍ତାକାଲିଠାରୁ ରାଜ୍ୟରେ ତାପମାତ୍ରାରେ ସାମାନ୍ୟ ପରିବର୍ତ୍ତନ ହେବ ବୋଲି ପାଣିପାଗ ବିଭାଗ ପକ୍ଷରୁ ଆକଳନ କରାଯାଇଛି। ଆସନ୍ତା ୫ ଦିନ ପର୍ଯ୍ୟନ୍ତ ବିଭିନ୍ନ ସ୍ଥାନରେ ବର୍ଷା ସମ୍ଭାବନା ରହିଛି। ଏପ୍ରିଲ ୧୬ ତାରିଖରୁ ରାଜ୍ୟରେ ବର୍ଷାର ପରିମାଣ ବୃଦ୍ଧି ପାଇବ। ଦକ୍ଷିଣ ଓ ଉପକୂଳ ଓଡ଼ିଶାରେ ବର୍ଷା ହେବ। ଏପ୍ରିଲ ୧୭ ଓ ୧୮ରେ ଉପକୂଳ ଓଡ଼ିଶାରେ ବର୍ଷା ସମ୍ଭାବନା ପୂର୍ବାନୁମାନ କରାଯାଇଛି ବୋଲି ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି।
